Read Nhengatu Luka 16 Bible Online

Luka 16 - Nhengatu bible

Luka 16

¹Asui umbeu yuiri umbuewaita supe: —Yepe apigawa rikuwaa uriku yepe impregadu usaruwaa imaa, asui aintaumbeu puxuwera sese umburi ipatrão iyara.

²Asui umundu aintausenui ipiri ae, umbeu ixupe: —Maataa kua hasenduwaa nerese? Remunya kunta kuiri remukame hamaa mayetaa remunyawaita nyãse kuiri tirepuderi resaru semaa.

³Asui kua usaruwaa imaa uyumanduari aepawate uyumbeu: —Maataa kuri hamunya nyãse tiana sepatrão uxari hasaru imaa? Tihapuderi hapikuĩ iwi tiyuiri hapuderi hapurandu hambau arama yawaite hayumutiĩ.

⁴Kuiri hakuawana maitaa kuri hamunya aintausuanti arama ixe aintaruka upe sepatrão umbeu rireana tihapuderi hasaru imaa.

⁵Asui usenui kuaita udeveriwaita ipatrão supe umbeu ixupe kua primeruwaa: —Muiritaa redeveri sepatrão supe?

⁶Usuaxara ae: —Hadeveri sem lata azeti. Asui umbeu: —Repisika nekunta kutara rempinima sinkuenta.

⁷Asui upurandu amu: —Muiritaa redeveri? Ape umbeu: —Sem lata trigu. Asui umbeu ixupe: —Repisika nekunta rempinima uitenta.

⁸Asui ipatrão umbeu nyenga purangawaa sese kua usaruwaa puxuwera nyãse umunya puranga ukuawawaa yawe. Nyãse kuaita mundu rairaita ukuawawaita ainta aintasui kuaita turi rairaita.

⁹Asui hambeu penye arama: —Pesikari penye arama peanamaita arama pemunya resewara ainta supe puranga pedinyeru ugananiwaa irumu ape kuri watari rame penye arama ae aintausuanti kuri penye aintaruka upe yawewarawate.

¹⁰Kua umunyawaa puranga uriku rame kuaira umunya kuri yuiri puranga uriku rame turusu, kua ugananiwaa uriku rame kuaira uganani yuiri kuri uriku rame turusu.

¹¹Ape peganani rame irumu kua pedinyeru ugananiwaa, awataa kuri uputari uxari pemaa arama supiwa?

¹²Ape tirame pemunya puranga amuita imaa irumu, awataa kuri uxari penye arama peyara arama?

¹³Nẽ awa upuderi upuraki mukuĩ patrão supe, nyãse puxi umaa amu supe asui ugustari kua amu, u uruyari amu inyenga asui tiuruyari kua amu inyenga. Tipepuderi pepuraki Deus supe pepuraki pukusawa pedinyeru arama.

¹⁴Asui kuaita farizewita ugustariwaita aintadinyeru aintausendu irumu panye kua inyenga aintaukasuari ae.

¹⁵Maa Jesus umbeu ainta supe: —Penyete pemunya puranga apigawaita umaa arama penye, maa Deus ukuawate pepia upe, nyãse kua aintausupiriwaa aintaumaa arama kuaita apigawaita puxuwerawa yawe Deus umaa ae.

¹⁶Aintauruyari Muize umpinimawaa utitikawaita nyenga yuiri ate Juão tempu rame, asui arire aintaumbue ainta supe kua nyenga purangawaa imiraita arama ainta kua Deus, asui panye kuaita miraita aintausikari aintauwike arama.

¹⁷Iwasuima xinga usasawa panye iwaka panye kua mundu yuiri isui ukanyemu yepe letra Muize umpinimawaa sui.

¹⁸Awa umuyuiri rame ximiriku umendari arama amu kunya irumu warixiwaa ae, asui warixiwaa yuiri nyã umendariwaa irumu kua kunya imena uxariwaa.

¹⁹Asui umbeu yuiri ainta supe: —Yepe apigawa rikuwaa umundeu fazenda pirangawaa purangawaa asui muiri ara umbau turusu purangawaa.

²⁰Asui ukara kiti uyenu yepe pirasuawaa urikuwaa iperewa sera Lazaru.

²¹Asui usikari umbau kuaita umukukuiwaita kua rikuwaa meza sui, asui aintauri kuaita yawara aintausereu iperewa.

²²Asui umanu kua pirasuawaa asui kuaita anjuita aintaurasu ae Abraão putia ruaki, asui umanu yuiri kua rikuwaa asui aintaumburi ae iwi kuara upe.

²³Asui upurarawaa upe uiku infernu upe kua rikuwaa kuera usupiri iakanga umaa apekatu kiti Lazaru uwapika Abraão putia ruaki.

²⁴Asui usasemu unyee: —Inde seramunya Abraão pirasuawaa remaa ixe arama remundu Lazaru uri umuyapumi idedu rakapira ii upe umururu arama seapeku, nyãse, turusu hapurara haiku ike tata upe.

²⁵Maa Abraão umbeu ixupe: —Inde seraira, remanduari panye kua purangawaa rerikuwaa repaka ramere inde, yawete yuiri kua Lazaru uriku kuera panye puxuwera maa kuiri ae uyumusuuri, asui inde repurara.

²⁶Asui Deus uxari yanepiterupi tiipiwaa tiarama aintaupuderi usasawa nepiri kuaita uputariwaita usu akiti, tiarama yuiri aintaupuderi aintauri yanepiri kuaita uikuwaita ape.

²⁷Asui unyee: —Inde seramunya, hapurandu inde remundu arama ae sepaya ruka kiti.

²⁸Nyãse hariku sinku semuita umbeu arama ainta supe tiarama aintauri aintaupurara ike.

²⁹Maa Abraão umbeu: —Aintaurikute Muize umpinimawaa utitikawaita yuiri, rexari aintausendu ainta supe.

³⁰Maa umbeu: —Tiyawe, inde seramunya Abraão, uri rame maa aintapiri yepe aintasuiwara kuaita umanuwaita aintautrukari maa aintapia.

³¹Asui Abraão usuaxara ae: —Tirame aintauruyari Muize nyenga aintanyenga yuiri kuaita utitikawaita tiyuiri aintauruyari usemu rame maa yepe manusawa sui.