Read Nhengatu Luka 9 Bible Online

Luka 9 - Nhengatu bible

Luka 9

¹Asui Jesus usenui rire ipiri kuaita duziwaita uxari ainta supe ukuawasawa ikirimbawasawa yuiri aintaumburi arama demuniwita aintaumukaturu arama mãsiweraita yuiri.

²Umundu yuiri aintausu aintaumbue arama sese kua Deus imiraita arama ainta, aintaumukaturu yuiri kuaita imãsiwaita.

³Asui umbeu ainta supe: —Timaa nungara perasu peviaji rupiara, tiyuiri pebatuna, timaa yuiri pesaku tiyuiri pão, nẽ dinyeru yuiri, timaa kuri pepuderi perasu mukuĩ pepupekawa.

⁴Mayewaa uka upe pewike ape kuri peiku ate mairame peyuiri isui kua tendawa.

⁵Mame rame tiaintausuanti penye peyuiri rame isui kua tendawa pepiri peipi sui iwi aintaukuawa arama kuri aintarese.

⁶Asui aintausu isui, asui aintausu panye tetama kiti aintaumbeu ainta supe kua nyenga purangawaa asui aintaumukaturu imãsiwaita panye tetama upe.

⁷Asui aintaruixawa Erudi usendu sesewara panye kua usasawawaa asui tiukuawa mayetaa umanduari, nyãse amu miraita umbeu Juão uyuiri upaka manusawa sui.

⁸Yepeyepe umbeu Elia kua usikawaa, amuita umbeu: —Usemuana yepe utitikawaa ambiraita suiwara.

⁹Maa Erudi umbeu: —Kuxima hamundu aintaumunuka Juão akanga, ape awataa nyã hasenduwaa sese yawewaa? Asui kirimbawa uputari umaa ae.

¹⁰Asui aintauyuiri irumu kuaita apustuluita aintaumbeu Jesus supe panye kua aintaumunyawaa. Asui urasu aintairumu usu miraita sui yepe tetama kiti serawaa Betisaida.

¹¹Asui aintausendu irumu sesewara kuaita miraita siyawaita aintausu sakakuera. Asui usuanti ainta, asui umbeu ainta supe Deus rese maye imiraita arama ainta asui umukaturu kuaita uputariwaita ikatu ainta mãsi sui.

¹²Asui karukana ainta. Asui aintauri ipiri kuaita duziwaita asui aintaumbeu ixupe: —Rexari aintauyuiri kuaita siyawaita tetama kiti kuayentuwaa kampu upe aintauwasemu arama aintaumbau aintaukiri arama yuiri nyãse iyaraimawaa upe kua mame yaikuwaa.

¹³Maa umbeu ainta supe: —Penyete pexari aintaumbau arama. Asui aintausuaxara: —Anyunte yariku sinku pão mukuĩ pirá yuiri tirame yasu yapiripana aintaumbau arama panye kuaita miraita.

¹⁴Nyãse aikue kuaji sinku mili apigawaita, asui umbeu umbuewaita supe, pexari sinkuentapawa aintauwapika.

¹⁵Asui aintaumunya kuaye umbeuwaa yawe, asui aintauxari aintauwapika muiri ainta.

¹⁶Asui upisika kuaita sinku pão mukuĩ pirá yuiri, asui umaa iwate kiti uabensuari ainta asui upartiri ainta asui uxari ainta umbuewaita supe aintaumee arama ainta supe kuaita miraita.

¹⁷Asui aintaumbau asui aintaapu muiri ainta. Asui aintaumuatiri aintaumbauwaa rimirera duzi sextu.

¹⁸Asui upuranduwaa uiku Deus irumu ipesua, irumute kuaita umbuewaita asui upurandu ainta: —Mayetaa aintaunyee serese kuaita siyawaita, awataa ixe?

¹⁹Asui aintausuaxara: —Juão Batista, maa amuita umbeu Elia, asui amuita umbeu usemuana yepe aintasuiwara kuaita utitikawaita ambira.

²⁰Asui umbeu ainta supe: —Penyetaa, maataa peseruka ixe? Asui Pedru usuaxara ae unyee: —Indete Kristu Deus suiwara.

²¹Maa umundu ainta tiarama aintaumbeu sesewara yawewaa.

²²Umbeu: —Kua unaseriwaa umaa kua ara urikute upurara turusu, urikute uxari aintaumburi ae kuaita tuyuweita kuaita yuiri saserdutita ruixawaita umpinimawaita yuiri, urikute uxari aintauyuká ae, asui musapiri ara rire uyuiri upaka kuri ae.

²³Asui umbeu ainta supe panye: —Yepe uputari rame usu serakakuera urikute uyuxari aepawate, asui muiri ara usupiri ikurusa usu arama serakakuera.

²⁴Maa kua uputariwaa uyumukaturu sikuesawa upepawa ukanyemu kuri isui ae, awa uxari ukanyemu sikuesawa seresewara uwasemu kuri sikuesawate.

²⁵Maataa kuri uriku sikuyara kua apigawa uganyariwaa panye kua mundu iyara asui ukanyemu u uyumuaiwa aepawate?

²⁶Awa kuri utiĩwaa seresewara senyenga resewara yuiri utiĩ kuri yuiri umaa ae kua unaseriwaa umaa kua ara uri rame kuri iwaka sui ipaya gluria irumu ianjuita purangawaita gluria irumu yuiri.

²⁷Supiwa hambeu penye arama, yepeyepe pesuiwara tikuri aintaumanu senundere aintaumaa imiraita arama ainta kua Deus.

²⁸Asui uitu ara umbuewaa rire kua inyenga urasu irumu Pedru Juão Tiagu yuiri yepe iwitera rese upurandu arama Deus.

²⁹Asui upuranduwaa upe uiku uyutrukari suwa asui irupa umuturi murutinga piri panye sui.

³⁰Asui mukuĩ apigawaita aintaupurungita irumu, aete kua Muize Elia yuiri.

³¹Aintayuiri aintaumuturi, aintaupurungita maye Jesus usu arama umanu Jeruzalẽ kiti.

³²Asui Pedru sumuaraita yuiri tipusi aintaresa maa timaa aintaukiri, asui aintaumaa Jesus umuturi kuaita mukuĩwaita yuiri irumuwaita.

³³Asui kuaita mukuĩwaita aintauyuiri irumu Jesus sui Pedru unyee ixupe: —Inde umbuesarawaa purangate yaiku ike, purangate yamunya musapiri baraka, yepe inde arama, yepe Muize supe yepe Elia supe, maa tiukuawa mayesawataa umbeuwaa.

³⁴Asui upurungita ramere uiku ae uri yepe nuvẽ umusikindawa ainta, asui aintausikie turusu katu aintauwike irumu nuvẽ piterupi.

³⁵Asui aintausendu yepe nyenga nuvẽ pitera sui umbeu: —Aete seraira haparawakawaa, pesendu ixupe arama.

³⁶Asui upurungita rire kua nyenga nuvẽ pitera sui Jesus upita yepenyu, asui nyã ara upe aintaukiririntu tiawa supe aintaumbeu kua aintaumaawaa.

³⁷Asui wirande kiti aintauwiye irumu iwitera sui aintauri Jesus ruaxara kuaita miraita siyawaita.

³⁸Asui yepe apigawa aintasuiwara usenui kirimbawa, unyee: —Inde umbuewaa, hapurandu inde reyuiri remaa seraira piri nyãse seraira yepenyuwaa ae.

³⁹Yepe demuniu upisika ae asui direpenti usasemu asui umburi uwari iwi upe asui uriri ipira rupi ate itiesawa usemu isui, asui iwasu uxari ae umpurarakari rire ae.

⁴⁰Asui hapurandu rembuewaita irumu aintaumburi arama ae maa tiaintaupuderi.

⁴¹Asui Jesus usuaxara ainta: —Penye miraita kuiriwaraita tiwaita uruyari tenyuntuwaita, muiri arataa haikure peirumu haaguentari aramare peirumu? Reruri ixe arama neraira.

⁴²Asui uri irumu kuayentu kua demuniu upisika ae umburi uwari iwi upe, umuriri ae, maa Jesus umundu kirimbawa kua demuniu ikiawaa, asui umukaturu kua taina asui uxari ipaya supe ae,

⁴³Asui aintaakayemu aintaumaa panye ainta sesewara kua Deus ukuawasawa purangawaa. Asui aintaakayemu irumu aintaumaa panye Jesus umunyawaita, sesewara unyee umbuewaita supe:

⁴⁴—Pemukaturu santa peapisa upe kua hambeuwaa, aintauxari kuri apigawaita ipu upe kua unaseriwaa umaa kua ara.

⁴⁵Maa tiaintaukuawa mayesawataa kuawaa, asui uyumimi aintasui ae yawaite ukuawa mayesawataa ae, asui aintausikie upurandu ae mayesawataa ae.

⁴⁶Asui aintauyupurungita aintapawa awataa aintasuiwara ukuawa piriwaa aintaara kiti panye.

⁴⁷Asui Jesus ukuawa irumu maye aintaumanduari aintapia upe upisika yepe taina uxari upuamu suaki.

⁴⁸Asui umbeu ainta supe: —Awa usuanti kua taina serera rese usuanti kuri yuiri ixe, awa usuanti ixe usuanti kuri yuiri kua umunduwaa ixe, nyãse kua aintawira kiti piriwaa aete kuri aintaara kitiwaa.

⁴⁹Asui Juão umbeu ixupe: —Inde umbuewaa, yamaa yepe apigawa umburi demuniwita nerera rupi, asui yasaisu umburi demuniu nyãse timaa usu yaneirumu nerakakuera.

⁵⁰Maa Jesus unyee ixupe: —Tepesaisu ae, awa tiumuruanyana penye perumuarate ae.

⁵¹Asui kuayentuana sangawa usu arama iwaka kiti kirimbawa uputari usu Jeruzalẽ kiti, asui umundu aintaumbeu sesewara senunde kiti.

⁵²Asui aintausu aintauwike yepe tetama kiti Samaria upewaa aintaumukaturu arama ixupe ukiri rendawa.

⁵³Maa tiaintausuanti ae nyãse aintaukuawa usu Jeruzalẽ kiti.

⁵⁴Asui Tiagu Juão yuiri aintaumaa irumu yawewaa aintaupurandu Jesus: —Yaneruixawa maitaa reputari yapurandu tata uwari iwaka sui usapi arama ainta?

⁵⁵Maa Jesus uyereu aintabanda kiti umukiriri ainta.

⁵⁶Asui aintausu amu tetama kiti.

⁵⁷Asui aintausuwaa aintauiku pee rupi yepe apigawa umbeu ixupe: —Hasu kuri nerakakuera maa kiti resu.

⁵⁸Maa Jesus unyee ixupe: —Kuaita paka aintaurikute aintaruka iwi upe, kuaita yuiri wirá mirita aintaurikute aintaninyu, maa kua unaseriwaa umaa kua ara tiuriku upituwaa rendawa.

⁵⁹Asui Jesus umbeu amu supe: —Reyuiri serakakuera. Maa usuaxara: —Rexarire hasu hasaru hamburi arama sepaya.

⁶⁰Asui umbeu ixupe: —Rexari kuaita umanuwaita aintaumburi kuaita aintarumuaraita umanuwaita, maa inde resu rembue sese kua Deus imiraita arama ainta.

⁶¹Asui amu umbeu ixupe: —Seruixawa, hasu kuri nerakakuera maa rexarire hasu hambeu seresewara serukapuraita.

⁶²Maa Jesus unyee ixupe: —Awa upuraki ixe arama uyereu rame umaa sakakuera kiti timaa pruntu ae imira arama ae kua Deus.