Read Nhengatu Luka 12 Bible Online

Luka 12 - Nhengatu bible

Luka 12

¹Asui aintauyumuatiri kuaita miraita siyawaita ainta yawaite aintauyukamirika aintauwari, asui Jesus uyupiru umbeu ainta supe kuaita umbuewaita, unyee ainta supe: —Pemaa pesui aintamaniaka saiwaa kuaita farizewita nyãse retentuwaa ae.

²Nyã aintauyumimiwaa yaneresa sui yamaa kuri ae, asui kuaita umunyawaita puxi uyumimisawa upe yakuawa kuri aintarese.

³Nyãse panye nyã pembeuwaa uyumimisawa upe aintausendu kuri uyukuawawaa upe, asui nyã pembeuwaa merupiara peapisa upe uka upe aintaumbeu kuri ae iwate sui aintausendu arama panye.

⁴Ape hambeu penye arama penye seanamaita: —Tepesikie aintasui kuaita uyukáwaita yanepira asui arirewara timaa nungara aintaupuderi aintaumunya.

⁵Maa hambeu penye arama: —Awa sui pesikie arama, pesikie isui kua upuderiwaa umburi penye infernu kiti uyuká rire penye. Supiwa, hambeu penye arama: —Pesikie isui.

⁶Maitaa tiyavenderi sinku wirá mirita mukuĩ kruzeru rikuyara? Maa Deus tisesarai yepe aintasuiwara.

⁷Ukuawate muiritaa isiyasawa peawa peakanga upe, tepesikie, sipiwasu piri penye wirá mirita siyawaita sui.

⁸Ape hambeu penye arama: —Awa umbeu seresewara apigawaita usendu arama umbeu yuiri kuri sesewara kua unaseriwaa umaa kua ara aintausendu arama kuaita Deus anjuita.

⁹Maa awa uyumimi seresewara apigawaita sui hayumimi yuiri kuri sesewara Deus anjuita sui.

¹⁰Deus kuri umburi isui ipekadu kua umbeuwaa yepe nyenga puxuwerawa sese kua unaseriwaa umaa kua ara, maa kua umbeuwaa puxi Espiritu Santu rese tikuri Deus umburi isui ipekadu.

¹¹Aintaurasu rame kuri penye sinaguga kiti aintapiri kuaita guvernuita kirimbawawaita yuiri tepeyuka pepia sese mayetaa pesuaxara ainta maye yuiri pembeu arama ainta supe.

¹²Nyãse nyã ura kuri Espiritu Santu umbue penye pembeu aramawaa ainta supe.

¹³Asui yepe apigawa uikuwaa aintapiterupi kuaita siyawaita umbeu ixupe: —Inde umbuesarawaa, rexari semu umee ixe arama pitera rupi sepaya ambira imaa.

¹⁴Maa Jesus usuaxara: —Inde apigawa, awataa uxari ixe hambeu aramawaa perese?

¹⁵Asui umbeu ainta supe: —Pemaa pesui yawaite peyumuasi pemaa resewara, nyãse tiapigawaita upaka aintamaa resewara.

¹⁶Asui umbeu ainta supe arama yepe inyenga umbuewaa rupiara ainta: —Yepe apigawa rikuwaa urikuwaa ikupixawa asui iya ikupixawa turusu.

¹⁷Asui umanduari ipia upe, maataa kuri hamunya? Nyãse timame haxari panye seiyaita.

¹⁸Asui unyee: —Yawe kuri hamunya, hamukukui serukaita, asui hamunya yuiri turusuwaita, ape kuri hamukaturu panye iya panye semaa yuiri uka upe.

¹⁹Asuiwana kuri hambeu seanga irumu, inde apigawa rerikuana neruka upe turusu nemaa umee arama siya akayu, kuiri timaarese inde, rembau reu yuiri, asui reyumusuuri.

²⁰Maa Deus umbeu ixupe: —Inde tiwa ukuawa ara, kua pituna remanu kuri, asui awa iyarataa kuri panye nemaa remukaturuwaa inde arama?

²¹Yawete kua umukaturuwaa imaa ixupe arama maa timaa nungara uriku Deus irumu. Tepeyuka pepia mundu rese

²²Asui unyee umbuewaita supe: —Tepeyuka pepia peresepawa, tiyuiri pembawa rese tiyuiri pepira rese maataa kuri pemundeu arama.

²³Nyãse puranga piri yanerikuesawa timbiu sui, asui puranga piri yanepira yanerupa sui.

²⁴Pemaa kuaita urubuita, timaa aintauyutima tiyuiri maa aintaupuu tiyuiri aintauriku aintaruka aintaumukaturu arama aintaumbau arama, maa Deus uxari aintaumbau arama. Sipiwasu piri penye wiraita sui.

²⁵Mayewataa pesuiwara upuderi uyukiriari iwate piri uyuka resewara ipia?

²⁶Ape tirame pepuderi pemunya nyã kuaira xingawaa, marantaa peyuka pepia sese nyã amu?

²⁷Pemaa kuaita putira tiaintaupuraki tiyuiri aintaumunya fazenda maa hambeu penye arama puranga piri aintarupa panye irupa purangawaa sui kua Salumão.

²⁸Ape Deus uxari rame aintaumundeu aintarupa purangawaa kuaita putira upakawaita kampu upe kuiri asui wirande aintaumburi ainta tata kiti, maitaa tiserá uxari kuri penye arama perupa arama, penye tiwaita peruyari puranga.

²⁹Tepesikari kirimbawa pembau arama peu arama yuiri tepeyuka pepia aintarese.

³⁰Nyãse panye kuaita tiwaita judeu kua mundu upe aintausikari nyã, asui pepaya ukuawate watari penye arama nyã nungaraita.

³¹Perikute pesikari panye runde sui peruixawa arama kua Deus asuiwana kuri uxari penye arama panye peputariwaa.

³²Tepesikie penye muiriirawaita, nyãse suuri pepaya uxari imiraita arama penye.

³³Pevenderi pemaa asui pexari sikuyara pirasuawaita supe, pesikari pexari pemaa tiwa upawa iwaka kiti tiwa upe tuyuwe ae, ape timundawasu umunda ae tiyuiri trasa umbau ae.

³⁴Nyãse mame pemukaturu pemaa akiti yuiri kuri pexari pepia.

³⁵Pexari pepira pruntu pepuraki arama pexari umuturi peturi.

³⁶Pemunya aintayawe kuaita apigawaita usaruwaita aintaruixawa uyuiri kazamentu sui aintaupirari arama ixupe ukena usenui irumu ainta.

³⁷Suuri kuri kuaita upurakiwaita aintaruixawa uwasemuwaita aintaupakate usika irumu kuri, supiwa hambeu penye arama uyumukaturu kuri uajudari arama aintauxari kuri aintauwapika meza ruaki asui uri kuri aintapiri uxari arama aintaumbau.

³⁸Suuri kuri kuaita uwasemuwaita usaruwaita ae usika rame pituna rame u kuema rame.

³⁹Hambeu pekuawa arama: —Kua uka iyara ukuawa rame maa ura usika kua mundawasu timaa uxari uwike suka upe.

⁴⁰Ape kuri pesaru ae nyãse uri kuri kua unaseriwaa umaa kua ara yepe ura tiwa upe kuri pesaru ae.

⁴¹Asui Pedru upurandu: —Seruixawa, maitaa rembeu yande arama nyã nyenga rembuewaa rupiara u rembeu ainta supe panye?

⁴²Asui yaneruixawa unyee: —Awataa kua upurakiwaa purangawaa ukuawawaa yawe suixawa uxari usaru suka puraita uxari arama aintaumbau sangawa upe?

⁴³Suuri nyã upurakiwaa suixawa uwasemuwaa usika rame umunya kuaye umbeuwaa yawe.

⁴⁴Supiwa hambeu penye arama, uxari kuri usaru panye imaa.

⁴⁵Maa uyumbeu rame aepawa kua upurakiwaa, seruixawa uikure sesui uikupuku, asui uyupiru unupa kuaita upurakiwaita apigawaita kunyaita yuiri asui umbau uu yuiri asui ukau.

⁴⁶Asui usika kuri suixawa kua upurakiwaa yepe ara tiwa upe usaru ae yepe ura tiwa upe ukuawa asui umpurarakari kuri ae umburi kuri ae aintairumu kuaita tiwaita uruyari.

⁴⁷Asui aintaunupa kuri ae turusu kua upurakiwaa ukuawawaa maataa suixawa uputari umunya maa timaa uyumukaturu umunya arama kuaye uputariwaa yawe.

⁴⁸Maa kuairantu umpurarakari nyã umunyawaa puxi tipukusawa ukuawa suixawa nyenga. Aintausaru aintaumaa turusu piri purangawaa irumu nyã urikuwaa turusu, asui nyã aintauxariwaa ixupe turusu, turusu piri aintaupurandu kuri irumu.

⁴⁹Hayuiri hamburi tata kua mundu kiti haputari maa sendi arama ae kuiri.

⁵⁰Ape yepe batizmu aintaubatizari arama ixe irumu, asui hapurara hasaru aintaumunya arama ae.

⁵¹Maitaa pemanduari hayuiri haxari timaarese ainta kua mundu upe? Umbaa, hambeu penye arama supiwa hayuiri hamutirika ainta.

⁵²Nyãse kuiri kuri aintauyumutirika kuaita sinkuwaita yepe uka puraita musapiri upuamu mukuĩwaita ruaxara, mukuĩwaita upuamu musapiriwaita ruaxara.

⁵³Aintauyumutirika kuri aintapawa, ipaya taira ruaxara, taira ipaya ruaxara, imaya imembira ruaxara, imembira imaya ruaxara, isugra inura ruaxara asui inura isugra ruaxara.

⁵⁴Asui umbeu yuiri ainta supe kuaita siyawaita: —Pemaa irumu nuvẽ uri kurasi uwikewaa sui ape pembeu: "Amana kuri yande." Asui amana uwari.

⁵⁵Asui pemaa irumu iwitu upeyu kurasi iarukanga sui ape pembeu: "Saku kuri." Asui sakuana ae.

⁵⁶Penye retentuwaita, pekuawate mayesawataa kua pemaawaa kua ara ape iwaka rese yuiri maa tipekuawa mayesawataa nyã pemaawaa kuiri?

⁵⁷Ape marantaa tipenyepawate pekuawa maataa nyã purangawaa?

⁵⁸Remukaturu neirumu kua umbeuwaa puxi nerese pesuwaa upe serakuenawaa ipiri yawaite usiki uentregari inde delegadu supe umprezu arama inde.

⁵⁹Supiwa hambeu inde arama: —Tikuri resemu asui ate mairame repagari panye redeveriwaa.