Read Nhengatu Luka 24 Bible Online

Luka 24 - Nhengatu bible

Luka 24

¹Asui mitu rame kuemaite aintausu ita kuara kiti aintaurasu kua sakuenawaa aintaumukaturuwaa.

²Asui aintauwasemu apekatuana kua ita uyenu ita kuara sui.

³Maa aintauwike irumu ita kuara upe timaa aintauwasemu Jesus ipira kuera.

⁴Asui sasiyara ainta sesewara, asui aintauri aintapiri mukuĩ apigawaita kirimbawa aintarupa umuturi.

⁵Asui aintausikie asui aintauyawika aintaumaa iwi kiti, asui kuaita apigawaita aintaunyee ainta supe: —Marantaa pesikari kua upakawaa umanuwaita piterupi?

⁶Tiana yamaa ae ike nyãse upuamuana. Pemanduari mayetaa umbeu penye arama Galileya upe ramere penye.

⁷Umbeu: —Aintaurikute aintauxari puxuwerawaita ipu upe kua usemuwaa umaa kua ara asui aintaurikute aintaunupa uyari kurusa rese asui musapiri ara rire urikute upuamu.

⁸Asui aintaumanduari kua umbeuwaa.

⁹Asui aintauyuiri ita kuara sui aintaumbeu ainta supe panye kuaita unziwaita panye aintarumuaraita supe yuiri.

¹⁰Aintate Maria Madalena, Juana yuiri, Maria yuiri kua Tiagu imaya, kuaita yuiri amuita kunyaita umbeuwaita panye kua aintaumaawaa ainta supe arama kuaita apustuluita.

¹¹Maa aintaumanduari retentuwaa aintaumbeuwaa asui tiaintauruyari aintanyenga.

¹²Asui Pedru upuamu uyana ita kuara kiti. Asui usika uyawika umaa ita kuara upe maa nẽ maa nungara umaa ape anyunte kua fazenda murutingawaa, asui uyuiri uka kiti umanduari sese kua maitaa usasawa.

¹³Asui nyã ara upete mukuĩ aintasuiwaraita aintausu amu tetama kiti sera Emaus, kuaji dezi kilumetru iapekatusawa.

¹⁴Asui aintausuwaa rupi aintaupurungita sese kua maitaa usasawawaa.

¹⁵Asui aintaupurungita pukusaware Jesus uri aintapiri uwata aintairumu.

¹⁶Maa timaa Jesus uxari aintaresa umaa ae puranga ape tiaintaukuawa awataa ae.

¹⁷Asui Jesus upurandu ainta: —Awa resetaa pepurungita pesuwaa rupi? Asui aintausika aintaupuamu sasiyara ainta.

¹⁸Asui yepe serawaa Kleupa usuaxara: —Unyee: —Maitaa yepenyuwaa inde reyuiriwaa remaa Jeruzalẽ kiti, tiwa rekuawa maitaa kua usasawawaa kuiri?

¹⁹Asui unyee ainta supe: —Awataa ae? Asui aintaunyee ixupe: —Sese kua Jesus Nazare suiwara, kua apigawa utitikawaa ae, kirimbawa umunyawaita umbuewaita yuiri Deus umaa miraita umaa yuiri.

²⁰Asui kuaita saserdutita ruixawaita yaneruixawaita yuiri aintauxari aintauyuká ae kurusa rese.

²¹Maa yande yasaru uyurawa arama Israel. Asui kuiri urikuana musapiri ara mayetaa usasawa rire.

²²Asui yepeyepe kunyaita yanesuiwaraita aintausu kuemaite ita kuara kiti,

²³Asui timaa aintauwasemu ipira kuera, maa aintauyuiri aintaumbeu aintaumaa anjuita aintaumbeu ainta supe Jesus upakate.

²⁴Asui yepeyepe yanesuiwara usu ita kuara kiti asui aintaumaa supiwa aintaumbeuwaa kuaita kunyaita, maa tiaintaumaa ae.

²⁵Asui Jesus unyee ainta supe: —Penye tiwaita ukuawa penye santawaita pepia peruyari arama panye aintaumbeuwaa kuaita utitikawaita.

²⁶Maitaa tiserá Kristu urikute upurara uwike arama igluria kiti?

²⁷Asui uyupiru umbeu ainta supe maitaa aintaumpinima kuxima panye Muize nyenga panye aintanyenga yuiri kuaita utitikawaita.

²⁸Asui aintauri kuayentu tendawa ruaki aintausu ipiri asui uxari aintaumanduari usu xingare.

²⁹Maa aintausaisu usu, aintaunyee ixupe: —Karukana yande repita yaneirumu. Asui uwike aintairumu uka kiti.

³⁰Asui uwapika irumu meza ruaki aintairumu upisika yepe pão uabensuari ae asui umpena ae umee ainta supe ae.

³¹Asui aintaresa uyupirariana asui aintaukunyeseri ae, asui ukanyemu aintaresa sui.

³²Asui aintauyupurungita aintapawa, aintaunyee: —Maitaa tiserá saku yanepia umbeuwaa irumu yande arama pee rupi panye aintaumpinimawaa kuxima?

³³Asui nyã urate aintauyuiri Jeruzalẽ kiti aintauwasemu kuaita unziwaita aintauyumuatiri amuita irumu.

³⁴Asui kuaita siyawaita aintaumbeu: —Yaneruixawa upuamuana asui uxari Simão umaa ae.

³⁵Asui kuaita mukuĩwaita aintaumbeu panye kua umunyawaa pee rupi mayetaa yuiri aintaukunyeseri arama ae umpena irumu pão.

³⁶Asui aintaupurungita pukusaware sese aramete Jesus upuamu aintapiterupi unyee ainta supe: —Timaarese penye.

³⁷Asui aintaakayemu aintaumaa aintausikie turusu isui nyãse aintaumanduari aintaumaa yepe anga kuera.

³⁸Asui unyee ainta supe: —Marantaa pesikie? Marantaa mukuĩ pemanduarisawa?

³⁹Pemaa seipu seipi yuiri pekuawa arama ixete kua, asui pepisika pesaã ixe pekuawa arama kuri ixete kua, nyãse yepe anga kuera timaa uriku sukuera timaa yuiri ikãwera maye pemaa harikuwaa yawe.

⁴⁰Asui umbeu irumu kua inyenga umukame aintaumaa ipu ipi yuiri.

⁴¹Asui suuri resewara ainta timaa aintauruyari inyenga aete ae, aintaakayemu yuiri aintaumaa, asui unyee ainta supe: —Maitaa aikuete hambau arama?

⁴²Asui aintaumee ixupe arama pirá mixiri.

⁴³Asui umbau aintaumaa arama panye.

⁴⁴Asui Jesus unyee ainta supe: —Aete senyenga hambeuwaa penye arama haiku rame kuerare peirumu, nyãse harikute hamunya panye kua aintaumpinimawaa serese Muize inyenga upe aintanyenga upe yuiri kuaita utitikawaita Salmu upe yuiri.

⁴⁵Asui upirari aintaumanduariwaa aintaukuawa arama panye kua aintaumpinimawaa kuxima.

⁴⁶Asui unyee ainta supe: —Nyãse aintaumpinima kuera urikute upurara kua Kristu asui urikute upuamu manusawa sui musapiri ara rire.

⁴⁷Asui aintaurikute aintaumbue sera rese panye miraita sasiyara arama aintaumanduari aintapekadu Deus umburi arama aintasui ae, aintaurikute aintauyupiru Jeruzalẽ kiti.

⁴⁸Penyete kuri pembeu testemunyu sese kua.

⁴⁹Asui hamundu kuri penye arama kua sepaya umbeuwaa. Peiku kuri tetama upe ate uwari kuri perese kua ukuawasawa iwate sui.

⁵⁰Asui urasu ainta Betania kiti asui usupiri ipu uabensuari ainta.

⁵¹Asui uabensuari irumu ainta usu iwaka kiti.

⁵²Asui aintaumee ixupe arama purangawaa, asui aintauyuiri Jeruzalẽ kiti suuri aintapia turusu.

⁵³Asui aintauiku templu upe yawewarawate aintaumee purangawaa Deus supe.