Read Nhengatu Luka 22 Bible Online

Luka 22 - Nhengatu bible

Luka 22

¹Asui kuayentuana aintarunde kua ara aintaumbau arama pão seẽwaa festa upe serawaa paskua.

²Asui kuaita saserdutita ruixawaita kuaita umpinimawaita yuiri aintauputari aintaukuawa maye aintaupuderi arama aintauyuká Jesus nyãse aintausikie miraita sui.

³Asui Yurupari uwike Juda ipia upe kua aintauserukawaa Iskariute, aete yepe aintasuiwara kuaita duziwaita.

⁴Asui usu aintapiri kuaita saserdutita ruixawaita ikapitãoita yuiri upurungita aintairumu mayetaa upuderi uentregari ainta supe Jesus.

⁵Asui suuri aintapia, asui aintaumee ixupe dinyeru.

⁶Asui umunya kuaye aintauputariwaa yawe asui arire usaru sangawa puranga uentregari arama Jesus ainta supe tiwa upe miraita umaramunya.

⁷Asui usika nyã ara aintaumbau arama pão seẽwaa aintaumanduari arama paskua.

⁸Asui Jesus umundu Pedru Juão yuiri unyee: —Pesu pemukaturu yambau arama paskua.

⁹Asui unyee umbuewaita supe: —Maa kititaa reputari yamukaturu ae?

¹⁰Asui umbeu ainta supe: —Pewike irumu tetama kiti pewasemu kuri yepe apigawa urasuwaa ii kamuti upe, pesu sakakuera uka kiti maa kiti uwikewaa.

¹¹Asui pembeu uka iyara supe: —Nyã umbuewaa yande umundu yapurandu inde; mametaa ukapi hambau aramawaa ape paskua hambuewaita irumu?

¹²Asui umukame kuri pemaa yepe ukapi turusuwaa iwate kitiwaa urikuwaa panye maa uka rupiara, ape kuri pemukaturu yanerunde.

¹³Asui aintausu aintauwasemu kuaye Jesus umbeuwaa yawe, asui aintaumukaturu paskua rupiara.

¹⁴Asui sangawa upe Jesus uwapika meza ruaki kuaita apustuluita irumu.

¹⁵Asui umbeu ainta supe: —Turusu hasaru hambau arama peirumu kua paskua senundere hapurara.

¹⁶Nyãse hambeu penye arama, timaa mukuĩsawa hambau ae ate sangawa usika rame aintaruixawa arama kua Deus.

¹⁷Asui upisika yepe kupu asui umee grasa sese umbeu: —Pepisika ae pepartiri ae penye arama.

¹⁸Nyãse hambeu penye arama, kuiri arirewara tiana mukuĩsawa hau mirá iya yukise ate usika rame kuri sangawa aintaruixawa arama kua Deus.

¹⁹Asui upisika yepe pão, asui umee rire grasa upartiri ainta supe ae umbeu: —Aete sepira hameewaa peresewara, pemunya yawe pemanduari arama ixe.

²⁰Yawete yuiri umunya umbau rire upisika yepe kupu umbeu: —Kua kupu aete kua nyenga pisasuwaa seruwi rese uyuyusenawaa peresewara.

²¹Pemaa ipu kua uentregariwaa ixe uwapika seirumu meza ruaki.

²²Nyãse kua unaseriwaa umaa kua ara usu usasawa kuaye aintaumpinimawaa yawe sese, maa puxuwera usika kuri sese kua uentregariwaa ae.

²³Asui aintauyupiru aintaupurandu aintapawa awataa aintasuiwara umunya kuri nyã.

²⁴Asui aintauyupiru aintauyupurungita aintapawa, awataa aintaara kiti piriwaa aintasui.

²⁵Maa Jesus umbeu ainta supe: —Kuaita tiwaita judeu ruixawaita aintaumundu ainta kirimbawa asui kuaita umunduwaita aintauseruka uajudariwaita ainta.

²⁶Maa tikuri yawe pepiterupi, maa kua aintaara kiti piriwaa urikute kuaye kua aintawira kitiwaa, asui kua umunduwaa urikute uajudari ainta panye.

²⁷Awataa aintaara kiti piriwaa u nyã uwapikawaa meza ruaki umbau u nyã uajudarisara ae? Maitaa timaa aintaara kiti piri nyã uwapikawaa meza ruaki? Maa pepiterupi ixete kua uajudariwaa penye.

²⁸Penyete kuaita peikuwaita santa seirumu hapurara pukusawa puxuwera.

²⁹Kuaye sepaya uxariwaa yawe ixe arama aintaruixawa arama ixe yawete yuiri haxari penye arama,

³⁰Pembau arama peu arama seirumu meza upe aintaruixawa irumu kuri ixe, asui pewapika kuri petrunu upe pembeu arama kuri aintarese panye kuaita duzi tribu Israelitaita.

³¹Asui unyee Pedru supe: —Simão, Simão, kua Yurupari uputari penye kirimbawa umuawa arama penye trigu yawe.

³²Maa hapuranduana nerese tiarama nekuere reruyari, ape kuri retrukari rire nepia remukirimbawa arama nemuita.

³³Asui unyee ixupe: —Seruixawa, pruntuana ixe prezu arama ixe neirumu hamanu arama yuiri ixe neirumu.

³⁴Maa Jesus, umbeu ixupe: —Hambeu inde arama, Pedru, musapiri viaji reyumimi serese tirekunyeseri ixe uyi ara senundere galu unyengari.

³⁵Asui Jesus umbeu ainta supe: —Hamunduwaa kuera pesu tiarama perasu dinyeru riru tiyuiri pesaku tiyuiri pesapatu. Maitaa watari penye arama maa nungara? Aintaunyee ixupe: —Timaa watari.

³⁶Asui umbeu ainta supe: —Maa kuiri awa uriku dinyeru riru urikute urasu ae isaku yuiri, asui kua tiwa uriku espada urikute uvenderi ipupekawa upiripana arama yepe espada.

³⁷Nyãse hambeu penye arama, yarikute yamunya kuaye aintaumpinimawaa yawe serese, aintaumaa ae puxuwerawa yawe. Asui nyã aintaumpinimawaa serese hamunya ae.

³⁸Asui aintaunyee ixupe: —Yaneruixawa remaa mukuĩ espada ike. Asui umbeu ainta supe: —Usika.

³⁹Asui usu tetama sui iwitera kiti sera Ulivera kuaye umunyawerawaa yawe, asui kuaita umbuewaita aintausu sakakuera.

⁴⁰Asui usika irumu usuana akiti Jesus umbeu ainta supe: —Pepurandu Deus irumu tiarama kuri awa uputari uganani penye.

⁴¹Asui usu aintasui apekatu xinga maye yayapiwaa yawe ita uwariwaa akiti, asui uyurinipia upurandu Deus irumu.

⁴²Umbeu: —Sepaya, reputari rame rexari usasawa sesui kua sekupu, maa teremunya kuaye haputariwaa yawe, remunya kuaye reputariwaa yawe.

⁴³Asui uri ipiri yepe anju iwaka sui umukirimbawa ae.

⁴⁴Asui upurara ipia upe asui upurandu kirimbawa piri. Asui siyai ae tuwi irumu asui uwari isui iwi rese.

⁴⁵Asui upurandupawa upuamu usu umbuewaita ipiri uwasemu aintaukiri aintauiku nyãse sasiyara ainta.

⁴⁶Asui umbeu ainta supe: —Marantaa pekiri? Pepuamu pepurandu Deus irumu tiarama awa uputari uganani penye.

⁴⁷Asui upurungita ramere uiku ae aintauri ipiri kuaita siyawaita miraita, asui yepe aintasuiwara kuaita duziwaita uri aintarunde, sera Juda, asui umusuaki Jesus ubejari ae.

⁴⁸Asui Jesus umbeu ixupe: —Juda maitaa rexari suanyanaita supe kua unaseriwaa umaa kua ara rebejariwaa resewara ae?

⁴⁹Asui kuaita upuamuwaita kuayentu suaki aintaumaa irumu nyã usasawawaa aintaupurandu isui: —Yaneruixawa maitaa yanupa ainta espada irumu?

⁵⁰Asui yepe aintasuiwara unupa saserdutita ruixawa ikriadu asui umunuka inambi katusawa sui.

⁵¹Maa Jesus unyee: —Pexari, usikana. Asui upisika inambi umukaturu ixupe ae.

⁵²Asui Jesus umbeu ainta supe: —Kuaita saserdutita ruixawaita templu kapitãoita yuiri tuyuweita yuiri kuaita uriwaita umprezu ae, maitaa peyuiri pepisika ixe espada irumu kaseti irumu yuiri kuaye pepisikawaa yawe yepe mundawasu?

⁵³Muiri ara haiku peirumu templu upe maa tipepisika ixe. Maa kuiri usikana perangawa pitunawasuwaa rangawa yuiri.

⁵⁴Asui aintaumprezu ae aintaurasu ae saserdutita ruixawa ruka kiti. Asui Pedru usu sakakuera apekatu xinga.

⁵⁵Asui aintaumundeka rame tata ukapi piterupiwaa upe aintauwapika suaki panye asui Pedru usu uwapika aintapiterupi.

⁵⁶Asui uri kua yepe kunya umaa Pedru uyumuaku tata, umaa ixupe unyee: —Aete sumuara yuiri.

⁵⁷Maa Pedru uyumimi sesewara unyee: —Kunya tihakunyeseri ae.

⁵⁸Asui uikupuku xinga yepe uri yuiri umaa ae unyee ixupe: —Indete yepe aintasuiwara. Maa Pedru unyee: —Inde apigawa, ixe timaa.

⁵⁹Asui yepe ura rire amu yuiri umbeu: —Supiwa sumuara ae nyãse Galileya suiwara ae.

⁶⁰Maa Pedru umbeu: —Inde apigawa, tihakuawa mayesawataa rembeuwaa. Asui upurungita pukusaware uiku galu unyengari.

⁶¹Asui yaneruixawa uyereu umaa Pedru supe, asui Pedru umanduari yaneruixawa umbeuwaa ixupe, uyi ara musapiri viaji reyumimi seresewara galu unyengari rundere.

⁶²Asui Pedru usu aintasui asui uyaxiu turusu.

⁶³Asui kuaita apigawaita upisikawaita Jesus aintaukasuari ae asui aintaunupa ae.

⁶⁴Asui aintausikindawa isui sesa aintaunyee ixupe: —Rembeu kuiri; awataa unupa inde?

⁶⁵Asui siya xinga nyenga puxuwerawa aintaumbeu ixupe sesewara.

⁶⁶Asui kuemaite aintauyumuatiri kuaita tuyuweita saserdutita ruixawaita yuiri umpinimawaita yuiri, asui aintaurasu ae serakuenawaita ipiri asui aintaunyee ixupe:

⁶⁷—Kristu rame inde rembeu yasendu. Maa Jesus usuaxara ainta: —Hambeu rame maa penye arama ae timaa peruyari ixe.

⁶⁸Asui hapurandu rame penye timaa nungara pesuaxara ixe arama.

⁶⁹Asui kuiri kuri kua unaseriwaa umaa kua ara uwapika kuri ikatusawa sui kua Deus kirimbawawaa panye sui.

⁷⁰Asui muiri ainta aintaupurandu ae: —Maitaa Deus raira inde? Asui usuaxara ainta: —Penyete pembeu ixete ae.

⁷¹Asui aintaunyee: —Maa xingataa yaputari yasendu sese? Yandete yasendu umbeuwaa iyuru suite.