Read Nhengatu Luka 10 Bible Online

Luka 10 - Nhengatu bible

Luka 10

¹Asui yawewaa rire Jesus uparawaka setenta yuiri, asui umundu aintausu arama senunde mukumukuĩ panye tetama kiti maa kiti usu aramawaa.

²Asui umbeu ainta supe: —Turusuwaa kua Deus upuuwaa rendawa maa muiriira kuaita upurakiwaita ixupe, ape kuri pepurandu irumu kua upuuwaa rendawa ruixawa umundu arama kuri upurakiwaita aintaupuu arama ixupe iyaraita.

³Pesuana. Kuiri hamundu penye pesu arama kuaye uvelya usuwaa yawe aintapiterupi kuaita suu nyãruwaita.

⁴Teperasu peirumu dinyeru riru, tiyuiri pesaku, tiyuiri pesapatu, tepemukuema amuita pee rupi.

⁵Pewike rame yepe uka upe peyupiru pembeu ainta supe tiarama maa rese aintauiku.

⁶Aikue rame yepe uputariwaa timaarese uiku ape kuri pexari timaarese ae, tirame yamaa ae anyunte kuri uyuiri penye aramate kua timaaresesawa.

⁷Ape kuri peiku kua uka upe pembau aintairumu peu aintairumu nyãse panye upurakiwaa uganyari sikuyara, tepetirika ukaita rupi.

⁸Pewike rame aintaretama kiti asui aintausuanti penye pembau kua aintaumeewaa pembau arama.

⁹Pemukaturu kuaita mãsiweraita ape, asui pembeu ainta supe, kuayentuana pesui kua Deus usikari imiraita arama penye.

¹⁰Maa pewike rame yepe tetama kiti asui tirame aintausuanti penye pesemu aintasui ukara kiti, pembeu ainta supe,

¹¹Yapiri peruaxara iwi yaneipi sui perendawapura, maa pekuawa arama kuayentuana pesui kua Deus usikari imiraita arama penye.

¹²Maa hambeu penye arama: —Nyã ara upe kuri turusu piri upurara kua sidadi Suduma sui.

¹³Asui umbeu yuiri: —Puxuwera kuri inde sidadi Kurazim, puxuwera kuri inde tetama Betisaida, hamunya rame maa milagri Tiru upe Sidum upe yuiri kuaye hamunyawaa yawe penye arama kuximare sasiyara maa aintaumanduari aintapekadu resewara, aintaumuyari maa aintaakanga rese saku aintaumuyapumiwaa sinza upe yakuawa arama maa sasiyara ainta.

¹⁴Maa pepurara kuri turusu piri aintasui kuaita Tiru upewaraita Sidum upewaraita yuiri nyã ara kuri Deus uxari arama aintaupurara aintapekadu resewara.

¹⁵Asui inde tetama Kafarnaum maitaa reyusupiri aintasui ate iwaka kiti, asui rewiye yuiri ate infernu kiti, hamunya rame maa milagri Suduma upe kuaye hamunyawaa yawe inde arama uikure maa ate kuiri.

¹⁶Awa usendu penye arama usendu ixe arama yuiri, awa umburi isui penye umburi ixe yuiri, asui awa umburi isui ixe umburi yuiri kua umunduwaa ixe.

¹⁷Asui suuri aintauyuiri kuaita setentawaita aintaumbeu: —Inde yaneruixawa kuaita demuniwita aintauruyarite yande nerera resewara.

¹⁸Asui umbeu ainta supe: —Hamaa kua Yurupari uwari iwaka sui kuaye truvão werawaa yawe.

¹⁹Haxariana penye arama hakuawasawa pepiru arama buya rese lakraya rese yuiri sese yuiri panye yaneruanyana ukuawasawa yuiri, asui tikuri awa umunya penye arama puxuwera.

²⁰Ape peyumusuuri, maa timaa aintauruyari resewara penyenga kuaita demuniwita, maa peyumusuuri hampinima resewara perera iwaka kiti.

²¹Asui nyã ura Jesus uyumusuuri Espiritu Santu irumu unyee: —Hamee inde arama purangawaa inde sepaya, inde iwaka ruixawa kua mundu ruixawa yuiri nyãse reyumimi kuera kua nyenga aintasui kuaita ukuawawaita maa remukuawana ae ainta supe kuaita ipuiwaita. Ẽẽ, sepaya yawe remunya nyãse yawe reputari.

²²Sepaya uxariana ixe arama panye maa, tiawa ukuawa awataa kua taira yepenyute ipaya ukuawa, tiyuiri awa ukuawa awataa kua ipaya yepenyute taira ukuawa kua yuiri kua taira uxariwaa ukuawa ae.

²³Asui uyereu aintabanda kiti kuaita umbuewaita umbeu ainta supenyu: —Suuri kuri aintaresa kuaita umaawaita kua pemaawaa.

²⁴Nyãse supiwa hambeu penye arama, siya kuera kuaita utitikawaita tuixawaita yuiri aintauputari umaa kua pemaawaa maa timaa aintaumaa ae, aintauputari yuiri aintausendu kua pesenduwaa maa timaa aintausendu ae.

²⁵Asui yepe ukuawawaa Muize umpinimawaa upuamu upurandu Jesus usaã arama ae, unyee ixupe: —Inde umbuesarawaa maataa kuri hamunya hariku arama mundu nunkawaa upawa?

²⁶Asui Jesus upurandu ae: —Mayetaa Muize umpinima inyenga upe? Maitaa remanduari sese?

²⁷Asui usuaxara: —Rerikute regustari neruixawa Deus panye nepia upe panye neanga irumu, panye nekirimbawasawa irumu panye remanduarisawa irumu yuiri, asui rerikute regustari nerumuaraita kuaye reyugustariwaa yawe indepawa.

²⁸Asui Jesus unyee ixupe: —Supiwa resuaxara ixe, remunya ae ape kuri repakate inde.

²⁹Asui uputari resewara umbeu purangawaa sesepawate unyee Jesus supe: —Awataa serumuara?

³⁰Asui Jesus usuaxara: —Yepe apigawa usu Jeruzalẽ sui Jeriku kiti, asui aintaupisika ae kuaita mundawasuita aintauyuka isui panye imaa, asui aintaunupa ae, umanu putariana uiku aintausuana isui.

³¹Asui usasawa yepe saserduti pee rupi ape, asui umaa irumu ae anyunte usasawa ae pee ruaxara rupi.

³²Yawete yuiri usasawa pee rupi ape yepe levita, asui umaa ae ape usasawa isui apekatu rupi.

³³Asui yepe Samaria suiwara usuwaa upe uiku pee rupi usasawa suakintu, asui umaa irumu ae, pirasua umaa ixupe.

³⁴Asui usu ipiri ape upupeka isui iperewa, asui umburi sese azeti vinyu yuiri, asui uxari uwapika iburu rese urasu arama ae miraita ukiriwaa rendawa kiti, asui umukaturu ae puranga.

³⁵Asui wirande kiti uyuka mukuĩ dinyeru umee uka iyara supe, umbeu ixupe: —Resaru kua apigawa asui hayuiri rame kuri tirame usika kua dinyeru hapagari kuri inde panye.

³⁶Asui Jesus upurandu aintasui: —Awataa aintasui kuaita musapirita, sumuara kua aintaunupawaa kuaita mundawasuita?

³⁷Asui kua ukuawawaa Muize umpinimawaa unyee: —Aete nyã uajudariwaa ae pirasuawaa resewara umaa ae. Asui Jesus umbeu ixupe: —Resuana remunya iyawe.

³⁸Asui aintausuwaa upe aintauiku aintarapee rupi Jesus uwike yepe tetama kiti, ape yepe kunya serawaa Marta uxari uiku suka upe.

³⁹Uriku iamu sera Maria uwapika yaneruixawa ipi ruaki usendu arama Jesus umbuewaa.

⁴⁰Asui kua Marta turusu umanduari imuraki rese, asui uri Jesus piri unyee ixupe: —Seruixawa maitaa timaa arama inde arama seamu uxari ixe hapuraki ixenyu? Remundu uri uajudari ixe.

⁴¹Maa yaneruixawa usuaxara: —Marta, Marta reyukana nepia siyawaa rese.

⁴²Watari inde arama yepe. Maria urikuana kua purangawaa, asui tikuri awa uyuka isui ae.