Read Nhengatu Luka 15 Bible Online

Luka 15 - Nhengatu bible

Luka 15

¹Asui aintaumusuaki Jesus panye kuaita publikanuita panye pekaduruita yuiri.

²Asui aintauyupurungita kuaita farizewita kuaita umpinimawaita yuiri aintaunyee: —Kua apigawa usuanti kuaita pekaduruita asui umbau aintairumu.

³Asui Jesus umbeu ainta supe kua inyenga umbuewaa rupiara ainta,

⁴Mayewataa apigawa pesuiwara urikuwaa sem uvelya asui uyusupari rame yepe aintasuiwara, maitaa tiuxari kuaita amuita nuventa nuvi iyaraimawaa upe usu arama usikari nyã uyusupariwaa ate uwasemu ae?

⁵Asui uwasemu rame ae usupiri ae, suuri ipia turusu.

⁶Asui uyuiri suka kiti umuatiri ianamaita sumuaraita yuiri umbeu ainta supe: —Peyumusuuri seirumu nyãse hawasemuana seuvelya uyusupariwaa.

⁷Hambeu penye arama: —Yawete yuiri suuri piri kuri kuaita iwaka upewaita sesewara yepe pekaduru sasiyarawaa umanduari ipekadu aintasui kuaita nuventa nuvi purangawaita tiwaita sasiyara aintaumanduari aintapekadu.

⁸Mayewataa kua kunya urikuwaa dezi prata ukanyemu rame yepe aintasuiwara, tiserá umundeka ituri, asui upiri suka usikari arama ae ate uwasemu ae.

⁹Asui uwasemu rire ae umuatiri panye iamuita sumuaraita yuiri umbeu: —Peyumusuuri seirumu nyãse hawasemuana kua prata ukanyemuwaa.

¹⁰Yawete yuiri, hambeu penye arama: —Suuri kuri Deus anjuita sesewara yepe pekaduru sasiyarawaa umanduari ipekadu.

¹¹Asui umbeu: —Yepe apigawa uriku mukuĩ taira.

¹²Asui kua taira tainawaa umbeu ipaya supe: —Sepaya, rexari ixe arama seyara arama nemaa suiwara. Asui upartiri ainta supe ae.

¹³Asui nẽre siya ara rire imu tainawaa umuatiri panye imaa usu arama yepe tetama kiti apekatu, akiti umburi panye imaa ipuxuwerasawa rese.

¹⁴Asui umburi rire panye imaa aintaupurara yumãsi panye nyã tetama upe, asui uyupiru yuiri upurara ae.

¹⁵Asui usu uiku irumu yepe apigawa apewara, asui umundu ae kampu kiti usaru arama tayasu.

¹⁶Asui suuri yepe umanduari umbau arama tayasu rimbiu maa tiawa uxari ixupe arama.

¹⁷Asui ukuawana umanduari ixupe umbeu ixupe aramate: —Muiri kuaita upurakiwaita sepaya supe aintauriku turusu pão usikasawa panye ainta supe, maa ixe hapurara haiku ike yumãsi.

¹⁸Hapuamu kuri hasu sepaya ipiri asui hambeu kuri ixupe, hamunya puxi Deus supe inde arama yuiri.

¹⁹Kuiri tipuranga ixe reseruka arama neraira ixe, kuiri remaa ixe aintayawe kuaita upurakiwaita inde arama.

²⁰Asui upuamu usu ipaya ipiri, asui usu apekatu xingare ipaya umaa ae, asui pirasuawaa umaa ixupe asui uyana suaxara uyumana ae ubejari ae.

²¹Asui taira unyee ixupe: —Sepaya, hamunya puxi Deus supe inde arama yuiri, tipuranga reseruka neraira ixe.

²²Maa ipaya umbeu ainta supe kuaita upurakiwaita: —Peruri kutara rupa purangawaa pemundeu ixupe, asui pexari anelu idedu rese, asui peruri sapatu pemundeu ipi rese.

²³Asui peruri nyã vaka miri ikirawaa peyuká ae, asui yambau arama ae asui yayumusuuri arama.

²⁴Nyãse kua seraira umanuwaa kuera ae kuiri upakana ae, kuxima uyusupari ae kuiri yawasemuana ae. Asui aintauyupiru aintauyumusuuri.

²⁵Asui kua imu tuyuwesawa uikure kupixawa kiti asui uyuiri irumu kuayentuana uka sui usendu aintaunyengari aintaupurasi yuiri.

²⁶Asui usenui yepe upurakiwaa upurandu ae, maataa aintaumunya uiku.

²⁷Asui umbeu ixupe: —Nemu uyuiriana asui nepaya uxari aintauyuká kua vaka miri ikirawaa nyãse taira uyuiriana purangate usuanti ae.

²⁸Asui ipiaiwa ae, asui tiuputari uwike aintairumu, asui ipaya usemu ipiri upurandu ae uwike arama.

²⁹Maa usuaxara ipaya siya akayu hapuraki inde arama nẽ yepe viaji tihasuaxara nenyenga, maa nẽ yepe viaji rexari ixe arama yepe kabritu hambau arama hayumusuuri arama seanamaita irumu.

³⁰Maa uyuiri rame kua neraira umburiwaa nemaa aintarese kuaita kunyaita warixiwaita anyunte rexari aintauyuká kua vaka miri ikirawaa.

³¹Asui umbeu ixupe: —Seraira, seirumute inde yawewarawate, neyarate panye maa semaa.

³²Ape yarikute yayumusuuri turusu nyãse kua nemu umanuwaa kuera ae asui upakana ae, uyusupariwaa kuera ae asui yawasemuana ae.