Read Nhengatu Luka 14 Bible Online

Luka 14 - Nhengatu bible

Luka 14

¹Asui yepe sauru rame Jesus uwike suka upe yepe farizewita ruixawa umbau arama irumu, asui panye aintaumaa ixupe.

²Apete yepe imãsiwaa ipungawaa ipira.

³Asui Jesus umbeu ainta supe kuaita ukuawawaita Muize umpinimawaa kuaita yuiri farizewita: —Maitaa yapuderi yamukaturu imãsiwaita sauru rame u tiyapuderi?

⁴Maa aintaukiririntu. Asui Jesus upisika ae ipu irumu asui umukaturu ae, asui uxari usu.

⁵Asui umbeu ainta supe: —Awataa pesuiwara tiuyuka ijumentu u itapira uwari rame iwi kuara kiti sauru ara upe?

⁶Asui tiaintaukuawa maye aintausuaxara ae.

⁷Asui umbeu ainta supe yepe inyenga umbuewaa rupiara aintaumaa irumu mayetaa aintausikari aintauwapika arama banku purangawaa rese kuaita usenuiwaita aintaumbau arama irumu.

⁸Ape unyee: —Yepe usenui rame inde kazamentu kiti teresikari rewapika purangawaa banku rese yawaite uri yuiri yepe usenuiwaa puranga piriwaa nesui,

⁹asui uri kua usenuiwaa inde umbeu kuri inde arama, rexari nebanku ixupe nyã, asui reyumutiĩ kuri inde resu rewapika anyu aramawaa banku rese.

¹⁰Maa usenui rame inde kazamentu kiti resu rewapika anyu aramawaa banku rese, asui uri kuri nepiri kua usenuiwaa inde umbeu inde arama, seanama resu rewapika purangawaa banku rese asui suuri kuri aintaumaa kuri inde panye kuaita amuita uwapikawaita neirumu.

¹¹Nyãse muiri kuaita uputariwaita turusu ainta amuita sui aintawira kiti kuri ainta, asui kuaita aintawira kitiwaita turusu aintaara kiti kuri ainta.

¹²Asui umbeu yuiri ixupe kua usenuiwaa umbau: —Remunya rame rembauwaa arama teresenui kuaita neanamaita u kuaita nemuita u kuaita nerumuaraita rikuwaita yawaite aintausenui yuiri inde aintaumbau aramawaa kiti, asui rerikute sikuyara.

¹³Maa remunya rame rembau aramawaa resenui kuaita pirasuawaita alejaduita yuiri tiwaita upuderi uwata yuiri sesaimawaita yuiri.

¹⁴Suuri kuri inde nyãse timaa aintaupuderi aintaupagari inde sikuyara. Asui reriku kuri sikuyara aintausemu rame kuri kuaita purangawaita.

¹⁵Asui yepe uwapikawaa Jesus irumu meza ruaki usendu irumu kua inyenga umbeu: —Suuri kuri kua umbauwaa Deus imiraita irumu.

¹⁶Maa Jesus usuaxara: —Yepe apigawa umunya yepe umbau aramawaa turusuwaa asui ukunvidari siya.

¹⁷Asui usikana sangawa aintaumbau arama umundu upurakiwaa ixupe umbeu arama kuaita ukunvidariwaita, peyuiriana, pruntuana panye.

¹⁸Maa aintauyupiru aintaumbeu muiri ainta aintaresewara. Asui kua primeruwaa umbeu: —Hapiripana yepe kupixawa harikute hasu hamaa ae, ape hambeu inde tiarama resaru ixe.

¹⁹Asui amu umbeu: —Hapiripana dezi bui hasure hamaa ainta ape hambeu inde tiarama resaru ixe.

²⁰Asui amu umbeu ixupe: —Hamendariana ixe sesewara tihapuderi hasu nepiri.

²¹Asui upurakisara uyuiri umbeu suixawa supe panye. Asui ipiaiwa kua uka iyara umbeu upurakiwaa supe: —Resuana kutara tetama kiti reruri ukara upewaita pee rupiwaita yuiri kuaita pirasuawaita yuiri kuaita tiwaita upuderi uwata kuaita sesaimawaita yuiri alejaduita yuiri.

²²Asui arirewara upurakisara umbeu ixupe: —Seruixawa hamunya kua rembeuwaa maa tire teresemu neruka.

²³Asui suixawa umbeu ixupe: —Resuana panye pee rupi turusuwaa remundu aintauwike arama seruka.

²⁴Nyãse hambeu penye arama, timaa yepe apigawa aintasuiwara kuaita hasenuiwaita umbau kuri kua hambauwaa upe.

²⁵Asui siyawaita miraita aintausu irumu, asui uyereu umaa ainta kiti umbeu ainta supe:

²⁶—Mayewaa uri sepiri tirame ugustari kuaira xinga sesui kuaita ipaya, imaya ximiriku, imuita, sendiraita, aepawate yuiri, timaa upuderi hambuewaa ae.

²⁷Mayewaa tiupisika ikurusa uri arama serakakuera timaa upuderi hambuewaa ae.

²⁸Asui mayewaa pesuiwara uputariwaa umunya yepe ture, maitaa tiuwapika umanduari muiritaa kuri ugastari sã uriku umbawa arama ae?

²⁹Yawaite uyupiru rire umunya ae tiupuderi umbawa asui aintaukasuari ae.

³⁰Aintaunyee kuri sese: —Kua apigawa uyupiru umpuamu iture arama asui timaa upuderi umbawa ae.

³¹Mayewaa tuixawa uputariwaa umunya kera amu tuixawa ruaxara, maitaa tiuwapika umanduari sã upuderi dezi mili apigawaita irumu umuserana arama kua uriwaa suaxara vinti mili apigawaita irumu?

³²Asui tirame upuderi umundu ixupe kuekatu apekatu suire ae upurandu arama irumu ukuawa arama mayetaa aintaupuderi timaarese ainta.

³³Yawete yuiri mayewaa pesuiwara tirame uxari panye maa urikuwaa tiupuderi hambuewaa ae.

³⁴Purangawate kua yukira, ape usasawa rame isui kua isembikasawa, maitaa maa yapuderi yaxari sembikate ae?

³⁵Timaa arama ae, tiyuiri maa arama ae iwi supe, anyunte yamburi ae. Awa uriku iapisa urikute usendu.