Read Nhengatu Luka 23 Bible Online

Luka 23 - Nhengatu bible

Luka 23

¹Asui aintaupuamu panye kuaita uyatiriwaita asui aintaurasu Jesus Pilatu ipiri.

²Asui aintauyupiru aintaumbeu puxi sese, aintaunyee: —Yawasemu kua apigawa umunya puxi yaneretama upe, usaisu aintaupagari impustu Sezar supe, asui umbeu Kristu ae, aintaruixawa ae.

³Asui Pilatu upurandu ae: —Maitaa judewita ruixawa inde? Asui Jesus usuaxara: —Indete rembeu yawe.

⁴Asui Pilatu umbeu ainta supe kuaita saserdutita ruixawaita ainta supe kuaita miraita siyawaita yuiri: —Timaa hawasemu ipuxuwerasawa sese kua apigawa.

⁵Asui kirimbawa xinga aintaumbeu: —Uxari aintaumaramunya putari kuaita miraita, umbue ainta panye Judeya upe panye Galileya upe yuiri panye ike yuiri.

⁶Asui Pilatu usendu irumu aintaumbeuwaa upurandu ainta: —Maitaa Galileya suiwara ae?

⁷Asui usendu irumu Erudi retama suiwara ae umundu ipiri ae, nyãse, Erudi uiku Jeruzalẽ upe nyã ara.

⁸Asui Erudi umaa irumu Jesus suuri ipia nyãse kuxima uputari umaa ae nyãse usendu aintaumbeu sesewara, asui uputari yuiri umaa umunya milagri.

⁹Asui siya upurandu ae, maa Jesus tiusuaxara ae.

¹⁰Asui kuaita saserdutita ruixawaita kuaita umpinimawaita yuiri uikuwaita akiti kirimbawa aintaumbeu sese.

¹¹Asui tenyuntu Erudi umaa ixupe panye kuaita suraraita yuiri, ape aintaukasuari sese, asui aintaumundeu sese yepe ipupekawa purangawaa, asui umuyuiri Pilatu supe ae.

¹²Asui nyã arate puranga yuiri aintauyumaa, nyãse, puxi aintauyumaa kuera Erudi Pilatu irumu.

¹³Asui Pilatu umuatiri panye kuaita saserdutita ruixawaita panye serakuenawaita yuiri panye miraita yuiri,

¹⁴asui unyee ainta supe: —Pexariana ixe arama kua apigawa kua pembeuwaa uxari aintaumaramunya putari kuaita miraita, asui hapurandu ae puranga maa timaa hawasemu sese kua puxi pembeuwaa.

¹⁵Timaa yuiri Erudi uwasemu puxi sese nyãse umuyuiri yande arama ae. Ape yakuawate timaa nungara umunya puxi yayuká arama ae.

¹⁶Ape hampurarakari kuri ae asui hayurawa kuri ae.

¹⁷Asui urikute uyurawa ainta supe yepe prezu aintaumunya pukusawa festa.

¹⁸Maa panye kuaita miraita aintausasemu: —Remburi kua apigawa, reyurawa yande arama nyã Baraba.

¹⁹Kuxima prezu ae nyãse uxari aintauyunupa kuaita miraita tetama upe asui uyuká resewara yuiri mira.

²⁰Asui Pilatu umbeu yuiri mukuĩsawa nyãse uputari uyurawa kua Jesus.

²¹Maa kirimbawa piri aintausasemu: —Renupa uyari kurusa rese, renupa uyari kurusa rese.

²²Asui musapirisawa upurandu ainta: —Maataa umunya penye arama puxuwera? Tihawasemu sese puxuwerasawa hayuká arama maa ae, ape hampurarakari rire kuri ae hayurawa kuri ae.

²³Asui aintausasemu yuiri kirimbawa aintauputari uxari aintaunupa uyari kurusa rese. Asui aintaumuserana ae aintausasemu resewara kirimbawa.

²⁴Asui Pilatu umunya kuaye aintauputariwaa yawe.

²⁵Asui uyurawa ainta supe kua uxariwaa aintauyunupa kuaita miraita, kua uyukáwaa yuiri miraita, kuaye aintaupuranduwaa yawe, maa uxari ainta supe arama kua Jesus aintaumunya arama ixupe kuaye aintauputariwaa yawe.

²⁶Asui aintaurasu irumu ae aintawafursari yepe apigawa Sireni suiwara sera Simão uyuiri irumu kampu sui, asui aintauxari usupiri Jesus kurusa sakakuera.

²⁷Asui aintauri sakakuera siya miraita kunyaita yuiri aintaunupa aintaputia upe sasiyara resewara ainta Jesus rese.

²⁸Maa Jesus uyereu umbeu ainta supe: —Tepeyaxiu serese, penye Jeruzalẽ rayeraita, maa peyaxiu peresepawate pemembiraita rese yuiri,

²⁹Nyãse, amu ara kuri aintaumbeu kuri, suuri kuri kuaita tiwaita uriku imembira kuaita tiwaita umukiriari imembira kuaita yuiri kuri tiwaita uriku imembira aintauxari arama aintauu aintakambi.

³⁰Asui aintaumbeu kuri iwitera supe: —Rewari yanerese, aintaumbeu kuri iwi iwatewaa supe reyumimi yande.

³¹Aintaumunya rame yawe sikue ramere kua mirá, maitaa maa aintaumunya tikanga rameana kuri ae?

³²Asui aintaurasu mukuĩ puxuwerawaita aintauyuká arama irumu ainta.

³³Asui aintausika rire yepe tendawa kiti sera Kauvariu aintaunupa uyari kurusa rese kuaita yuiri puxuwerawaita yepe aintauxari Jesus katusawa sui yepe kanyutu banda sui.

³⁴Maa Jesus umbeu: —Inde sepaya reperduari ainta neirumu nyãse timaa aintaukuawa maataa aintaumunya. Asui aintauyuka surti aintauyupartiri arama irupa rese.

³⁵Asui kuaita miraita aintaupuamu suaki aintaumaa. Kuaita yuiri serakuenawaita aintaukasuari sese, aintaunyee: —Umukaturu amuita kuiri pexari uyumukaturu aepawate Kristu rame ae kua Deus uparawakawaa.

³⁶Asui kuaita suraraita yuiri aintaukasuari sese, asui aintauri aintaururi ixupe vinagri uu arama, asui aintaunyee:

³⁷—Judewita ruixawa rame inde reyumukaturu indepawate.

³⁸Asui aintaumuyari iarupi aintaumpinimawaa maa resewarataa aintauyuká ae, yawe aintaumpinima, aete judewita ruixawa ae.

³⁹Asui yepe puxuwerawa aintaumuyariwaa kurusa rese umbeu puxi sese unyee: —Maitaa umbaa sã Kristu inde? Ape reyumukaturu indepawate yande yuiri.

⁴⁰Asui kua amu aintaumuyariwaa unyee ixupe: —Maitaa tiserá resikie Deus sui, nyãse repurara reiku iyawe?

⁴¹Maa yande yapurara yamunya resewara puxuwera, maa kua apigawa timaa nungara umunya puxuwera.

⁴²Asui unyee Jesus supe: —Remanduari ixe aintaruixawa rame kuri inde.

⁴³Asui Jesus unyee ixupe: —Supiwa hambeu inde arama uyi ara reiku seirumu paraizu kiti.

⁴⁴Asui kuaji yandara rame kurasi pitunawasu kua kurasi, asui pitunawasu ae ate tres ura rame.

⁴⁵Asui kua panu aintaumuyariwaa templu rukena upe usuruka iwate sui piterupi simutara ate supita kiti.

⁴⁶Asui Jesus usasemu kirimbawa unyee: —Inde sepaya haxari neipu upe seanga. Asui umbeu rire yawe umanu.

⁴⁷Asui kua suraraita kapitão umaa irumu kua umaawaa asui umee purangawaa Deus supe unyee: —Supiwa purangawaa kua apigawa.

⁴⁸Asui panye kuaita miraita uyumuatiriwaita aintaumaa arama, aintaumaa irumu kua aintaumaawaa aintauyuiri isui, sasiyara ainta aintaunupa aintaputia.

⁴⁹Asui panye kuaita Jesus ukunyeseriwaita kunyaita yuiri uriwaita irumu Galileya sui aintaupuamu aintaumaa apekatu suintu.

⁵⁰Asui yepe serakuenawaa purangawaa tiwa umunya puxuwera sera Juze.

⁵¹Timaa uajudari ainta amuita serakuenawaita kua aintaumunyawaa, Arimateia suiwara ae judewita retama, aete yuiri usaru miraita ruixawa arama kua Deus.

⁵²Usu Pilatu ipiri upurandu irumu Jesus ipira.

⁵³Asui umuye ipira kurusa sui, asui upupeka ae panu murutingawaa irumu, asui uxari ae aintaupikuĩwaa ita kuara upe tire yamaa amu ipira kuera ape.

⁵⁴Asui nyã ara aintauyumukaturu aintausaru arama festa sauru rundere.

⁵⁵Asui kuaita kunyaita uriwaita Jesus irumu Galileya sui aintausu irumu aintaumaa kua aintaupikuĩwaa ita kuara aintaumaa yuiri mayetaa uxari ipira kuera.

⁵⁶Asui aintauyuiri aintaumukaturu arama sakuenawaa pumada yuiri. Asui sauru rame aintaupitu maye Deus nyenga umbeuwaa yawe.