Read Nhengatu Juão 10 Bible Online

Juão 10 - Nhengatu bible

Juão 10

¹Supiwa hambeu penye arama: —Mundawasu kua uyupiriwaa uwike uvelya kurara kiti kua tiwa uwike kurara rukena rupi.

²Maa kua uwikewaa kurara rukena rupi aete kua usaruwaa uvelya.

³Asui kua usaruwaa kurara rukena upirari ixupe asui kuaita uvelyaita aintausendu inyenga, asui usenui kuaita uvelyaita aintarera rupi asui urasu ainta kurara sui.

⁴Asui urasu irumu panye iuvelyaita kurara sui usu aintarunde asui aintausu sakakuera nyãse aintaukunyeseri inyenga.

⁵Maa timaa aintausu sakakuera kua tiwa aintaukunyeseri, anyunte aintauyawawa isui nyãse tiaintaukunyeseri aintanyenga kuaita tiwaita aintaukunyeseri.

⁶Jesus umbeu ainta supe kua umbue aramawaa ipupe ainta maa tiaintaukuawa mayesawataa ae kua umbeuwaa ainta supe.

⁷Asui Jesus umbeu mukuĩsawa ainta supe, supiwa hambeu penye arama: —Ixete kua uvelyaita rukena.

⁸Panye kuaita uriwaita kuera serundere mundawasuita ainta asui kuaita uvelyaita timaa aintausendu ainta supe.

⁹Ixete kua ukena, awa kuri uwike seirumu uyumukaturu kuri, uwike kuri usemu kuri asui uwasemu kuri umbau aramawaa.

¹⁰Kua mundawasu uri umunda arama uyuká arama yuiri umuaiwa arama yuiri, maa ixe hayuiri haxari arama ainta supe sikuesawa turusuwaa.

¹¹Ixete kua usaruwaa purangawaa. Kua usaruwaa purangawaa uxari aintauyuká ae iuvelyaita resewara.

¹²Kua upurakiwaa timaa usaruwaa uvelya ae timaa iyaraita kuaita uvelyaita, umaa irumu uri kua yawarate asui uyawawa uxari kuaita uvelyaita asui kua yawarate upisika ainta asui umusãi ainta.

¹³Kua upurakiwaa uyawawa nyãse upurakiwaa ae, timaa arama ixupe kuaita uvelyaita.

¹⁴Ixete kua usaruwaa purangawaa, hakunyeseri kuaita seuvelyaita asui aintaukunyeserite ixe.

¹⁵Kuaye sepaya ukunyeseriwaa yawe ixe yawete yuiri hakunyeseri sepaya, asui haxari aintauyuká ixe seuvelyaita resewara.

¹⁶Hariku amuita uvelyaita tiwaita uiku ike kua kurara upe, harikute harasu aintayuiri asui aintausendu kuri senyenga. Asui kuri yepe bandute ainta yepenyute yuiri kua usaruwaa ainta.

¹⁷Sesewara sepaya ugustari ixe, nyãse haxari aintauyuká ixe hapaka aramate yuiri ixe.

¹⁸Tiawa uxari hamanu maa serimutara haxari aintauyuká ixe. Hapuderi haxari aintauyuká ixe, hapuderi yuiri hapaka ixe. Kuaye sepaya uxariwaa hamunya.

¹⁹Kua umbeuwaa uxari yuiri mukuĩ aintaumanduarisawa kuaita judewita.

²⁰Siya aintasuiwaraita aintaumbeu: —Uriku demuniu, yakangayawa ae, marantaa pesendu ixupe?

²¹Amuita unyee: —Tiumbeu kuaye yepe urikuwaa yawe demuniu, maitaa demuniu upuderi upirari aintaresa kuaita sesaimawaita?

²²Asui aintaumunya aintafesta serawaa dedikasão Jeruzalẽ upe.

²³Turusu rame parana. Asui Jesus uwata templu upe Salumão ikupiara upe.

²⁴Asui kuaita judewita aintauyumuatiri suaki, aintaunyee ixupe: —Mairametaa kuri rexari yakuawa awataa inde? Kristu rame maa inde rembeu yande arama satambika.

²⁵Asui Jesus usuaxara ainta, unyee: —Hambeuwana penye asui tiperuyari kua hambeuwaa, kua hamunyawaa sepaya rera rese aete kua umbeuwaa serese.

²⁶Maa tiperuyari ixe nyãse timaa seuvelyaita penye.

²⁷Seuvelyaita usendu senyenga, hakunyeseri ainta asui aintausu serakakuera.

²⁸Hamee ainta supe arama kua mundu nunkawaa upawa, tikuri mairame aintaukanyemu sesui, tiyuiri awa upuderi uyuka ainta seipu sui.

²⁹Kua sepaya uxariwaa ixe arama ainta kirimbawa piri ae aintasui panye, tiawa upuderi uyuka ainta sepaya ipu sui.

³⁰Yepewasute ixe sepaya irumu.

³¹Asui kuaita judewita aintaupisika yuiri itaita aintaumburi arama sese.

³²Asui Jesus unyee ainta supe: —Hamukameana pemaa siya sepaya uxariwaita hamunya, mayewaa resewarataa aintasuiwara pemburi ita serese?

³³Asui kuaita judewita aintausuaxara ae, aintaunyee: —Timaa yamburi nerese ita sesewara kua remunyawaita purangawaita maa repurungita resewara puxi, nyãse rembeute Deus inde apigawa pukusawa inde.

³⁴Asui Jesus umbeu ainta supe: —Maitaa tiserá aintaumpinima kuxima penyenga rupi, hambeu deuste penye?

³⁵Tiyapuderi yamutenyuntu Deus nyenga, umbeu rame deus kuaita umpinimawaa ixupe Deus nyenga,

³⁶Ape marantaa pembeu, repurungita puxi ixupe kua Deus umukaturuwaa kua umunduwaa kua mundu kiti nyãse umbeu ixete Deus raira.

³⁷Tirame hamunya sepaya umunyawaa tepexari pepia serese.

³⁸Maa hamunya rame ae tipukusawa peputari pexari pepia serese pexari pepia sese kua hamunyawaa pekuawa arama sepaya uiku sepia upe haikute yuiri sepaya ipia upe.

³⁹Asui aintauputari yuiri aintaupisika ae maa ueskapari aintaipu sui.

⁴⁰Asui usu yuiri parana Jurdão ruaxara kiti Juão uyupiruwaa ubatizari ape, asui uiku akiti.

⁴¹Asui aintauri siya miraita ipiri, aintaunyee: —Supiwate, timaa Juão umunya milagri, maa supiwate umbeuwaa panye sese kua.

⁴²Asui siya miraita aintauxari aintapia sese akiti.