Read Nhengatu Luka 4 Bible Online

Luka 4 - Nhengatu bible

Luka 4

¹Asui teresemu Jesus Espiritu Santu irumu uyuiri Jurdão sui, asui Espiritu urasu ae kampu kiti.

²Asui kuarenta ara pituna yuiri Yurupari uputari uganani ae, asui nyã kuarenta ara timaa umbau asui arirewara sasi ixupe yumãsi.

³Asui Yurupari umbeu ixupe: —Deus raira rame inde remuyereu inde arama kua ita pão arama.

⁴Maa Jesus umbeu ixupe: —Yawe aintaumpinima kuxima, tikuri sikue kuaita miraita pão resewarantu.

⁵Asui Yurupari usupiri ae iwate kiti umukame umaa arama yepe viaji kutara panye tuixawaita rendawa aintamiraita yuiri panye mundu upe.

⁶Asui Yurupari unyee ixupe: —Haxari kuri aintaruixawa arama inde haxari kuri inde arama panye aintamaa purangawaa nyãse seyaraita ainta, asui hamee kuri ixupe ae awa haputariwaa.

⁷Neyara kuri ainta panye remunya rame ixe arama benditu.

⁸Maa Jesus usuaxara ae umbeu ixupe: —Kuxima aintaumpinima, rerikute remunya benditu neruixawa Deus supe, rerikute repuraki ixupenyu panye sui.

⁹Asui urasu ae, Jeruzalẽ kiti uxari upuamu templu rakapira rese asui umbeu ixupe: —Deus raira rame inde repuri templu sui,

¹⁰Nyãse kuxima aintaumpinima, uxari kuri ianjuita aintausaru inde.

¹¹Aintaumukaturu kuri inde aintaipu irumu yawaite renupa neipi ita rese.

¹²Asui Jesus usuaxara, umbeu ixupe: —Kuxima aintaumbeu yuiri, teresikari reganani neruixawa Deus.

¹³Asui Yurupari umbawa rire uputari uganani ae panye ugananisawa irumu uyuiri isui ate amu ara kuri.

¹⁴Asui Jesus uyuiri Galileya kiti Espiritu ukuawasawa irumu, asui sesewara usika aintapiri panye tetama kiti.

¹⁵Asui umbue ainta sinaguga upe, asui panye aintaumbeu purangawaa sese.

¹⁶Asui usu Nazare kiti mame uyukiriariwaa, asui sauru rame uwike sinaguga upe kuaye umunyawerawaa yawe, asui upuamu uleri arama.

¹⁷Asui aintaumee ixupe ilivru kua utitikawaa Izaia, asui upirari irumu kua livru uwasemu kua umpinimawaa,

¹⁸Yaneruixawa espiritu uiku serese, nyãse uxari hambeu kua nyenga purangawaa ainta supe kuaita pirasuawaita, umundu ixe hambeu arama ainta supe kuaita prezuwaita uyurawa kuri ainta, haxari arama aintaumaa kuaita sesaimawaita, hayurawa arama kuaita upurarawaita.

¹⁹Hambeu arama ainta usikana yaneruixawa rangawa umunya arama turusu purangawaa.

²⁰Asui umusikindawa rire kua livru umuyuiri ae ixupe kua uajudariwaa ae, asui uwapika asui panye sinaguga upewaita aintaumaa ixupe.

²¹Asui Jesus umbeu ainta supe: —Uyi ara hamunya kuaye kua inyenga umbeuwaa yawe pesenduwaa upe muiri penye.

²²Asui aintaumbeu purangawaa sese asui aintaakayemu aintausendu kua inyenga purangawaa usemuwaa iyuru sui, asui aintaupurandu: —Maitaa tiserá Juze raira kua?

²³Asui Jesus unyee ainta supe: —Hamanduari pembeu kuri ixe arama kua nyenga, inde umpusangasara reyumpusanga indepawate, panye kua yasenduwaa remunya Kafarnaum upe remunya yuiri kuri nerendawa upe.

²⁴Asui umbeu xinga ainta supe: —Supiwa hambeu penye arama, kuaita utitikawaita tiaintausuanti ainta puranga aintarendawa upe.

²⁵Supiwa hambeu penye arama siya kuera viuvaita Israel upe Elia tempu rame iwaka uyumusikindawa musapiri akayu seis yasi yuiri watari rame aintaumbau arama panye kua mundu upe.

²⁶Maa timaa Elia usu aintapiri yepenyute usuwaa ipiri kua viuva Sarepita Sidum upewara.

²⁷Siya kuera yuiri lepruzuita Israel upe itempu rame kua utitikawaa Elizeu, maa nẽ yepe aintasuiwara ikatu isui kua Naamã Siria suiwara.

²⁸Asui aintaipiaiwa kuaita uikuwaita sinaguga upe kuaita usenduwaita kua inyenga.

²⁹Asui aintaupuamu aintaumburi ae aintarendawa sui, asui aintaurasu ae iwitera rese aintaretama uikuwaa upe aintaumburi arama ae iwitera sui tiipi kiti.

³⁰Maa Jesus usu aintapitera sui uyuiri arama aintasui.

³¹Asui usu Kafarnaum kiti kua tetama Galileya upewaa asui umbue ainta sauru rame.

³²Asui aintaakayemu aintausendu inyenga umbuewaa nyãse upurungita ukuawawaa yawe.

³³Ape sinaguga upe yepe apigawa urikuwaa yepe demuniu ikiawaa ipia upe asui usasemu kirimbawa.

³⁴Maataa reputari yaneirumu inde Jesus Nazare suiwara? Maitaa reyuiri remukanyemu yande? Hakuawate indete kua purangawaa Deus suiwara.

³⁵Maa Jesus umukiriri ae umbeu ixupe: —Rekiririntu inde, resemu isui kua apigawa, asui kua demuniu umburi uwari kua apigawa iwi upe aintapiterupi panye, asui usemu isui tiana umunya ixupe puxi.

³⁶Ape panye aintaakayemu aintaumaa, asui aintauyumbeu aintapawa: —Maataa kua inyenga? Nyãse kirimbawa umundu kuaita demuniu ikiawaita asui aintausemu.

³⁷Asui sesewara usika aintaretama kiti panye suakintuwaita.

³⁸Asui usemu sinaguga sui usu Simão ruka kiti. Ape imãsi uiku kua Simão sugra uriku takua turusu, asui aintaupurandu ae sese.

³⁹Asui uyawika iarupi umpitu kua takua asui takua uxariana ae, asui aramete upuamu uajudari ainta.

⁴⁰Asui kurasi uwike irumu panye kuaita urikuwaita aintaanamaita imãsiwaita aintaurasu ainta ipiri, asui uxari ipu aintarese aintayaweyawe asui umukaturu ainta,

⁴¹Asui demuniwita yuiri aintausemu siyawaita sui, aintausasemu, aintaunyee: —Indete Deus raira. Maa Jesus umukiriri ainta nyãse aintaukuawa Kristu ae.

⁴²Asui kuemaite usu asui iyaraimawaa kiti, asui kuaita miraita siyawaita aintausikari ae asui aintausu suaki, asui aintaupurandu ae tiarama uxari ainta.

⁴³Maa umbeu ainta supe: —Harikute hambeu kua nyenga purangawaa sese mayetaa aintaruixawa arama kua Deus panye ainta supe kuaita amuita tetamaita yuiri, nyãse sesewara umundu ixe.

⁴⁴Asui umbue ainta sinaguga upe Judeya kiti.