Read Nhengatu Luka 6 Bible Online

Luka 6 - Nhengatu bible

Luka 6

¹Asui sauru rame Jesus usasawa aintakupixawa piterupi asui umbuewaita aintaumpena awati aintaumbau arama, asui aintaipu irumu aintaupuu isui sanya.

²Asui yepeyepe farizewita umbeu ainta supe: —Marantaa pemunya kua tiwa puranga yamunya sauru rame?

³Asui Jesus umbeu ainta supe: —Maitaa tiserá peleri Davi rese kua umunyawaa sasi rame yumãsi ixupe sumuaraita irumu?

⁴Uwike Deus ruka upe upisika kua pão aintaumeewaa Deus supe asui umee ae ainta supe sumuaraita kua pão tiwa yapuderi yambau anyunte kuaita saserdutita upuderi umbau ae.

⁵Asui umbeu xinga ainta supe: —Sauru ruixawa kua unaseriwaa umaa ara.

⁶Asui amu sauru rame yuiri uwike sinaguga upe umbue arama, ape yepe apigawa iangaiwara ipu katusawa sui.

⁷Asui kuaita umpinimawaita farizewita yuiri aintaumaa ixupe sã umukaturu sauru rame nyãse aintauputari aintaumbeu puxi sese.

⁸Maa Jesus ukuawa aintaumanduariwaa asui umbeu ixupe kua apigawa iangaiwarawaa ipu: —Repuamu reyuiri kua kiti. Asui usu upuamu akiti.

⁹Asui Jesus umbeu ainta supe: —Maitaa pemanduari, maitaa yapuderi yamunya puranga sauru rame u yamunya puxi yuiri? Maitaa yapuderi yamukaturu yepe tiarama umanu u yapuderi yaxari umanu sauru rame?

¹⁰Asui umaa ainta supe panye, asui umbeu ixupe: —Resupiri neipu, asui usupiri ae asui purangana ipu.

¹¹Maa aintaipiaiwa ainta asui aintauyupurungita aintapawa mayetaa aintaumunya arama Jesus supe.

¹²Asui Jesus usu iwitera kiti upurandu arama ipaya irumu, asui pituna pukusawa uiku ape umbeu Deus.

¹³Asui kuemaite usenui ipiri kuaita umbuewaita asui uparawaka aintasuiwara duziwaita, asui uxari aintauseruka ainta iapustuluita,

¹⁴Simão uxariwaa sera rakapira Pedru, asui imu Andre, asui Tiagu Juão yuiri, asui Filipe Bartulumeu yuiri,

¹⁵Asui Mateu Tume yuiri, asui Tiagu Alfeu raira, asui Simão aintauserukawaa Zelute,

¹⁶Asui Juda Tiagu raira, asui Juda Iskariute kua uentregariwaa Jesus.

¹⁷Asui uwiye aintairumu asui upuamu iwi ipewawaa upe ape siya umbuewaita siya miraita yuiri uriwaita panye Judeya sui Jeruzalẽ sui yuiri, lagu turusuwaa rimbiwa suiwaita yuiri Tiru sui Sidum sui yuiri.

¹⁸Aintauri aintausendu arama ixupe aintauxari arama yuiri umukaturu ainta mãsi sui, kuaita yuiri upurarawaita demuniu ikiawaita resewara umukaturu ainta.

¹⁹Asui panye kuaita miraita siyawaita aintauputari aintaumuyari aintaipu sese, nyãse ukuawasawa usemu isui asui umukaturu ainta panye.

²⁰Asui umaa umbuewaita supe unyee ainta supe: —Suuri kuri penye pirasuawaita nyãse peyara kuri panye kua yaneruixawa Deus iyaraita.

²¹Suuri kuri penye pepurarawaita yumãsi kuiri nyãse peapu kuri penye, suuri kuri penye uyaxiuwaita kuiri nyãse suuri kuri pepia.

²²Suuri kuri penye puxi rame aintaumaa penye, aintaumutirika rame penye aintasui, aintaukasuari rame penye, puxi rame aintaumaa penye sesewara kua unaseriwaa umaa kua ara.

²³Pexari suuri pepia nyã ara upe kuri pepupuri suuriwaa irumu, nyãse perikuana turusu purangawaa iwaka kiti, nyãse yawe kuera aintaramunyaita aintaumunya ainta supe kuaita utitikawaita kuera.

²⁴Maa puxuwerawa uri kuri perese penye rikuwaita nyãse perikuanate panye purangawaa peputariwaa kuiri.

²⁵Puxuwerawa uri kuri perese penye peapuwaita kuiri nyãse yepe ara sasi kuri penye arama yumãsi. Puxuwerawa uri kuri perese penye upukáwaita kuiri nyãse sasiyara kuri penye peyaxiu kuri.

²⁶Puxuwerawa uri kuri perese aintaumbeu rame purangawaa peresewara panye ainta nyãse yawete aintaumunya ainta supe kuaita utitikawaita ugananiwaita.

²⁷Maa hambeu penye arama penye pesenduwaita ixe arama, pegustari kuaita peruanyanaita, pemunya puranga ainta supe kuaita umaawaita puxi penye arama.

²⁸Pembeu puranga aintarese kuaita umbeuwaita puxi perese, pepurandu Deus irumu aintarese kuaita ugananiwaita perese.

²⁹Kua usuapetekawaa inde neratipi rese rexari unupa suaxara sui yuiri, kua uputariwaa uyuka nesui nepupekawa rexari yuiri ixupe nekamixa.

³⁰Rexari ainta supe kuaita upuranduwaita neirumu, asui kua urasuwaa nesui nemaa terepurandu umuyuiri arama inde arama ae,

³¹Kuaye peputariwaa yawe apigawaita umunya penye arama yawete yuiri pemunya ainta supe.

³²Pegustari rame kuaita ugustariwaita penye, maataa kuri periku sikuyara? Nyãse yawete yuiri kuaita pekaduruita aintaugustari kuaita ugustariwaita ainta.

³³Pemunya rame puranga ainta supe kuaita umunyawaita penye arama puranga, maataa kuri periku sikuyara? Yawete yuiri aintaumunya kuaita pekaduruita.

³⁴Pepuru rame aintaurasu arama pemaa kuaita umuyuiriwaita ae maataa kuri periku sikuyara? Yawete yuiri kuaita pekaduruita aintaupuru aintaurasu arama aintamaa kuaita umuyuiriwaita ainta supe ae.

³⁵Ape pegustari kuaita peruanyanaita, pemunya puranga pepuru ainta supe pemaa tepesaru sikuyara pepuruwaa aintaurasu, ape kuri turusu periku kuri purangawaa, ape kuri tairaita penye kua kirimbawa piriwaa, nyãse umunya ainta supe puranga kuaita tiwaita umee purangawaa ixupe kuaita yuiri puxuwerawaita.

³⁶Pirasuawaa pemaa amuita kuaye pirasuawaa yawe umaa penye kua pepaya.

³⁷Tepembeu amuita resewara tiarama kuri aintaumbeu peresewara, tepekundenari amuita tiarama kuri aintaukundenari penye, peperduari peirumu ainta aintauperduari arama kuri aintairumu penye.

³⁸Pemee ainta supe arama kuaita amuita asui kuri aintaumee penye arama aintaumediri penye arama puranga santa teresemu usasawa xinga, yawete yuiri kuri aintauxari penye arama muiri ainta.

³⁹Asui umbeu ainta supe yepe inyenga umbuewaa rupiara ainta, unyee: —Maitaa yepe sesaimawaa upuderi urasu amu sesaimawaa. Maitaa tiaintauwari tiipiwaa kiti kuaita mukuĩwaita.

⁴⁰Kua umbuewaa timaa uiku iyara kiti piri isui kua umbuesarawaa ae maa panye kuaita uyumbuewaita puranga aintauiku kuri iyawe.

⁴¹Marantaa remaa mirá kuairawaa sesa upe kua nemu tipukusawa remaa kua mirá turusuwaa uikuwaa neresa upe?

⁴²Maitaa repuderi rembeu nemu supe, semu, rexari hayuka mirá kuairawaa neresa sui, tipukusawa remaa kua mirá turusuwaa uikuwaa neresa upe. Inde retentuwaa, reyupiru reyuka mirá turusuwaa neresa sui remaa arama puranga kua mirá kuairawaa uikuwaa nemu resa upe.

⁴³Tiyamaa mirá purangawaa uxariwaa iya puxuwerawa, tiyuiri yamaa mirá puxuwerawa uxariwaa iya purangawaa.

⁴⁴Nyãse aintaiya irumu yakunyeseri kuaita mirá. Tiyayuka figu mirá sui kua urikuwaa yuu, tiyuiri yayuka uva kukuna sui.

⁴⁵Kua apigawa purangawaa uyuka purangawaa ipia purangawaa sui, asui kua apigawa puxuwerawa uyuka puxuwerawa ipia puxuwerawa sui, nyãse peyuru umusemu kua umuteresemuwaa pepia.

⁴⁶Marantaa pembeu ixe arama, seruixawa, seruixawa, tipukusawa pemunya kua hambeuwaa?

⁴⁷Hamukame kuri pemaa awa yawe panye kuaita uriwaita sepiri aintausendu senyenga asui aintauruyari ae,

⁴⁸Aintate iyawe kua yepe umunyawaa suka arama upikuĩ tiipi umpuamu arama esteyu ate ita rese, asui parana uwike suka kiti maa timaa upuderi umburi uwari ae nyãse santa umunya kua uka.

⁴⁹Maa kua usenduwaa senyenga asui timaa umunya kuaye hambeuwaa yawe aete iyawe kua yepe apigawa umunyawaa suka arama timaa upikuĩ tiipi iwi umpuamu arama esteyu, asui parana uwike suka kiti asui kutara uwari kua uka asui puxuwerana ae panye.