Read Nhengatu Luka 1 Bible Online

Luka 1 - Nhengatu bible

Luka 1

¹Nyãse siya uputariwaita umpinima sese kua usasawawaa yanepitera rupi,

²Kuaye aintaumbeuwaa yawe yande arama kuaita uyupiruwaita umaa ae kuaita yuiri kuaita umbuewaita kua inyenga,

³Yawete yuiri hamanduari puranga hampinima inde arama inde Teufilu, hamaa rire panye uyupirungawa suiwara.

⁴Rekuawa arama supiwa kua yambuewaa inde.

⁵Aintaruixawa rame kuerare kua Erudi kuaita Judeyawaraita, ape aikue yepe saserduti sera Zakaria Abia rimiariru ae, asui kua ximiriku sera Izabel Arão rimiariru ae.

⁶Asui kuaita mukuĩwaita aintauiku puranga Deus umaa aintauruyari puranga panye yaneruixawa umbeuwaa ae.

⁷Tiaintauriku aintaraira nyãse kua Izabel tiupuderi uriku imembira tuyuweana ainta.

⁸Asui upuraki irumu saserduti yawe Deus supe sumuaraita irumu.

⁹Yawe aintaumunyawera uxariwaa yawe uwike yaneruixawa ruka upe usapi arama insensu.

¹⁰Asui kuaita miraita siyawaita aintauiku ukara kiti aintaumbeu Deus usapi pukusawa insensu.

¹¹Asui uri ipiri yepe yaneruixawa anju upuamu insensu uikuwaa rendawa ruaki ikatusawa sui.

¹²Asui Zakaria umaa irumu ae nẽ ukuawa maye uiku, asui usikie turusu isui.

¹³Maa kua anju umbeu ixupe: —Teresikie inde Zakaria, nyãse Deus usendu inde arama kua repuranduwaa irumu, asui kua nerimiriku Izabel uriku kuri imembira, asui rexari kuri sera arama Juão.

¹⁴Ape suuri kuri inde turusu, siya yuiri suuri aintapia unaseri resewara umaa kua ara.

¹⁵Asui yaneruixawa umaa kuri aintaara kiti ae tikuri uu vinyu furtiwaa tiyuiri uu kawĩ teresemu kuri ae Espiritu Santu irumu imaya marika upe pukusaware ae.

¹⁶Asuiwana kuri umuyereu siya Israel rimiariruita aintaruixawa Deus supe.

¹⁷Usu kuri senunde kiti iespiritu irumu ukuawasawa irumu yuiri kua Elia umuyereu arama kuri aintapayaita pia aintarairaita supe, umuyereu yuiri kuaita tiwaita uruyari aintausikari arama aintaukuawasawa kuaita purangawaita umukaturu arama yaneruixawa supe imiraita umukaturuwaita.

¹⁸Asui Zakaria upurandu kua anju: —Mayetaa kuri hapuderi hakuawa supiwa kua rembeuwaa? Nyãse tuyuweana ixe, asui kua serimiriku waimiana ae.

¹⁹Asui kua anju umbeu ixupe: —Ixete Gabriel, ixete kua upuamuwaa Deus runde kiti, asui umundu ixe hapurungita arama neirumu hambeu arama inde arama kua kuekatu purangawaa.

²⁰Ape kuiri repita kuri mudu (inyengaimawa) inde, tikuri repuderi repurungita ate usasawa kuri panye kua hambeuwaa nyãse tireruyari senyenga kua usasawawaa kuri sangawa upe.

²¹Asui kuaita miraita aintausaru Zakaria aintaumanduari, marantaa uiku uikupuku templu upe.

²²Asui usemu irumu tiana upuderi upurungita ainta supe, asui aintaumanduari umaa yepe manungara templu upe, asui ipu irumu umukame uxari arama aintaukuawa, asui muduwaa upita.

²³Asui umbawa rire upuraki templu upe uyuiri suka kiti.

²⁴Asui yawewaa rire ipuruã kua Izabel asui uyuyumimi miraita sui sinku yasi.

²⁵Unyee: —Yawe umunya ixe arama kua seruixawa, pirasuawaa umaa ixe arama, uyuka sesui kua puxuwerawa miraita umaawaa serese.

²⁶Asui seis yasi rire Deus umundu kua anju sera Gabriel yepe tetama kiti Galileya upewaa sera Nazare,

²⁷Ipiri yepe kunya tirewaa usasawa apigawa irumu upuranduwaa ximiriku arama yepe ximiariru kua Davi sera Juze, asui kua kunya sera Maria.

²⁸Asui kua anju uwike suka upe umbeu ixupe: —Suuri inde, inde purangawaa, yaneruixawa uiku neirumu.

²⁹Asui usendu irumu kua nyenga turusu uyumuapatuka asui umanduari mayesawataa kua umukuemawaa.

³⁰Asui kua anju umbeu ixupe: —Teresikie Maria nyãse Deus umaa puranga inde arama.

³¹Asui reriku kuri nembira inde, asui unaseri nesui yepe kurumi asui rexari kuri sera arama Jesus.

³²Turusu piri kuri aintaara kiti ae, aintauseruka ae taira kua kirimbawa piriwaa panye sui, asui yaneruixawa Deus uxari kuri uwapika itrunu upe kua samunya Davi,

³³Asui aintaruixawa kuri ae yawewarawate kuaita Jaku rimiariruita, asui tikuri mairame upawa aintaruixawa arama ae.

³⁴Asui Maria umbeu anju supe: —Maitaa maa panye kua, nyãse tihaiku apigawa irumu.

³⁵Asui kua anju usuaxara: —Uwiye kuri nerese kua Espiritu Santu asui ukuawasawa kua kirimbawa piriwaa umusuaki kuri inde, asui kua purangawaa unaseri kuri, aintauseruka kuri Deus raira ae.

³⁶Nyãse kua neprima Izabel yawete uriku yuiri imembira waimi rameana ae urikuana seis yasi kua aintaumbeuwaa tiwa uriku imembira ae.

³⁷Nyãse tiyamaa kua tiwa Deus upuderi umunya.

³⁸Asui Maria umbeu: —Ikete ixe seruixawa iyara, rexari umunya ixe arama kuaye rembeuwaa yawe. Asui kua anju uyuiriana isui.

³⁹Asui kua Maria uyumukaturu usu arama kutara yepe tetama kiti Judá upewaa iwitera rese.

⁴⁰Asui uwike suka kiti kua Zakaria asui umukuema kua Izabel.

⁴¹Asui usendu irumu Maria umukuema ae ukataka imembira imarika upe asui teresemu kua Izabel Espiritu Santu irumu.

⁴²Asui kirimbawa umbeu: —Deus uabensuariwaa inde panye aintasui kuaita kunyaita uabensuariwaa yuiri kua unaseriwaa kuri nesui.

⁴³Ape marantaa uxari uri umaa sepiri imaya kua seruixawa.

⁴⁴Nyãse hasendu irumu remukuema ixe suuri ukataka sembira semarika upe.

⁴⁵Asui suuri kuri kua kunya uruyariwaa umunya kuri ixupe arama panye kua umbeuwaa ixupe kua yaneruixawa.

⁴⁶Asui kua Maria unyee: —Sepia upe hamuturusu kua seruixawa.

⁴⁷Suuri sepia hamanduari seDeus kua umukaturuwaa ixe.

⁴⁸Nyãse umaawana kua kunya ixupe aramawaa aintawira kitiwaa, Kuiri kuri suuri kuri aintaumaa ixe panye kuaita miraita.

⁴⁹Nyãse kua kirimbawawaa umunya ixe arama turusu purangawaa.

⁵⁰Pirasua umaa panye kuaita usikiewaita isui panye kuaita miraita kuiriwaita panye aintarakakuerawaraita yuiri.

⁵¹Kirimbawa upuraki iyuwa irumu umusãi arama kuaita umanduariwaita aintapia upe puranga ainta amuita sui, kuaita umanduariwaita tenyuntu.

⁵²Umburi ainta aintatrunu sui kuaita kirimbawawaita, asui usupiri kuaita aintawira kitiwaraita.

⁵³Umuteresemu purangawaa irumu kuaita sasiwaita ixupe yumãsi, asui umundu isui kuaita rikuwaita timaa nungara aintaurasu.

⁵⁴Uajudari kua ixupe aramawaa Israel umanduari arama pirasua umaa ae.

⁵⁵Yawe umunya Abraão resewara panye ximiariruita resewara yuiri yawewarawate kuaye umbeuwaa yawe yaneramunyaita supe.

⁵⁶Asui Maria uiku musapiri yasi irumu kua Izabel, asui uyuiri suka kiti.

⁵⁷Asui usikana sangawa kua Izabel asui unaseri isui kua imembira.

⁵⁸Asui kuaita uikuwaita sendawa upe panye yuiri kuaita ianamaita aintausendu irumu pirasua yaneruixawa umaa ixupe asui aintauyumusuuri irumu.

⁵⁹Asui uitu ara rire aintausu aintausirkunsidari kua kurumi, asui aintauxari putari sera Zakaria ipaya rapixara.

⁶⁰Asui imaya umbeu: —Umbaa, tiyawe, yaxari sera arama Juão.

⁶¹Asui aintaunyee ixupe: —Tiyamaa peanamaita piterupiwaa serawaa Juão.

⁶²Asui aintaipu irumu aintaupurandu taina ipaya, maataa uputari aintauxari sera arama.

⁶³Asui upurandu aintairumu papera umpinima arama, asui umpinima, sera kuri Juão. Asui aintaakayemu panye.

⁶⁴Apete uyupirari iyuru uyuyurawa iapeku asui upurungitana umee purangawaa Deus supe.

⁶⁵Asui aintausikie panye kuaita sendawa puraita asui sesewara usika aintapiri panye kuaita uikuwaita iwitera rese Judeya upe.

⁶⁶Asui panye kuaita usenduwaita sesewara aintaumanduari aintapia upe, aintaunyee: —Awataa kuri nyã kurumi? Asui Deus ipu uiku irumu puranga.

⁶⁷Asui ipaya Zakaria teresemu ae Espiritu Santu irumu utitika, unyee:

⁶⁸—Purangawaa Israelitaita aintaruixawa Deus, nyãse, uri umaa umukaturu arama imiraita,

⁶⁹Nyãse usupiriana yande arama yepe umukaturu aramawaa yande kirimbawawaa aintasuiwara kuaita ximiariruita kua Davi Deus supe aramawaa,

⁷⁰Kuaye umbeuwaa yawe aintayuru sui kuaita utitikawaita purangawaita,

⁷¹Uyurawa arama yande yaneruanyanaita sui, aintaipu sui yuiri panye kuaita ipiaiwawaita umaa yande arama.

⁷²Pirasua arama umaa yaneramunyaita supe umanduari arama kua purangawaa umbeuwaa ainta supe,

⁷³Umanduari arama kua umbeuwaa kirimbawa ixupe kua yaneramunya Abraão.

⁷⁴Uyurawa arama yande aintaipu sui kuaita yaneruanyanaita yapuderi arama yamunya ixupe arama benditu tiwa irumu yasikie,

⁷⁵Yamunya arama benditu ixupe yamanduarisawa ikiaimawaa irumu, purangawaa yawe umaa yande muiri ara ate yamanu.

⁷⁶Asui inde kurumi aintauseruka kuri inde utitikawaa uriwaa isui kua kirimbawa piriwaa, nyãse reyuiri yaneruixawa runde kiti remukaturu arama ixupe sapee,

⁷⁷Rexari arama kuri imiraita aintaukuawa arama umukaturu ainta umburi resewara aintasui aintapekadu,

⁷⁸Pirasua resewara umaa yande kua yaneDeus, ape uri kuri umaa yanepiri kua umuturiwaa iwate sui,

⁷⁹Umuturi arama aintarese kuaita uikuwaita pitunawasuwaa upe aintarese yuiri kuaita uikuwaita manusawa piterupi sasiyarawaa upe, uxari arama yaneipi uwata kua pee purangawaa rupi uxariwaa timaarese yaiku.

⁸⁰Asui kua kurumi uyukiriari puranga asui ukuawasawa kirimbawawaa. Asui uiku kampu upe ate usika sangawa uyumuyukuawa Israelitaita supe.