Read Nhengatu Marku 6 Bible Online

Marku 6 - Nhengatu bible

Marku 6

¹Asui Jesus usu aintasui kuaita umbuewaita irumu setama kiti.

²Asui sauru rame umbue ainta sinaguga upe, siyawaita kuaita usenduwaa ae aintausikie aintausendu sesewara, aintaunyee: —Maa suitaa uri kua ukuawawaa? Maataa kua ukuawasawa urikuwaa? Mayetaa umunya panye kua milagri ipu irumu?

³Umbaa sã aete kua karapina, imembira kua Maria, aintatuyuwesawa kuaita Tiagu Juze yuiri, Juda yuiri Simão yuiri? Tiserá aintauiku yanepiterupi kuaita sendiraita? Asui aintaipiaiwa aintaumaa ixupe arama.

⁴Asui Jesus unyee ainta supe: —Kuaita utitikawaita aintaurespetari ainta apekatu kiti, maa kuaita aintarendawa upewaraita aintarumuaraita yuiri aintarukapuraita yuiri, timaa aintaurespetari ainta.

⁵Asui timaa upuderi umunya milagri ape, anyunte uxari ipu aintarese kuaita imãsiwaita yepeyepe umukaturu arama ainta.

⁶Asui iakayemu umaa ainta tiresewara aintauruyari. Asui umbue panye tendawa yaweyawe.

⁷Jesus usenui ipiri kuaita duziwaita umundu aintausu mukumukuĩ, umee ainta supe arama ukuawasawa aintaumburi arama demuniu ikiawaita.

⁸Umundu tiarama aintaurasu nẽ maa nungara aintaviaji rupi, anyunte aintaurasu yepe aintabatuna, nẽ pão yuiri, nẽ aintasaku yuiri, nẽ dinyeru yuiri,

⁹Uxari aintaumundeu aintasapatu, maa tiuxari aintaumundeu mukuĩ aintakamixa.

¹⁰Asui unyee ainta supe: —Mame kuri pesika aintaruka upe ape kuri peiku ate peyuiri aintarendawa sui.

¹¹Mame rame kuri tiaintausuanti penye tiyuiri aintausendu penye arama, mairame pesu aintasui pepiri iwi peipi sui amuita ukuawa arama aintarese.

¹²Asui aintausu umbue kuaita miraita sasiyara arama aintaumanduari aintapekadu.

¹³Aintaumburi siya demuniwita, aintauxari azeti aintaakanga rese siya imãsiwaita rese aintaumukaturu arama ainta.

¹⁴Asui aintaruixawa Erudi usendu Jesus resewara nyãse aintausendu sesewara panye miraita. Yepeyepe unyee: —Juão Batista upaka manusawa sui nyãse uriku ukuawasawa kirimbawawaa.

¹⁵Yepeyepe unyee: —Elia ae, yepeyepe unyee: —Aete aintasuiwara kuaita utitikawaita kuxima.

¹⁶Maa Erudi unyee: —Juão ae, kua haxariwaa aintaumunusuka iakanga aete upaka yuiri mukuĩsawa.

¹⁷Nyãse kua Erudi uxari kuera aintaumprezu Juão aintaupukuari ae kadeya upe sesewara kua imu Filipe rimiriku Erudia, nyãse Erudi uyuka isui ae ximiriku arama.

¹⁸Nyãse Juão umbeu ixupe tirepuderi reyuka kua nemu rimiriku.

¹⁹Asui ipiaiwa kua Erudia, uputari umundu aintauyuká ae, maa tiupuderi.

²⁰Asui Erudi usikie Juão sui nyãse ukuawa apigawa purangawaa ae tiwa umunya ipekadu asui umukaturu putari ae. Asui usendu rame ae tiukuawa mayetaa nyãse suuri yepe usendu ixupe.

²¹Asui yepe ara uwasemu maye uputariwaa yawe Erudi umunya rame festa umanduari arama unaseri rame kuera uxari aintaumbau turusu kuaita sumuaraita panye suraraita ruixawa yuiri panye serakuenawaita Galileya upe.

²²Asui uwike aintapiri kua Erudia membira asui upurasi aintaumaa, asui suuri Erudi umaa ixupe, kuaita yuiri sumuaraita. Asui aintaruixawa unyee ixupe kua kunyamuku: —Kuiri repurandu seirumu maa reputariwaa ape kuri hamee inde arama.

²³Asui unyee ixupe arama: —Supiwa Deus ukuawate, repurandu rame maa pitera rupi seretama hamee maa inde arama.

²⁴Asui usemu usu upurandu imaya, unyee: —Maataa kuri hapurandu irumu? Imaya usuaxara ae: —Repurandu Juão Batista iakanga.

²⁵Aramete uyuiri aintaruixawa ipiri kutara, unyee: —Haputari remee ixe arama kuiri pratu upe Juão Batista iakanga.

²⁶Asui sasiyara ipia turusu kua aintaruixawa, maa umbeuwaa resewara sumuaraita resewara yuiri tiupuderi usaisu isui ae.

²⁷Asui kutara umundu yepe surara usu arama uyuka Juão akanga, asui usu umunusuka isui iakanga.

²⁸Asui urasu iakanga pratu upe uxari arama ixupe kua kunyamuku asui uxari imaya supe ae.

²⁹Asui aintausendu irumu sesewara kuaita Juão umbuewaita aintauri aintauyuka ipira aintauxari arama ae iwi kuara upe.

³⁰Asui aintauyuiri ipiri kuaita Jesus umunduwaita aintaumbeu ixupe panye aintaumunyawaa panye aintaumbuewaa yuiri.

³¹Asui unyee ainta supe: —Peyuiriana seirumu pepitu arama seirumu kuaira tiwa upe yamaa mira. Nyãse timaye aintaumbau arama siya resewara miraita uriwaita aintapiri.

³²Asui aintausu amu kiti aintapawa iyaraimawaa upe.

³³Maa kuaita siyawaita aintaumaa aintausu ape aintaukuawa ainta, asui aintauyana akiti aintarunde kiti panye tendawa sui asui aintausika aintarunde.

³⁴Asui uyari irumu Jesus umaa siya miraita asui pirasua umaa ainta, nyãse uvelya yawe ainta tiwaita yawe uriku usarusara. Asui umbue ainta turusu.

³⁵Asui karuka rame aintauri ipiri kuaita Jesus umbuewaita aintaunyee ixupe: —Iyaraimawaa upe yaiku, aiwana pituna yande.

³⁶Rexari aintausu aintausasawa arama kua kampu tetama kiti kuayentuwaa aintaupiripana aintaumbauwaa arama.

³⁷Maa usuaxara ainta: —Penyete pemee aintaumbau. Asui aintausuaxara ae: —Maitaa maa yasu yapiripana meyu duzentu dinyeru irumu yaxari arama aintaumbau?

³⁸Asui unyee ainta supe: —Muiritaa periku meyu? Pesu pemaa. Asui aintaukuawa muiritaa aintauriku aintaunyee ixupe: —Yarikute sinku meyu mukuĩ pirá.

³⁹Asui Jesus umundu aintauwapika banduwaita kapĩ tiwa upe.

⁴⁰Asui aintaumunya kuaye umbeuwaa yawe, aintauwapika sinkuentawaita sẽiwaita yuiri.

⁴¹Asui upisika kuaita sinku meyu mukuĩ pirá yuiri umaa iwate kiti uabensuari ae, asui umpena umee ainta supe umbuewaita aintaupartiri arama ainta supe ae, yawete yuiri upartiri ainta supe mukuĩ pirá.

⁴²Asui aintaumbau panye ainta ate aintaapuana.

⁴³Asui aintaumuatiri duzi sextu aintaumbauwaa rimirera meyu pirá yuiri.

⁴⁴Kuaita umbauwaita meyu sinku mili aintasiyasawa kuaita apigawaita.

⁴⁵Asui anyunte Jesus umundu umbuewaita uwiye igara kiti aintausu arama lagu ruaxara kiti Betisaida kiti uxari ramere aintausu isui kuaita siyawaita.

⁴⁶Asui uxari rireana aintausu asui usu iwitera kiti upurandu Deus irumu.

⁴⁷Asui pituna ainta igara upe aintauiku lagu piterupi yepenyu Jesus uiku iwi rese.

⁴⁸Asui ara uri irumu Jesus umaa ainta aintaupurara aintauyapukui nyãse kirimbawa iwitu upeyu aintaruaxara asui usu aintapiri parana ara rupi, uputari usasawa ainta.

⁴⁹Asui aintaumaa uwata parana ara rupi aintaumaite ianga ae, ape aintausasemu.

⁵⁰Asui aintausikie kirimbawa aintaumaa rame ae, asui Jesus unyee ainta supe: —Timaarese penye, ixete kua, tepesikie.

⁵¹Asui uwiye aintairumu igara upe asui upitu iwitu. Asui aintausikie aintaumaa ae.

⁵²Nyãse timaa aintaukuawa mayesawataa Jesus uxari siya uyukuawa kua meyu nyãse santawaa aintapia.

⁵³Asui aintauyasawaa lagu ruaxara kiti aintausika Genezare kiti asui aintauyari ape.

⁵⁴Asui aintausemu igara sui asui kuaita miraita aintaukunyeseri Jesus.

⁵⁵Asui aintauyana kuaita miraita panye aintarendawa kiti asui aintaururi imãsiwaita aintakama upe maa kiti aintausenduwaa Jesus.

⁵⁶Maa rupi Jesus uwata tendawa upe tetama upe u kampu upe yuiri aintaumusemu imãsiwaita ukara kiti aintaupurandu irumu uxari arama aintaupisika irupa rimbiwa rese, asui kuaita upisikawaita irupa rimbiwa rese purangana ainta.