Read Nhengatu Luka 2 Bible Online

Luka 2 - Nhengatu bible

Luka 2

¹Asui nyã ara aintaruixawa Sezar Augustu umundu aintaupapari muiri aintasiyasawa panye kuaita mundu puraita iyaraita.

²Yawe aintauyupiri aintaupapari muiri aintasiyasawa, guvernaduru rame Siria upe, kua Kirinu.

³Asui panye miraita aintausu aintaretama kiti, aintauxari arama aintaupapari ainta.

⁴Asui Juze yuiri usemu Nazare sui Galileya upewara usu arama Judeya kiti Belẽ kiti, kua Davi retama, nyãse, Davi rimiariru ae.

⁵Uxari arama aintaupapari ae, ximiriku Maria irumu ipuruãwaa ae.

⁶Ape pukusawa aintauiku, usika sangawa unaseri arama isui kua imembira.

⁷Asui unaseri imembira primeruwaa, asui upupeka ae panu irumu asui uxari uyenu nimbawa umbauwaa riru upe, nyãse, tiaintauwasemu aintaukiri arama uka upe siya resewara miraita.

⁸Asui kuayentu tetama sui kuaita usaruwaita uvelya aintauiku kampu upe, aintausaru uvelyaita pituna rame.

⁹Asui yepe yaneruixawa anju uwiye aintapiri, asui yaneruixawa umuturi aintarese kirimbawa, ape aintausikie turusu isui.

¹⁰Asui kua anju umbeu ainta supe: —Tepesikie nyãse haruri penye arama kuekatu purangawaa suuriwaa ainta supe arama panye kuaita mundu puraita.

¹¹Nyãse uyi ara unaseri umaa ara, peresewara Davi retama upe yepe umukaturu aramawaa penye, aete kua Kristu yaneruixawa.

¹²Pepuderi kuri pekuawa supiwa kua hambeuwaa, nyãse, pewasemu kuri kua taina aintapupekawa panu irumu, uyenu nimbawa umbauwaa riru upe.

¹³Asui kutarantu aintauiku irumu kua anju siya anjuita iwaka upewaita aintaumee purangawaa Deus supe, aintaunyee:

¹⁴—Pemee purangawaa Deus supe iwaka kiti, asui pexari timaarese kuaita miraita kua mundu upe, kuaita ugustariwaita.

¹⁵Ape aintausu irumu aintasui iwaka kiti, kuaita anjuita, kuaita usaruwaita uvelya aintauyupurungita aintapawa: —Yasuana yamaa Belẽ kiti yamaa arama kua usasawawaa akiti, kua yaneruixawa uxariwaa yakuawa.

¹⁶Asui aintausu kutara, ape aintauwasemu Maria Juze yuiri asui kua taina uyenu uiku nimbawa umbauwaa riru upe.

¹⁷Asui aintaumaa irumu ae, aintaumbeu amuita supe, panye aintausenduwaa sesewara kua taina.

¹⁸Asui muiri kuaita usenduwaita aintaumbeuwaa kuaita usaruwaita uvelya aintaakayemu aintausendu.

¹⁹Maa Maria umukaturu ipia upe panye kua aintaumbeuwaa asui umanduari sese.

²⁰Asui kuaita usaruwaita uvelyaita aintauyuiri aintaumee purangawaa Deus supe aintaumuturusu ae yuiri sesewara panye kua aintaumaawaa aintausenduwaa kuaye anju umbeuwaa yawe ainta supe.

²¹Asui uitu ara rire aintauxari irumu aintausirkunsidari ae aintauxari sera arama Jesus kuaye anju umbeuwaa yawe senundere uyupiru imaya marika upe.

²²Asui ikatuana imaya kuaye Muize umbeuwaa yawe aintaurasu ae Jeruzalẽ kiti aintauxari arama ae yaneruixawa supe,

²³Kuaye yaneruixawa umpinimawaa yawe inyenga upe, perikute pexari ixe arama panye apigawaita primeruwaita unaseri aintamaya sui.

²⁴Perikute pexari pesapi aramawaita kuaye kua inyenga umbeuwaa yawe mukuĩ rula u mukuĩ pumba.

²⁵Ape yepe apigawa Jeruzalẽ upe sera Simeão, purangawaa kua apigawa yawewarawate umanduari Deus usaru umaa Deus uxari Israelitaita supe kua umbeuwaa, Espiritu Santu uiku irumu.

²⁶Asui Espiritu Santu uxari ukuawa tikuri umanu ae senundere umaa kua Kristu yaneruixawa Deus suiwara.

²⁷Asui kua Espiritu uxari usu templu kiti asui ipaya imaya aintaurasu kua taina Jesus aintaumunya arama ixupe kuaye inyenga kuximawara umunduwaa yawe,

²⁸Asui Simeão upisika ae iyuwa rese asui umee purangawaa Deus supe, unyee:

²⁹—Kuiri inde seruixawa rexari kua inde aramawaa usu timaarese kuaye rembeuwaa yawe.

³⁰Nyãse hamaawana seresa irumu kua remukaturu aramawaa ipupe.

³¹Kua remunyawaa aintaumaawana panye kuaita miraita,

³²Kua turi aintaumaa aramawaa kuaita tiwaita judeu umuturi arama aintarese puranga kuaita nemiraita Israelitaita.

³³Asui kua taina ipaya imaya yuiri aintaakayemu aintausendu irumu kua umbeuwaa sese.

³⁴Asui kua Simeão uabensuari ainta, asui unyee ixupe kua Maria imaya kua kurumi: —Remaa kua kurumi resewara aintaukanyemu kuri siya asui aintausemu kuri siya Israelitaita suiwara, aintaumbeu kuri turusu puxi sese.

³⁵Uyukuawa arama kuri panye kua aintaumanduariwaa aintapia upe kuaita siyawaita, asui inde yuiri kuri maye kua espada ukutukawaa yawe nepia kiti.

³⁶Ape yepe kunya utitikawaa sera Ana, Fanuel rayera ae, Aseru imira ae, waimiana ae, seti akayu uiku kuera imena ambira irumu umendari rire.

³⁷Viuvana kua kunya, uriku uitenta kuatru akayu, tiuxari templu anyunte umee purangawaa Deus supe muiri ara muiri pituna yuiri uyukuaku uiku upurandu arama Deus irumu.

³⁸Asui uri nyã ura umee purangawaa Deus supe, upurungita sesewara kua taina ainta supe kuaita Jeruzalẽ upewara panye usaruwaita kua umukaturu aramawaa ainta ipupe.

³⁹Aintaumbauwaa rire aintaumunya panye yaneruixawa umunduwaa inyenga upe aintauyuiri Galileya kiti aintaretama kiti sera Nazare.

⁴⁰Asui kua taina uyukiriari puranga, asui uyumuteresemu ukuawasawa irumu, asui kua Deus grasa uiku sese.

⁴¹Asui muiri akayu yaweyawe ipaya imaya aintausu Jeruzalẽ kiti aintaumaa arama festa paskua rame.

⁴²Asui Jesus urikuana duzi akayu aintausu yuiri kuaye aintaumunyawerawaa yawe akayu yaweyawe aintaumaa arama paskua.

⁴³Asui paskua rire aintauyuiri irumu kua kurumi Jesus upita Jeruzalẽ upe, maa ipaya imaya tiaintaukuawa sese.

⁴⁴Maa aintaumanduari uiku aintapiterupi kuaita amuita uyuiriwaita asui aintausu yepe ara, asui aintauyupiru aintausikari ae aintapiterupi kuaita aintaanamaita aintapiterupi yuiri kuaita aintaukunyeseriwaita.

⁴⁵Asui tiaintauwasemu ae asui aintauyuiri Jeruzalẽ kiti aintausikari arama ae.

⁴⁶Asui musapiri ara rire aintauwasemu ae templu upe uwapika aintapiterupi kuaita umbuewaita usendu ainta supe upurandu yuiri ainta.

⁴⁷Asui panye kuaita usenduwaita ixupe aintaakayemu aintausendu ukuawasawa kua usuaxarawaa yuiri.

⁴⁸Asui ipaya imaya umaa ae asui aintaakayemu yuiri aintausendu, asui kua imaya unyee ixupe: —Sembira, marantaa remunya yawe yande arama? Nepaya ixe yuiri sasiyara yande yasikari inde.

⁴⁹Asui usuaxara unyee ainta supe: —Marantaa pesikari ixe? Maitaa tipekuawa harikute haiku sepaya ruka upe?

⁵⁰Ape tiaintaukuawa mayesawataa kua inyenga umbeuwaa ainta supe.

⁵¹Asui usu aintairumu Nazare kiti, asui uruyari ainta puranga. Maa kua imaya umukaturu ipia upe panye kua usasawawaa.

⁵²Asui Jesus uyukiriari puranga uriku kua ukuawasawa purangawaa, puranga Deus umaa ae miraita yuiri.