Read Nhengatu Luka 21 Bible Online

Luka 21 - Nhengatu bible

Luka 21

¹Asui Jesus umaa kuaita rikuwaita aintauxari aintadinyeru uferta riru upe templu upe.

²Asui umaa yuiri yepe kunya viuva uxari mukuĩ dinyeru mirita.

³Asui umbeu: —Supiwa hambeu penye arama, kua viuva pirasuawaa umee turusu aintasui kuaita amuita.

⁴Nyãse panye kuaita amuita aintaumee isuiwara kua aintadinyeru tiwa watari ainta supe, maa kua kunya umeepawa isui kua watariwaa ixupe, umeepawa kua upiripana aramawaa ipupe ixupe.

⁵Asui yepeyepe upurungita templu rese aintaumaa maye purangawaa ae ita purangawaita irumu panye miraita umeewaita ufertaita irumu yuiri.

⁶Asui umbeu: —Panye kua pemaa, uri kuri yepe ara aintaumburi kuri panye ae tikuri yamaa yepe ita upuamu sendawa upe.

⁷Asui unyee umbuewaita supe: —Inde umbuewaa, mairametaa kuri usasawa kua rembeuwaa? Maataa rexari yamaa yakuawa arama sangawa usika?

⁸Asui umbeu ainta supe: —Pemaa pesui yawaite yepe uganani penye, nyãse aintauri kuri siya serera rese, aintaumbeu kuri: —Ixete ae, aintaumbeu yuiri kuri: —Usikana sangawa. Tepesu aintarakakuera.

⁹Asui pesendu rame kuri aintaupurungita kera rese, aintaumaramunya yuiri kuri aintarendawa upe, tepesikie nyãse yawe aintaurikute aintaumunya, maa tire usika upawa arama.

¹⁰Asui aintaupuamu amu miraita aintaumuruanyana arama amu miraita, asui amu guvernuita aintaumuruanyana amu guvernu.

¹¹Asui uriri kuri iwi kirimbawa, aintamãsi kuri siya, asui aintaupurara kuri yumãsi siya tetama rupi, asui aintauyumusikie turusu kuaita miraita asui aintaumaa kuri tiwaitare aintaumaa iwaka rese.

¹²Maa senundere panye kuayewaa aintaupisika kuri penye aintaumuruanyana kuri penye, aintauxari kuri penye sinaguga upe kadeya upe yuiri, asui aintaurasu kuri penye aintapiri kuaita tuixawaita guvernuita yuiri serera resewara.

¹³Yawe kuri pesasawa pembeu arama kuri testemunyu seresewara.

¹⁴Maa perikute pemanduari santa pepia upe tiarama kuri peyuka pepia sese mayetaa pesuaxara arama ainta.

¹⁵Nyãse ixe kuri hamee penye arama peyuru pekuawasawa yuiri, ape tikuri aintaukuawa aintausuaxara penye panye peruanyanaita.

¹⁶Asui kuaita pepayaita, peimuita yuiri, pemiraita yuiri panye peanamaita yuiri aintauentregari kuri penye peruanyanaita supe, asui aintauyuká kuri yepeyepe pesuiwara.

¹⁷Puxi kuri aintaumaa penye panye ainta serera resewara.

¹⁸Maa tikuri ukanyemu nẽ yepe peawa peakanga sui.

¹⁹Asui santa resewara peiku pepaka kuri.

²⁰Asui pemaa rame kuri aintaumukurara Jeruzalẽ suraraita irumu pekuawa kuri kuayentuana sangawa aintaumburi arama ae.

²¹Asui pexari kuri aintauyawawa iwitera kiti kuaita Judeya upewaita, asui kuaita tetama upewaita pexari aintauyawawa isui, asui kuaita uikuwaita kupixawa upe tepexari aintauyuiri tetama kiti.

²²Nyãse yawe kuri Deus uxari aintaupurara aintapekadu resewara aintaumunya arama kuri kuaye aintaumpinimawaa yawe kuxima papera upe.

²³Puxuwera kuri usika aintarese kuaita ipuruãwaita kuaita yuiri uxariwaitare aintamembira uu kambi nyã ara kuri, aintaupurara kuri turusu kuaita mundu puraita, asui ipiaiwasawa usika kuri aintarese kuaita miraita.

²⁴Aintauyuká kuri ainta espada irumu, asui aintaurasu kuri prezu ainta panye kua mundu kiti, asui kuaita tiwaita judeu aintaupiru kuri Jeruzalẽ rese ate aintarangawa usika.

²⁵Asui aintaumaa kuri tiwaitare aintaumaa kurasi rese yasi rese estrela rese yuiri, asui kuaita mundu puraita aintausikie kuri nyãse tiapu kua gapenu parana turusuwaa upe.

²⁶Pituana kuri siya apigawaita aintausikie resewara turusu panye kua usasawawaa kua mundu upe, asui kuaita kirimbawawaita iwaka rese aintaukataka kuri.

²⁷Asuiwana kuri aintaumaa kua unaseriwaa umaa kua ara, uri nuvẽ rese panye ikirimbawasawa irumu, igluria turusuwaa irumu yuiri.

²⁸Asui mairame kuri aintauyupiru aintausasawa kua hambeuwaa pesupiri peakanga pemaa iwate kiti nyãse kuayentuana perunde uyurawa arama penye.

²⁹Asui umbeu ainta supe yepe inyenga umbuewaa rupiara ainta, unyee: —Pemaa kua mirá figera panye mirá yuiri.

³⁰Pemaa irumu usemu sawa pisasua pekuawa kuri kuayentuana kurasi ara.

³¹Yawete yuiri pemaa irumu usasawa panye kua hambeuwaa pekuawa kuri kuayentuana perunde peruixawa arama kua Deus.

³²Supiwa hambeu penye arama, tire kuri aintaupawa kuaita miraita kuiriwaraita senundere usasawa panye kua hambeuwaa.

³³Upawa kuri panye iwaka panye ara yuiri maa senyenga tikuri upawa.

³⁴Pemaa pesui yawaite peyuka pepia peresepawantu, yawaite pekau, yawaite peyuka pepia kua mundu rese, yawaite nyã ara uriwaa umuyusana penye kutara.

³⁵Nyãse usika kuri aintarese panye kuaita uikuwaita mundu upe.

³⁶Pesaru pemaa yawewarawate pepurandu Deus irumu uxari arama penye arama kirimbawasawa pepuderi arama peyawawaa isui panye kua usasawawaa kuri, pepuderi arama kuri pepuamu umaa nyã unaseriwaa umaa kua ara.

³⁷Asui umbue ainta templu upe muiri ara, maa pituna rame usu uiku iwitera rese sera Ulivera.

³⁸Asui kuemaite aintauri ipiri templu kiti panye kuaita miraita aintausendu arama ixupe.