Read Nhengatu Luka 20 Bible Online

Luka 20 - Nhengatu bible

Luka 20

¹Asui yepe ara umbuewaa upe uiku ainta, umbeu irumu miraita supe kua nyenga purangawaa templu upe, aintauri ipiri kuaita saserdutita ruixawaita umpinimawaita yuiri tuyuweita irumu.

²Aintaunyee ixupe: —Rembeu yasendu awa ukuawasawa irumu remunya panye remunyawaita, awataa uxari inde arama rekuawasawa?

³Asui usuaxara ainta: —Ixe yuiri hapurandu penye pembeu hasendu,

⁴Maa suiwarataa Juão batizmu iwaka suiwara u apigawaita suiwara?

⁵Asui aintauyupurungita aintapawa, aintaunyee: —Yambeu rame iwaka suiwara ae, ape maa umbeu yande arama; marantaa tiperuyari ae?

⁶Yambeu rame apigawa suiwara ae aintauyuká maa yande ita irumu kuaita miraita, nyãse, aintaumanduari utitikawaa kua Juão.

⁷Asui aintausuaxara ae aintaunyee: —Tiyakuawa maa suiwarataa ae.

⁸Asui Jesus unyee ainta supe: —Ixe yuiri tihambeu penye arama awa ukuawasawa irumu hamunya kua hamunyawaa.

⁹Asui uyupiru umbeu ainta supe yepe nyenga umbuewaa rupiara ainta, unyee: —Yepe apigawa uyutima ikupixawa upe, asui uxari ae ainta supe kuaita upurakiwaita aintausaru arama ae, asui usu aintasui apekatu kiti uiku aramare aintasui uikupuku.

¹⁰Asui sangawa upe umundu yepe upurakiwaa aintapiri kuaita usaruwaita ikupixawa aintaumee arama ixupe iya, maa kuaita usaruwaita aintaunupa ae arire aintaumundu uyuiri yawentu.

¹¹Asui umundu yuiri yepe upurakiwaa, maa aintaunupa yuiri ae asui aintaukasuari rire ae aintaumundu uyuiri yawentu.

¹²Asui musapirisawa umundu yuiri yepe, asui aintaumperewa yuiri ae asui aintaumburi ae kupixawa sui.

¹³Asui umbeu kua kupixawa iyara, maataa kuri hamunya? Hamundu kuri aintapiri seraira hagustariwaa, hakuawa ae kuri aintaurespetari.

¹⁴Asui aintaumaa irumu ae kuaita usaruwaita kupixawa aintauyupurungita aintapawa, aete kua upisika aramawaa imaa yasu yayuká ae yaneyara arama kuri panye imaa.

¹⁵Asui aintaumburi ae kupixawa sui, asui aintauyuká ae. Maitaa kuri umunya ainta supe kua kupixawa iyara?

¹⁶Uri kuri umukanyemu kuaita usaruwaita asui uxari kuri ikupixawa amuita supe, asui aintausendu irumu ae aintaunyee: —Tiyaputari yawe.

¹⁷Maa Jesus umaa ainta supe umbeu: —Mayesawataa kua aintaumpinimawaa kuxima? Kua ita aintaumburiwaa kuaita umunyawaita uka, sesete aintaumunya santa kua uka.

¹⁸Asui kua uwariwaa sese kua ita upepena kuri, maa kua ita uwariwaa sese umukurui kuri ae.

¹⁹Asui nyã urate aintauputari aintaupisika ae kuaita saserdutita ruixawaita maa aintausikie miraita sui, nyãse aintaukuawa umbeu kua inyenga aintarese.

²⁰Asui aintausaru aintaumaa ae, asui aintaumundu ipiri yepeyepe uputariwaita aintauxari Jesus umanduari purangawaita ainta aintaupisika arama ae inyenga irumu aintaupuderi arama aintauentregari ae serakuenawaa supe guvernaduru supe yuiri.

²¹Asui unyee umbuewaita supe: —Inde umbuewaa, yakuawate supiwa rembeu rembue yuiri tireparawaka remaa kuaita miraita, maa rembue Deus rapee rese supiwa.

²²Maitaa purangate yamee Sezar supe kua impustu uputariwaa yaneirumu?

²³Maa Jesus ukuawa aintauputari aintausaã ae, umbeu ainta supe:

²⁴—Pemukame hamaa yepe dinyeru. Maa rangawataa kua uyariwaa dinyeru rese, awa rerataa kua uyariwaa sese? Aintaumbeu ixupe: —Sezar iyara. Asui unyee ainta supe:

²⁵—Ape pemee Sezar supe Sezar iyara, asui pemee Deus supe Deus iyara.

²⁶Asui tiaintaupuderi aintaupisika ae inyenga irumu miraita umaawaa upe, asui aintaakayemu aintausendu ixupe, asui aintaukiriri.

²⁷Asui aintauri ipiri yepeyepe sadusewita kuaita umbeuwaita tiyapaka manusawa sui.

²⁸Aintaupurandu ae: —Inde umbuewaa, kuxima Muize umpinima yande arama yepe inyenga, umanu rame yepe apigawa tiuriku taira, imu uyuka yuiri ximiriku arama kua viuva umukiriari taira imu ambira supe.

²⁹Seti aintasiyasawa yepe apigawa rairaita, asui aintaimu uyuka ximiriku arama asui umanu ae tiuriku taira.

³⁰Asui yawete yuiri imu, asui imute yuiri, asui aintayaweyawe aintauyuka aintarimiriku ae.

³¹Asui yawepawa aintaumanu kuaita setiwaita tiaintauriku aintaraira.

³²Asui anyu arama umanu yuiri kua kunya.

³³Asui aintaupaka rame kuri manusawa sui awa rimirikutaa kuri ae? Nyãse, aintarimiriku kuera ae kuaita setiwaita.

³⁴Asui Jesus umbeu ainta supe: —Kuaita mundu puraita aintauyuka aintarimiriku, kunyaita aintauriku aintamena yuiri.

³⁵Maa kuaita purangawaita umaawaita kuri nyã amu mundu, kuaita upakawaita manusawa sui, tikuri aintauriku aintarimiriku tiyuiri aintauriku aintamena.

³⁶Ape tikuri aintaupuderi aintaumanu, nyãse yepewasu kuri ainta anjuita irumu, Deus rairaita ainta, nyãse upakawaa rairaita ainta.

³⁷Kuaita miraita aintaupaka kuri manusawa sui maye Muize umpinimawaa upe maye kuera Deus upurungitawaa ixupe mirá sui, asui umbeu: —Abraão Deus ae, Izaki Deus ae, Jaku Deus yuiri ae.

³⁸Tiumanuwaita Deus ae kua Deus, maa ainta Deus ae kuaita upakawaita, nyãse upakawaita ainta panye ixupe.

³⁹Asui yepeyepe umpinimawaita unyee ixupe: —Inde umbuewaa, puranga resuaxara ainta supe.

⁴⁰Asui arirewara tiaintaupuderi aintaupurandu ae.

⁴¹Maa Jesus upurandu ainta: —Maitaa aintaupuderi aintaumbeu Davi rimiariru kua Kristu?

⁴²Nyãse Davi umbeu livru upe serawaa Salmu, yaneruixawa umbeu seruixawa supe, rewapikare sekatusawa sui,

⁴³Ate mairame kuri hamburi neruanyanaita neipi banku arama.

⁴⁴Davite umbeu kuera suixawa ae, ape maitaa maa ximiarirute ae?

⁴⁵Asui umbeu ainta supe kuaita umbuewaita aintausenduwaa upe panye kuaita miraita.

⁴⁶Pemaa pesui kuaita umpinimawaita ugustariwaita uwata aintasaya ipukuwaa irumu ukara kiti miraita umukuema arama ainta, aintaugustari aintauwapika banku purangawaa rese aintasinaguga upe, aintaugustari yuiri aintauwapika serakuenawaita banku rese aintaumbauwaa upe.

⁴⁷Asui aintauganani aintaupisika aintaruka aintasui kuaita viuvaita asui aintaumunya urasão uikupuku tiarama uyukuawa aintarese, aintate aintaupurara kuri turusu piri sikuyara kua aintaumunyawaa.