Read Nhengatu Marku 9 Bible Online

Marku 9 - Nhengatu bible

Marku 9

¹Asui unyee ainta supe: —Supiwa hambeu penye arama, yepeyepe pesuiwara timaa kuri aintaumanu senundere aintaumaa aintauxariana aintaruixawa arama kirimbawa kua Deus.

²Asui seis ara rire Jesus urasu irumu Pedru Tiagu Juão yuiri, urasu ainta iwitera rese akiti ipira uyutrukari aintaumaa.

³Asui irupa umuturi kirimbawa purangawaa murutinga piri panye sui, tiyamaa ike mundu upe upetekawaa murutinga piri isui.

⁴Asui aintaumaa Elia Muize yuiri, aintaupurungita Jesus irumu.

⁵Asui Pedru unyee Jesus supe: —Inde umbuewaa yande, purangate yaiku ike, purangate yamunya musapiri baraka, yepe inde arama amu Muize supe amu Elia supe.

⁶Tiukuawa mayesawataa umbeu nyãse aintausikie.

⁷Asui yepe nuvẽ uwiye aintaarupi asui aintausendu yepe inyenga nuvẽ pitera sui, umbeu: —Aete seraira hagustariwaa, pesendu ixupe.

⁸Asui kutarantu aintauyereu aintaumaa aintaruaki nẽ awa aintaumaa anyunte Jesus.

⁹Asui aintauwiye iwitera sui Jesus umbeu ainta tiarama awa supe aintaumbeu kua aintaumaawaa anyunte kuri aintaumbeu ae usemu rire kuri manusawa sui kua usemuwaa umaa kua ara.

¹⁰Asui aintauyumimi ainta supe arama aintapia upe ae, asui aintaupurandu aintapawa mayesawataa kua umbeuwaa usemu manusawa sui.

¹¹Asui aintaupurandu ae: —Marantaa kuaita umpinimawaita umbeu urikute uri primeru kua Elia?

¹²Asui umbeu ainta supe: —Kua Elia urikute uri umukaturu arama panye, nyãse yawe aintaumpinima sese kua usemuwaa umaa kua ara urikute upurara urikute uxari aintaumutenyuntu ae.

¹³Maa ixe hambeu penye arama: —Uriana kua Elia asui aintaumunya ixupe kuaye aintauputariwaa yawe maye aintaumpinimawaa yawe sese kuxima.

¹⁴Asui aintauyuiriana kuayentuana aintasui amuita umbuewaita aintaumaa siya miraita aintaruaki, asui kuaita umpinimawaita aintauyusuaxara ainta inyenga irumu.

¹⁵Asui anyunte kuaita siyawaita aintaumaa rame Jesus aintaakayemu asui aintauyana ipiri aintausuanti ae.

¹⁶Asui Jesus upurandu ainta: —Maa resewarataa peyusuaxara?

¹⁷Asui yepe aintasuiwara kuaita siyawaita usuaxara ae: —Inde rembuewaa, haruri nepiri seraira uriku yepe demuniu uxari inyengaimawa ae.

¹⁸Mame uwari sese umburi uwari iwi upe tie usemu iyuru sui usuu sanya uyumpiranta ipira, asui hapurandu rembuewaita aintaumburi arama ae maa timaa aintaupuderi.

¹⁹Asui Jesus unyee ainta supe: —Penye miraita kuiriwaita tiwaita peruyari, ate mairametaa haikure peirumu peruyari arama? Ate mairametaa hawaguentari peirumu? Peruri ixe arama ae.

²⁰Asui aintaururi ixupe ae, demuniu umaa irumu Jesus uxari taina uriri kirimbawa asui uwari iwi upe uyereyereu asui tie usemu isui.

²¹Asui Jesus upurandu taina ipaya unyee ixupe: —Mairame kuerataa uyupiru ixupe? Asui ipaya unyee: —Tainare rame ae.

²²Siya viaji umburi uwari tata kiti parana kiti yuiri uyuká arama ae, repuderi rame ape pirasua remaa yande arama reajudari yande.

²³Asui Jesus unyee ixupe: —Marantaa rembeu repuderi rame maa? Kua uruyariwaa upuderi umunya panye maa.

²⁴Aramete taina paya usuaxara ae: —Haruyari, reajudari ixe haruyari arama puranga piri.

²⁵Jesus umaa irumu kuaita siyawaita uyumuatiri ipiri umundu kua demuniu ikiawaa unyee ixupe: —Inde demuniu rexariwaa inyengaimawa iapisaimawaa yuiri ae, hambeu inde resemu isui kua taina, tikuri mairame rewike mukuĩsawa ipia upe.

²⁶Usasemu rire umuriri rire kirimbawa ae asui usemu isui, asui kua taina uyenu umanuwaa yawe asui siya miraita umbeu, umanuana.

²⁷Maa Jesus upisika ae ipu irumu usupiri upuamu.

²⁸Asui uwike irumu uka kiti umbuewaita upurandu ae anyuirawaa upe: —Marantaa tiyapuderi yamburi isui kua demuniu?

²⁹Asui unyee ainta supe: —Kuaita iyawewaita timaa yapuderi yamburi ainta tirame yapurandu Deus irumu.

³⁰Asui aintausemuana asui, aintausasawa Galileya piterupi, timaa uputari miraita ukuawa maa kiti usu.

³¹Nyãse umbue kuaita umbuewaita, unyee ainta supe: —Kua usemuwaa umaa ara uyuxari kuri ainta supe kuaita apigawaita aintauyuká arama ae asui musapiri ara rire umanu rire uyuiri kuri upaka.

³²Maa tiaintaukuawa mayesawa kua umbeuwaa, asui aintausikie aintaupurandu ae.

³³Asui aintausikana Kafarnaum kiti uiku aintairumu uka kiti upurandu ainta kuaita umbuewaita unyee ainta supe: —Maa resetaa pepurungita pee rupi?

³⁴Maa aintaukiririntu nyãse pee rupi aintauyupurungita aintapawa awataa serakuena piri aintasui.

³⁵Asui Jesus uwapika usenui ipiri kuaita duziwaita umbeu ainta supe: —Kua uputariwaa serakuena piri ae urikute aintarakakuerawara kuri ae, urikute uiku aintamiraita yawe uajudari arama ainta panye.

³⁶Asui ururi yepe taina uxari ae aintapiterupi asui uyumana ae umbeu ainta supe:

³⁷—Awa usuanti yepe taina iyawe seresewara usuanti kuri ixe, awa usuanti ixe timaa ixe usuantiwaa maa usuanti ae kua umunduwaa ixe.

³⁸Juão umbeu Jesus supe: —Inde umbuesarawaa yande yamaa yepe apigawa umburi demuniu nerera rese ape yasaisu umunya yawewaa nyãse tiyanerumuara ae.

³⁹Maa Jesus usuaxara: —Tepesaisu ae nyãse kua umunyawaa milagri serera rese timaa upuderi umbeu puxi serese.

⁴⁰Awa tiumuruanyana yande yanerumuarate ae.

⁴¹Nyãse kua umeewaa peu arama ii yepe kupu serera rese Kristu iyaraita resewara penye, supiwa hambeu penye arama urikute kuri sikuyara.

⁴²Kua uxariwaa aintaumunya puxuwera aintasuiwara kuaita tainaita uruyariwaita purangate maa yapukuari iayura upe ita turusuwaa yamburi arama ae parana piterupi.

⁴³Yepe ruaxara neipu uxari rame remunya puxi remunuka nesui ae, maa puranga piri rewike iwaka kiti yepe ruaxara neipu yawaite rewike infernu kiti mukuĩ ruaxara neipu irumu tata kiti tiwa uwewaa.

⁴⁴Mame tiwa aintaumanu kuaita tapuru, tiyuiri uwewaa kua tata ape.

⁴⁵Yepe ruaxara neipi uxari rame remunya puxuwera remunuka nesui ae, maa puranga rewike iwaka kiti yepe ruaxara neipi irumu yawaite aintaumburi inde infernu kiti mukuĩ ruaxara neipi irumu.

⁴⁶Mame tiwa aintaumanu kuaita tapuru, tiyuiri uwewaa kua tata ape.

⁴⁷Yepe ruaxara neresa uxari rame remunya puxuwera repikuĩ nesui ae, maa puranga arama rewike kua yaneruixawa Deus uikuwaa kiti yepe ruaxara neresa irumu yawaite aintaumburi inde infernu kiti mukuĩ ruaxara neresa irumu.

⁴⁸Mame tiwa aintaumanu kuaita tapuru, tiyuiri uwewaa kua tata ape.

⁴⁹Maa aintaumusembika kuri penye tata irumu muiri penye.

⁵⁰Purangawaa kua yukira, usasawa rame isui isembikasawa, mayetaa maa yapuderi yaxari sembika yuiri ae? Perikute yukira perese ape perikute peiku timaarese muiri penye.