Read Nhengatu Juão 1 Bible Online

Juão 1 - Nhengatu bible

Juão 1

¹Ara uyupirungawa rundewara kua nyenga upakawaa, Deus irumuwara kua nyenga, Deus kua nyenga upakawaa.

²Deus irumuwara ae uyupirungawa rame.

³Aete umunya panye maa, tiyamaa maa tiwa umunya.

⁴Sikuesawa uiku irumu, asui kua sikuesawa aete apigawaita turi.

⁵Kua turi umuturi pitunawasu upe, asui kua pitunawasuwaa tiupuderi umuweu kua turi.

⁶Ape yepe apigawa Deus umunduwaa sera Juão.

⁷Uri kuaye umbeuwaa yawe umbeu arama sese kua turi asui sesewara aintauri panye aintauruyari arama inyenga.

⁸Timaa ae kua turi anyunte uri umbeu arama sese kua turi.

⁹Kua turi supiwa uriwaa kua mundu kiti umuturi aintapia kiti panye apigawaita.

¹⁰Uiku kua mundu upe, kua mundu umunyawaa, maa kuaita mundu puraita timaa aintaukunyeseri ae.

¹¹Uri aintapiri kuaita iyaraita, maa kuaita iyaraita timaa aintausuanti ae.

¹²Maa panye kuaita usuantiwaita ae kuaita uxariwaita aintapia sera rese uxari ainta supe arama ukuawasawa Deus rairaita arama ainta.

¹³Tiaintaunaseri tuwi irumu, timaa yuiri yanepira uputari resewara, timaa yuiri apigawaita uputari resewara, maa kuaye Deus uputariwaa yawe.

¹⁴Asui kua nyenga upakawaa uyereu apigawa arama ae asui uiku yanepiterupi, teresemu ae purangawaa irumu supiwa irumu yuiri, asui yamaa igluria yanepaya Deus umeewaa taira yepenyuwaa supe arama.

¹⁵Asui Juão umbeu sesewara unyee: —Aete kua hambeuwaa sese uriwaa serakakuera maa serundewara piri ae nyãse uiku serundere.

¹⁶Teresemu ae purangawaa irumu asui uxariana yande arama isuiwara, uxari yande arama grasa turusu piri.

¹⁷Nyãse Muize uxariana yande arama Deus nyenga kuximawara, asui Jesus Kristu uxari grasa inyenga supiwa yuiri.

¹⁸Tire awa umaa Deus, anyunte taira yepenyu uikuwaa yanepaya Deus ruaki uxari yakuawa sese.

¹⁹Aete Juão umbeuwaa ainta supe kuaita judewita aintaumundu irumu ipiri Jeruzalẽ sui saserdutita levitaita yuiri aintaupurandu ae: —Awataa inde?

²⁰Asui umbeu ainta supe tiuyumimi aintasui, umbeu: —Timaa Kristu ixe.

²¹Asui aintaupurandu ae: —Awataa inde? Maitaa indete será Elia? Asui unyee ainta supe: —Umbaa. Maitaa indete kua utitikawaa? Asui usuaxara ainta: —Umbaa.

²²Asui aintaunyee ixupe: —Rembeu yasendu awataa inde yambeu arama ainta supe kuaita umunduwaita yande. Maitaa rembeu neresewara?

²³Asui unyee ainta supe: —Ixete kua yepe nyenga usasemuwaa kampu upe, pemusatambika yaneruixawa rapee, maye umbeuwaa yawe kua utitikawaa sera Izaia.

²⁴Kuaita aintaumunduwaita ipiri farizewita suiwaraita ainta.

²⁵Asui aintaupurandu ae: —Marantaa rebatizari miraita tirame Kristu inde u tirame yuiri Elia inde u tirame yuiri inde kua utitikawaa?

²⁶Asui Juão unyee ainta supe: —Habatizari ii irumu, maa aikue yepe uikuwaa pepiterupi tiwa pekunyeseri.

²⁷Aete kua uriwaa serakakuera timaa purangawaa ixe hapuderi arama hayawika hayuka ipi sui isapatu.

²⁸Yawewaa usasawa Betania upe parana Jurdão ruaxara Juão ubatizariwaa ape.

²⁹Asui wirande kiti Juão umaa Jesus uri ipiri asui unyee: —Pemaa Deus kurderu, aete umburiwaa aintasui aintapekadu kuaita mundu puraita.

³⁰Aete kua hambeuwaa sese, uri serakakuera yepe apigawa serundewara piri ae nyãse uiku serundere.

³¹Timaa hakunyeseri ae serupi, maa sesewara hayuiri habatizari ii irumu uyukuawa arama Israelitaita supe.

³²Asui Juão umbeu: —Hamaate Espiritu uwiye iwaka sui sese maye pumba yawe asui uwapika sese.

³³Timaa hakunyeseri ae, maa aete kua umunduwaa ixe habatizari arama ii irumu umbeu ixe arama, awa rese remaa Espiritu uwiye aete kuri ubatizari arama Espiritu Santu irumu.

³⁴Asui supiwa hamaa ae, asui hambeute sesewara Deus raira ae.

³⁵Asui yepe ara rire Juão uiku yuiri aintairumu mukuĩ umbuewaita.

³⁶Asui umaa Jesus usasawa asui unyee ainta supe: —Pemaa Deus kurderu.

³⁷Asui kuaita mukuĩ umbuewaita aintausendu resewara umbeuwaa ape aintausu Jesus rakakuera.

³⁸Asui Jesus uyereu umaa aintauri sakakuera asui unyee ainta supe: —Maataa pesikari? Ape aintaunyee ixupe: —Seruixawa, mametaa reiku?

³⁹Asui usuaxara ainta: —Peyuiriana pemaa. Asui aintausu aintaumaa Jesus uikuwaa akiti, asui aintauiku irumu nyã ara nyãse karukana ainta.

⁴⁰Andre itainasawa kua Simão Pedru aete yepe aintasuiwara kuaita mukuĩwaita usenduwaita Juão umbeuwaa asui aintausu Jesus rakakuera.

⁴¹Asui uyupiru uwasemu imu Simão asui umbeu ixupe: —Yawasemu kua Mesia, yawesawa Kristu ae.

⁴²Asui urasu ae Jesus ipiri. Asui Jesus umaa ae unyee ixupe: —Indete Simão Juão raira, kuiri kuri haseruka inde Sefa, yawesawa Pedru.

⁴³Asui yepe ara rire Jesus usu putari Galileya kiti. Asui uwasemu Filipe asui unyee ixupe: —Reyuiriana serakakuera.

⁴⁴Betisaida suiwara kua Filipe aintarendawa kuaita Andre Pedru yuiri.

⁴⁵Asui Filipe uwasemu Natanael asui unyee ixupe: —Yawasemu kua Muize umpinimawaa sese nyenga kuximawara rupi kua aintaumbeuwaa sese yuiri kuaita utitikawaita, aete Jesus Juze raira Nazare suiwara.

⁴⁶Asui Natanael upurandu ae, unyee: —Maitaa purangawaa upuderi usemu Nazare sui? Asui Filipe unyee ixupe: —Reyuiri remaa.

⁴⁷Asui Jesus umaa Natanael uri ipiri asui umbeu sese: —Aete yepe Israewara tiwa uganani.

⁴⁸Asui Natanael unyee ixupe: —Maa suitaa rekunyeseri ixe? Asui Jesus unyee: —Senundere Filipe usenui inde hamaa rewapika mirá figera wirupi.

⁴⁹Asui Natanael usuaxara ae: —Indete rembuewaa, indete Deus raira, indete Israelitaita ruixawa.

⁵⁰Asui Jesus unyee ixupe: —Maitaa reruyari hambeu resewara inde arama hamaa inde mirá figera wirupi? Remaa kuri puranga piriwaa isui.

⁵¹Asui umbeu piri ixupe: —Supiwa hambeu inde arama remaa kuri iwaka uyupirari asui remaa kuri kuaita Deus anjuita aintauyupiri aintauwiye yuiri sese kua unaseriwaa umaa kua ara.