Read Nhengatu Luka 11 Bible Online

Luka 11 - Nhengatu bible

Luka 11

¹Asui Jesus upurandu Deus yepe tetama upe, asui upurandupawa rire yepe umbuewaa upurandu ae unyee: —Yaneruixawa rembue yande yapurandu arama Deus kuaye Juão umbuewaa yawe aintaupurandu kuaita umbuewaita.

²Asui umbue ainta: —Pepurandu rame Deus irumu pembeu, inde yanepaya purangawaa nerera, reyuiriana yanepiri yaneruixawa arama inde,

³Remee yande arama yambau arama muiri ara.

⁴Reperduari yanesui yanepekadu, nyãse yaperduari panye kuaita umunyawaita puxi yande arama. Terexari yepe uganani yande yamunya arama puxi.

⁵Asui umbeu ainta supe: —Awa pesuiwara uriku ianama asui usu ipiri pituna piterupi unyee ixupe: —Seanama, repuru ixe arama musapiri meyu,

⁶Nyãse yepe seanama uwatawaa usika sepiri asui timaa nungara hariku hamee arama ixupe umbau arama.

⁷Asui kua ianama usuaxara ae uka sui: —Rexari ixe, nyãse hamusikindawana ukena, asui kuaita serairaita aintaukiriana seirumu, tihapuderi hapuamu hamee arama inde arama meyu.

⁸Maa hambeu penye: —Tirame upuamu umee ixupe kua uputariwaa ianama resewara ae maa upuamu kuri umee arama ixupe panye maa uputariwaa usasawa resewara puxuwera.

⁹Sesewara hambeu penye, pepurandu asui uxari kuri penye arama kua pepuranduwaa irumu, pesikari ae ape kuri pewasemu ae pesenui ukara sui asui upirari kuri penye arama.

¹⁰Nyãse panye kuaita upuranduwaita aintauriku kuri kua aintaupuranduwaa, asui kuaita usikariwaita aintauwasemu Kuri kua aintausikariwaa, asui kuaita upuranduwaita aintauwike arama uxari kuri aintauwike.

¹¹Awataa pesuiwara perikuwaa perairaita, asui neraira upurandu rame neirumu pirá, maitaa será remee ixupe yepe buya?

¹²U upurandu rame neirumu sapukaya rupia, maitaa remee ixupe yepe lakraya?

¹³Ape penye puxuwerawaita pekuawa rame pemee perairaita supe purangawaa, turusu piri kuri yanepaya iwaka kitiwara uxari kuri ainta supe kua Espiritu Santu kuaita upuranduwaita irumu ae.

¹⁴Asui Jesus umburi yepe demuniu muduwaa yepe apigawa sui, asui kua muduwaa uyupiru upurungita, asui aintaakayemu aintaumaa kuaita miraita siyawaita.

¹⁵Maa yepeyepe aintasuiwara aintaumbeu: —Pemaa, umburi demuniwita ukuawasawa irumu kua demuniu ruixawa Yurupari.

¹⁶Asui amuita aintauputari aintausaã ae asui aintaupurandu irumu milagri iwaka suiwara aintaumaa arama.

¹⁷Maa ukuawa maye aintaumanduarisawa, unyee ainta supe: —Yepe tuixawa umburi rame imiraita anyunte maa aintaupawa kuaita imiraita asui uwari kuri aintaresepawa aintarukaita kuaita imiraita.

¹⁸Sã Yurupari upuamu rame maa aintaruaxara kuaita idemuniwita, maitaa maa aintaupuderi aintauiku aintaruixawa irumu? Yawe hambeu nyãse pembeu hamburi demuniu Yurupari ukuawasawa irumu.

¹⁹Hamburi rame maa demuniwita Yurupari ukuawasawa irumu, maa irumutaa maa aintaumburi ainta kuaita perairaita? Sesewara aintate kuri aintaumbeu peresewara.

²⁰Maa hamburi rame maa kuaita demuniwita Deus dedu irumu supiwate pekuawa usikana pepiterupi kua Deus peruixawa arama ae.

²¹Usaru rame suka puranga kua kirimbawawaa umaramunya rupiara irumu santa uiku panye imaa.

²²Maa uri rame yepe kirimbawa piriwaa umuserana ae asui utumari isui kua umaramunya rupiara uxariwaa ipia sese asui umunda isui imaa upartiri arama ae.

²³Kua tiwa uiku seirumu umuruanyana ixe, kua tiwa umuatiri seirumu ainta umusãi ainta.

²⁴Yepe demuniu ikiawaa usemu rame apigawa sui uwata tikangawaa upe usikari upituwaa rendawa arama, asui tirame uwasemu umbeu: —Hayuiri kuri seruka kiti hasemuwaa kuera sui.

²⁵Asui uri uwasemu ae umaa kuxima upiri umukaturu senunde ae kua apigawa.

²⁶Asui kua demuniu usu urasu sumuaraita seti demuniu puxuwera piri isui, asui aintauwike aintauiku arama ipia upe kua apigawa. Asui puxuwera piri uiku kua apigawa isui uikuwaa kuera yepe demuniu irumu.

²⁷Asui Jesus umbeu irumu kua inyenga yepe kunya aintasuiwara kuaita miraita siyawaita usasemu umbeu: —Suuri kuri kua uyupiruwaa inde imarika upe kua uxariwaa reu ikambi.

²⁸Maa umbeu: —Suuri piri kuri kuaita usenduwaita Deus inyenga asui aintaumunya kuri kuaye umbeuwaa yawe.

²⁹Aintauri irumu siyapiri miraita Jesus uyupiru umbeu: —Kuaita miraita kuiriwaraita puxuwerawaita aintaupurandu hamunya arama aintaumaa mayewantu maa timaa hamunya ainta supe ae aintaumaa, anyunte hamunya kuaye Juna umunyawaa kuera yawe.

³⁰Nyãse kuaye Juna umukamewaa yawe aintaumaa kuaita Ninive upewaraita yawete yuiri kuri kua unaseriwaa umaa kua ara umukame aintaumaa arama kuaita miraita kuiriwaraita.

³¹Kua kunya Sul suiwara aintaruixawa ae umbeu yuiri Deus uxari kuri pepurara penye miraita kuiriwaraita pepekadu rese umbeu irumu kuri pepekadu rese, nyãse kuxima uri apekatu sui usendu arama Salumão ukuawasawa maa kuiri aikue yepe upuamu pepiterupi puranga piriwaa Salumão sui.

³²Mairame kuri Deus umbeu pepekadu rese aintausemu kuri kuaita Ninive upewaraita aintaumbeu Deus uxari arama pepurara pepekadu resewara nyãse kuxima sasiyara aintaumanduari aintapekadu aintausendu irumu Juna nyenga, aikuete yepe pepiterupi puranga piriwaa Juna sui.

³³Tiyamundeka lamparina yayumimi arama ae tiyuiri yaxari kaxa upe ae, maa yaxari uwapika sendawa upe umuturi arama aintaumaa panye kuaita uwikewaita uka upe.

³⁴Neresa aete nepira turi, puranga rame neresa umuturi puranga panye nepira upe, maa puxuwera rame neresa panye nepira uiku pitunawasu upe.

³⁵Ape remaa nesui yawaite pitunawasu neturi.

³⁶Ape umuturi rame panye nepira upe timaa kuri yamaa pitunawasuwaa, umuturi kuri inde arama kuaye turi umuturiwaa yawe.

³⁷Asui Jesus upurungita ramere uiku yepe farizeu uri usenui ae usu arama umbau irumu asui uwike uwapika meza ruaki.

³⁸Asui iakayemu umaa ae umaa irumu timaa Jesus umuyasuka ipu umbau runde.

³⁹Asui yaneruixawa umbeu ixupe: —Penye farizewita pemuyasuka pekupu pepratu yuiri ikupe sui maa pepia upe teresemu penye ugananisawa irumu pepuxuwerasawa yuiri.

⁴⁰Penye tenyuntuwaita, maitaa tiserá kua umunyawaa ikupe sui tiserá ae yuiri umunyawaa ikuara upe?

⁴¹Maa pemee Deus supe prezenti isui kua perikuwaa asui ikiaimawaa penye arama panye maa.

⁴²Maa puxuwera usika kuri perese penye farizewita, nyãse pexari dizimu urtelã rese aruda rese yuiri panye petemperuita rese yuiri asui pemutenyuntu Deus purangasawa ugustarisawa yuiri, perikute pemanduari Deus puranga asui pemunya yuiri nyã amu.

⁴³Puxuwera usika kuri perese penye farizewita, nyãse pegustari pewapika banku puranga piriwaita rese sinaguga upe asui pegustari aintaumukuema penye ukara kiti.

⁴⁴Puxuwera usika kuri perese nyãse kuaye semiteriu yawe penye tiwa yamaa, asui kuaita miraita usasawa iara rupi maa tiaintaukuawa.

⁴⁵Asui yepe ukuawawaa Muize umpinimawaa usuaxara ixupe: —Inde umbuesarawaa, remusasiyara yande irumu kua rembeuwaa.

⁴⁶Asui Jesus umbeu ixupe: —Puxuwera uri kuri perese yuiri penye ukuawawaita Muize umpinimawaa, nyãse pexari ainta supe kuaita apigawaita ipusewaa aintausupiri arama maa penye tipeajudari ainta aintausupiri arama ae, nẽ kuaira peajudari ainta pededu irumu.

⁴⁷Puxuwera uri kuri perese nyãse pemunya umanuwaita ruka ainta supe kuaita utitikawaita kuera peramunyaita uyukawaita.

⁴⁸Irumu pemukame yamaa peramunya ambiraita umunyawaita asui pexari yamanduari puranga pemaa ainta, nyãse aintauyuká kuaita utitikawaita kuera asui penye pemunya ainta supe aintaruka arama umanuwaita ambira.

⁴⁹Ape Deus ukuawasawa umbeu: —Hamundu kuri ainta supe utitikawaita apustuluita yuiri, asui aintauyuká kuri yepeyepe asui amuita aintaumuruanyana kuri ainta.

⁵⁰Kuaita miraita kuiriwaraita, aintaurikute aintaupagari aintaruwi panye kuaita utitikawaita kuera aintaumburiwaa kuxima kua mundu uyupirungawa sui ate kuiri.

⁵¹Supiwa hambeu penye arama: —Kuaita miraita kuiriwaraita aintaurikute kuri aintaupagari panye aintaruwi Abel sui ate Zakaria nyã aintauyukáwaa Deus ruka upe aintausapi aramawaa nimbawa rendawa ruaki.

⁵²Puxuwera usika kuri perese penye pekuawawaita Muize umpinimawaa, perikuanate panye pekuawasawa maa tikuri pewike asui pesaisu yuiri aintauwike kuaita uputariwaita uwike.

⁵³Asui usu irumu aintasui kuaita umpinimawaita farizewita yuiri aintauyupiru aintawafursari ae umbeu arama siya inyenga,

⁵⁴Nyãse aintauputari aintaumbeu puxi sese irumu kua inyenga umbeuwaa.