Read Nhengatu Luka 5 Bible Online

Luka 5 - Nhengatu bible

Luka 5

¹Asui kuaita miraita siyawaita aintaumusuaki ae aintausendu arama Deus inyenga, uiku lagu Genezare rimbiwa kiti.

²Umaa mukuĩ igara kuaita upisaitikawaita ainta usemuwaa aintaigara sui aintaumuyasuka aintaapisa.

³Asui uwiye irumu yepe igara upe Simão iyara upurandu ae usu arama kuayentu praya sui, asui uwapika igara upe umbeu kuaita miraita siyawaita.

⁴Asui upurungitapawa rire umbeu Simão supe: —Resu lagu pitera kiti asui pemburi pepisa.

⁵Simão usuaxara ae unyee: —Inde umbuewaa, pituna pukusawa yapisaitika maa nẽ maa nungara yawasemu, maa rembeuwaa resewara hamburi kuri sepisa.

⁶Asui aintaumunya kuaye umbeuwaa yawe, aintauwasemu siya pirá yawaiteana usuruka aintapisa.

⁷Asui aintausenui aintaipu irumu aintarumuaraita amu igara upewaita aintauri arama aintawajudari arama ainta, asui aintausu, asui aintaumuteresemu mukuĩ igara yawaiteana aintausu tiipi kiti.

⁸Asui Simão Pedru umaa irumu yawewaa usu uyawika Jesus ipi ruaki unyee: —Inde seruixawa, purangate resu sesui nyãse puxuwerawa ixe.

⁹Nyãse iakayemu umaa panye irumuwaita yuiri sesewara kuaita siyawaita pirá aintaupisikawaa,

¹⁰Aintaakayemu yuiri panye kuaita Tiagu Juão yuiri kuaita Zebedeu rairaita nyãse aintarumuaraita ainta. Asui Jesus umbeu Simão supe: —Teresikie kuiri indete resu arama repisaitika apigawaita.

¹¹Asui aintaumuyari aintaigara praya rese, aintauxari panye maa asui aintausu sakakuera.

¹²Asui uiku ramere yepe sidadi kiti uri ipiri yepe urikuwaa lepra panye ipira rese, asui umaa irumu Jesus uyawika ate iwi kiti upurandu ae sasisawa rupite: —Inde seruixawa, reputari rame repuderi rexari ikiaima ixe.

¹³Asui Jesus usupiri ipu upisika ae unyee ixupe: —Haputari ikiaimawaa inde, asui aramete ukanyemu panye ilepra isui.

¹⁴Asui Jesus umundu tiarama umbeu sesewara amuita supe, asui unyee ixupe: —Resuana, remukame saserduti umaa inde asui remee prezenti Deus supe nyãse umukaturuana inde kuaye Muize umbeuwaa yawe aintaukuawa arama nerese kuaita miraita.

¹⁵Maa turusu piri aintaumbeu sesewara, asui siyawaita miraita aintauyumuatiri ipiri aintausendu arama inyenga umburi arama yuiri aintasui mãsi.

¹⁶Maa Jesus uyuiri aintasui iyaraimawaa kiti upurandu arama Deus irumu.

¹⁷Asui yepe ara umbue ainta, apete yuiri farizewita aintate yuiri kuaita umbuewaita kua nyenga kuximawara uriwaita aintaretama sui Galileya sui Judeya sui yuiri, Jeruzalẽ sui yuiri. Asui yaneruixawa Deus ukuawasawa uiku kirimbawa sese umukaturu arama ainta.

¹⁸Asui aintauri yepeyepe apigawaita aintaururi yepe imembekawaa ipira ikama upe, aintauputari aintauxari ae Jesus runde sui.

¹⁹Asui tiaintauwasemu aintauwike arama uka kiti miraita siyawaita resewara, asui aintauyupiri uka ara sui aintaumukuara arama ape aintaumuye arama kua imembekawaa Jesus runde sui.

²⁰Jesus umaa irumu maye aintauruyari unyee ixupe kua imembekawaa: —Inde apigawa haperduari nesui nepekadu.

²¹Asui kuaita umpinimawaita farizewita yuiri aintauyupurungita aintapawa aintaunyee: —Awataa nyã? Nyãse umbeu puxi Deus rese. Awataa upuderi uperduari yanesui yanepekadu isui kua Deus?

²²Maa Jesus ukuawa aintaumanduariwaa umbeu ainta supe: —Maataa pemanduariwaa pepia upe?

²³Maataa iwasuima xinga hambeu ixupe, haperduari nepekadu nesui u hambeu repuamu rewata?

²⁴Pekuawa arama uriku ikirimbawasawa kua mundu upe kua unaseriwaa umaa kua ara uperduari arama pekadu, umbeu ixupe kua imembekawaa: —Hambeu inde repuamu repisika nekama resuana neruka kiti.

²⁵Asui aramete upuamu aintaumaa panye, asui upisika kua kama uyuiri suka kiti umee purangawaa Deus supe.

²⁶Asui aintaakayemu turusu aintaumaa panye, asui aintaumee purangawaa Deus supe, asui aintausikie aintaumaa, aintaumbeu: —Uyi ara yamaa tirewaa yamaa.

²⁷Asui arirewara usu asui umaa yepe publikanu sera Levi uwapika kuleturia ruka upe, asui umbeu ixupe: —Reyuiri serakakuera.

²⁸Asui upuamu uxari panye maa asui usu sakakuera.

²⁹Asui Levi umunya timbiu turusu Jesus supe suka upe, ape siya publikanuita amuita yuiri uwapika aintairumu meza ruaki.

³⁰Asui kuaita farizewita umpinimawaita ainta supe yuiri aintauyupurungita Jesus irumu umbuewaita rese, aintaupurandu ae: —Marantaa pembau peu yuiri aintairumu kuaita publikanu pekaduruita yuiri?

³¹Asui Jesus usuaxara ainta: —Kuaita ikatuwaita timaa arama aintausikari umpusangasara ainta maa kuaita mãsiweraita aintausikari ae.

³²Umbaa hayuiri hasenui purangawaita maa hayuiri hasenui kuaita pekaduruita sasiyara arama aintaumanduari aintapekadu.

³³Asui aintaumbeu ixupe: —Kuaita Juão umbuewaita farizewita umbuewaita yuiri siya viaji aintauyukuaku aintaupurandu Deus irumu yuiri, maa kuaita rembuewaita aintaumbau aintauu yuiri.

³⁴Asui Jesus umbeu ainta supe: —Maitaa pepuderi pexari aintauyukuaku kuaita usenuiwaita kazamentu upe uiku ramere aintairumu kua nuivu?

³⁵Asui yepe ara upe kuri aintauyuka aintasui kua nuivu arame kuri aintauyukuaku.

³⁶Asui umbeu ainta supe yepe inyenga umbuewaa rupiara ainta, unyee: —Tiawa upuderi umusuruka rupa pisasuwaa uremendari arama irupa kuximawara, yawaite umusuruka irupa pisasuwaa, asui kua remendu pisasuwaa tipuranga uiku sese kua irupa kuximawara.

³⁷Tiyaxari vinyu pisasuwaa siru kuximawarawaa upe uvelya pirera nungara nyãse kua vinyu pisasuwaa umusuruka siru kuximawara asui uyusena kua vinyu asui ukanyemu siru yuiri.

³⁸Maa yarikute yaxari vinyu pisasuwaa siru pisasuwaa upe uvelya pirera nungara.

³⁹Tiawa uputari uu kua vinyu pisasuwaa, uu rire kua vinyu kuximawara. Nyãse unyee: —Puranga piriwaa kua vinyu kuximawara.