Read Nhengatu Luka 17 Bible Online

Luka 17 - Nhengatu bible

Luka 17

¹Asui Jesus unyee umbuewaita supe: —Aintaurikute aintauyuganani xingare maa puxuwera kuri usika sese kua apigawa ugananiwaa ainta.

²Purangate yapukuari iayura upe ita ipusewaa yamburi arama parana tiipiwaa kiti kua uxariwaa umunya puxi yepe aintasuiwara kuaita ipuiwaita.

³Pemaa pesui. Umunya rame inde arama puxi kua nemu rembeu ixupe ipekadu, sasiyara rame umanduari ipekadu ape reperduari ae neirumu.

⁴Asui umunya rame puxi inde arama seti viaji yepe ara upe asui seti viaji uri nepiri umbeu inde arama sasiyara umanduari ipekadu, rerikute reperduari ae neirumu.

⁵Asui aintaumbeu ixupe kuaita apustuluita: —Yaneruixawa rexari yaruyari turusu piri.

⁶Asui Yaneruixawa umbeu ainta supe: —Peruyari rame puranga kuaye mustarda karusu yawe pembeu kuri ixupe kua mirá amurera, resaka resu repuamu parana kiti, asui uruyari kuri penyenga.

⁷Mayewaa pesuiwara urikuwaa yepe upurakiwaa ixupe ikupixawa kiti u usaruwaa iuvelya, asui uyuiri irumu kupixawa sui umbeu kuri ixupe kua upurakiwaa, reyuiriana rewapika meza ruaki rembau?

⁸Maa umbeu kuri ixupe, remunya hambau arama, asui remukaturu nerupa, asui resaru ixe hambau hauwaa upe, asui serakakuera rembau reu yuiri.

⁹Maitaa kuri urikute umbeu ixupe kuekaturete umunya resewara kua umunduwaa umunya?

¹⁰Yawete yuiri penye pemunya rire kua umunduwaa pemunya, pembeu kuri upurakiwaita yande tiwaita maa arama yande, anyunte yamunya kua yarikute yamunya.

¹¹Asui usuwaa upe Jeruzalẽ kiti Jesus usu usasawa Samaria pitera rupi Galileya upe yuiri.

¹²Asui uwike irumu yepe tetama kiti aintauri suaxara dezi lepruzuita.

¹³Asui aintaupuamu apekatu isui aintausasemu aintaumbeu: —Inde Jesus umbuewaa pirasuawaa remaa yande arama.

¹⁴Asui Jesus umaa irumu ainta, umbeu ainta supe: —Pesu pemukame saserdutita umaa penye. Asui aintausuwaa upe ikatuana ainta.

¹⁵Asui yepe aintasuiwara umaa irumu ikatuana ae, uyuiri umee arama turusu purangawaa Deus supe.

¹⁶Asui uyawika ate suwa uyenu iwi rese Jesus ipi ruaki, asui umee purangawaa ixupe. Samariawara ae.

¹⁷Asui Jesus upurandu ae: —Maitaa tideziwaita penye hamukaturuwaita, maa kititaa kuaita amu nuviwaita?

¹⁸Maitaa timaa yepe uyuiri umee purangawaa Deus supe isui kua apekatu suiwara?

¹⁹Asui umbeu ixupe: —Repuamu resuana nyãse reruyari resewara ikatuana inde.

²⁰Asui kuaita farizewita aintaupurandu irumu Jesus irumu Deus rangawa rese aintaruixawa arama ae umbeu ainta supe: —Tiyamaa yaneresa irumu maye yaneruixawa arama kua Deus.

²¹Tiyuiri kuri aintaumbeu: —Pemaa ae ike u pemaa ae mikiti, nyãse peruixawa arama ae pepia upe.

²²Asui umbeu ainta supe kuaita umbuewaita: —Yepe ara kuri peputari pemaa kua unaseriwaa umaa kua ara, maa tikuri pemaa ae.

²³Asui aintaumbeu kuri penye arama, pemaa ae ike, pemaa ae mikiti. Tepesu ipiri tiyuiri pesu aintarakakuera.

²⁴Nyãse kua truvão wera umuturiwaa yawe panye iwaka arukanga rupi yawete yuiri kuri uri rame kua unaseriwaa umaa kua ara.

²⁵Maa senundere uri urikute upurara turusu aintaumburi kuri yuiri ae kuaita miraita kuiriwaraita.

²⁶Kuaye aintaumunyawaa yawe kuera Nue tempu rame yawete yuiri kuri aintaumunya uri rame kuri kua unaseriwaa umaa kua ara.

²⁷Kuaita miraita aintaumbau aintauu, aintauyuka aintarimiriku aintauxari kunya apigawa supe, ate Nue uwike batelão upe asui parana uwike asui aintaukanyemu panye.

²⁸Yawete yuiri aintaumunya Lo tempu rame aintaumbau, aintauu, aintaupiripana, aintauvenderi, aintauyutima, aintaumunya aintaruka arama.

²⁹Asui nyã ara Lo usemu Suduma sui tata uwari inxufri irumu uyuká ainta panye.

³⁰Yawete yuiri uri rame kuri kua unaseriwaa umaa kua ara.

³¹Asui awa uiku uka arupi ipewawaa rese terexari uwiye uyuka imaa uka sui, yawete yuiri kua uikuwaa kupixawa upe terexari uyuiri.

³²Pemanduari kua Lo rimiriku rese.

³³Kua uputariwaa umukaturu isikuesawa ukanyemu kuri isui ae, maa kua umburiwaa isui isikuesawa uyumukaturu kuri ae.

³⁴Hambeu penye arama nyã pituna mukuĩ ukiriwaita kama upe uyuka kuri yepe asui uxari yepe.

³⁵Aintaukitikawaita kuri mukuĩ kunyaita uyuka kuri yepe asui uxari kuri amu.

³⁶Mukuĩ uikuwaita kuri kupixawa upe uyuka kuri yepe asui uxari kuri yepe.

³⁷Asui unyee umbuewaita supe: —Yaneruixawa maa kititaa kuri kua rembeuwaa? Asui usuaxara ainta: —Aintauyumuatiri kuaita urubuita umanuwaa kuera rese.