Read Nhengatu Marku 7 Bible Online

Marku 7 - Nhengatu bible

Marku 7

¹Asui aintauyumuatiri Jesus ipiri kuaita farizewita yepeyepe umpinimawaita yuiri uriwaita Jeruzalẽ sui

²Asui aintaumaa umbuewaita yepeyepe aintaumbau tiaintaumuyasuka aintaipu.

³Nyãse kuaita farizewita kuaita yuiri judewita aintaumaite puranga tuyuweita kustumi tiaintaumbau tirame aintaumuyasuka aintaipu.

⁴Aintauruyari siya tuyuweita kustumi tiaintaupuderi aintaumbau aintauyuiri rire aintaupiripanawerawaa sui tirame aintaumuyasuka puranga, aintaurikute aintaumuyasuka puranga kupu panye aintakamuti yuiri aintapanela yuiri.

⁵Asui kuaita farizewita umpinimawaita yuiri aintaupurandu Jesus: —Marantaa tiaintauruyari tuyuweita kustumi kuaita rembuewaita maa aintaumbau tiaintaumuyasuka aintaipu?

⁶Usuaxara ainta: —Supiwa umbeu perese kua Izaia penye ugananiwaita, umpinima, kuaita miraita aintaumbeu purangawaa serese aintayuru irumuntu maa apekatu aintaumanduarisawa sesui.

⁷Tenyuntu aintaumee ixe arama purangawaa, aintaumbue apigawaita inyenga kuaye Deus inyenga yawe.

⁸Asui Jesus unyee ainta supe: —Tiana maa rese peiku isui Deus umbeuwaa maa suuri pemanduari apigawaita inyenga.

⁹Asui umbeu xinga ainta supe arama: —Ukuawaita yawe penye pexari pesui Deus umbeuwaa peruyari arama peramunyaita kustumi.

¹⁰Nyãse Muize unyee: "Rerespetari puranga nepaya nemaya yuiri, asui awa umbeu puxi ipaya supe imaya supe yuiri pexari aintauyuká ae."

¹¹Maa penye pembeu: —Yepe apigawa umbeu rame ipaya supe imaya supe yuiri kua peputariwaa seirumu Kurbã kuri ae yawesawa hameewaa kuri Deus supe.

¹²Maa umbaa xingate pexari aintaumunya puranga aintapaya supe aintamaya supe yuiri.

¹³Pemutenyuntuwara kua Deus inyenga penyenga irumu pembuewaa, siya xinga pemunya kuaye kua pemunyawaa yawe.

¹⁴Asui umuatiri yuiri kuaita miraita siyawaita, unyee ainta supe arama: —Pesendu ixe arama muiri penye pekuawa arama ae.

¹⁵Timaa nungara uwike aintayuru upe kuaita miraita umuaiwa arama ainta, maa panye kua usemuwaa aintayuru sui umuaiwa ainta.

¹⁶Awa uriku iapisa kuara urikute usendu.

¹⁷Uwike irumu uka kiti uxari kuaita siyawaita, asui umbuewaita upurandu isui sese kua inyenga umbue arama ipupe.

¹⁸Asui unyee ainta supe: —Maitaa penye tiwaita ukuawa? Maitaa tiserá pekuawa kua uwikewaa miraita yuru upe tiumuaiwa ainta?

¹⁹Nyãse tiuwike aintapia kiti maa uwike aintamarika kiti asui usemu aintasui. Yawe uxari aintaukuawa purangate yambau panye maa.

²⁰Nyãse kua usemuwaa miraita ipia sui umuaiwa ainta.

²¹Nyãse aintapia upe aintaumanduari puxuwera kuaita miraita, warixi ainta, aintaumunda, aintauyuká mira yuiri, aintauxari aintarimiriku aintausikari arama amu,

²²Aintaumuasi, aintaumunya panye puxuwera, aintauganani, aintaukuawa pukusawa, aintaumuasi amuita ukuawasawa, aintaupurungita marandua, aintauputari aintaumuserana, tiaintaukuawa aintaumanduari.

²³Asui panye kua puxuwerawa usemu miraita ipia sui asui umuaiwa ainta.

²⁴Asui upuamu usu Tiru kiti, ape uiku yepe uka upe tiuputari miraita ukuawa aikue ae, maa tiupuderi uyumimi aintasui.

²⁵Ape yepe kunya imembira uriku demuniu ikiawaa ipia upe usendu sesewara uri ipiri uyawika ipi ruaki.

²⁶Aete kua kunya greguwaa ae Sirufenisia suiwara, upurandu Jesus umburi arama demuniu imembira sui.

²⁷Maa Jesus unyee ixupe: —Rexari aintaumbau primeru kuaita tainaita, tipuranga yayuka tainaita sui aintameyu yamburi arama yawara miri supe.

²⁸Maa usuaxara ae: —Supiwa seruixawa, maa kuaita yawara mirita aintaumbau tainaita umukukuiwaa meza wira kiti.

²⁹Asui unyee ixupe: —Sesewara kua nyenga rembeuwaa repuderi reyuiri nyãse demuniu usemuana nembira sui.

³⁰Asui uyuiriana suka kiti uwasemu imembira uyenu kama upe nyãse demuniu usuana isui.

³¹Asui mukuĩsawa uyuiri Tiru sui usu arama Sidum kiti, asui usasawa Dekapuli pitera rupi usuwaa upe uiku lagu Galileya kiti.

³²Asui aintaururi ixupe yepe iapisaimawaa gaguwaa, asui aintaupurandu Jesus uxari arama ipu sese.

³³Asui urasu ae amu kiti miraita sui, asui uxari idedu iapisa kuara upe asui utumuna asui uxari idedu iapeku rese.

³⁴Asui usupiri sesa umaa iwaka kiti asui usiki ianga, unyee ixupe: —Efata, yawesawa reyupirari.

³⁵Asui uyupirariana iapisa kuara iapeku uyurawana, asui upurungita puranga.

³⁶Asui umundu ainta tiarama aintaumbeu sesewara maa kirimbawa piri aintaumbeu sesewara.

³⁷Asui kirimbawa aintaakayemu aintaumaa, aintaunyee: —Purangawaa umbue uxari iapisaimawaita usendu uxari aintaupurungita kuaita gaguwaita.