Read Nhengatu Juão 11 Bible Online

Juão 11 - Nhengatu bible

Juão 11

¹Asui imãsi yepe apigawa serawaa Lazaru uikuwaa Betania upe aintarendawa upe kua Maria iamu Marta yuiri.

²Kua Maria uyusenawaa kuera sakuenawaa yaneruixawa rese asui umutikanga ipi iawa irumu, ikiwira kua Lazaru imãsiwaa.

³Asui sendiraita aintaumundu kuekatu Jesus supe, aintaunyee: —Yaneruixawa, imãsi uiku kua regustariwaa.

⁴Asui Jesus usendu irumu kua kuekatu unyee: —Timaa imãsi uyuká ae, maa imãsi aintaumbeu arama kuri purangawaa kua Deus, aintaumbeu arama yuiri purangawaa kua Deus raira resewara.

⁵Jesus ugustari Marta iamu Maria yuiri Lazaru yuiri.

⁶Asui usendu rire imãsi uikure mukuĩ ara akiti.

⁷Asui arire umbeu umbuewaita supe: —Yasu mukuĩsawa Judeya kiti.

⁸Asui umbuewaita unyee ixupe: —Inde rembuewaa, kuaita judewita kuirintu aintauyuká putari inde ita irumu, asui kuiri maitaa reputari reyuiri aintapiri?

⁹Asui Jesus usuaxara ainta, unyee: —Maitaa tiserá uriku duzi ura kua yepe ara? Yawata rame ara rame tikuri yawari nyãse yamaa kua turi ara ramewara.

¹⁰Maa yawata rame pituna rame yawari nyãse tiyariku turi.

¹¹Yawe upurungita, asui unyee ainta supe: —Yanerumuara Lazaru ukiri maa harikute hasu hambaka ae.

¹²Asui kuaita umbuewaita aintaunyee ixupe: —Yaneruixawa, ukiri rame uiku purangate kuri ae.

¹³Upurungita Lazaru manusawa rese, maa aintaumanduari umbeu ukiri upitu.

¹⁴Asui Jesus unyee ainta supe satambika: —Umanuana Lazaru.

¹⁵Asui suuri sepia peresewara tiresewara haiku irumu pepuderi arama pexari pepia, yasu yamaa ipiri.

¹⁶Asui kua Tume aintauserukawaa Didimu unyee ainta supe arama kuaita sumuaraita: —Yasuana yamanu arama irumu yande yuiri.

¹⁷Jesus usika irumu akiti aintauxari ukuawa Lazaru urikuana kuatru ara aintaumburi rire ae iwi kuara kiti.

¹⁸Betania uiku kuayentu Jeruzalẽ sui, anyunte tres kilumetru iapekatusawa.

¹⁹Siya aintasuiwara kuaita judewita aintauri Marta Maria ipiri aintauwajudari arama ainta aintakiwira resewara.

²⁰Asui Marta ukuawa irumu Jesus uri asui usu suaxara, maa Maria uikure uka kiti.

²¹Asui Marta unyee Jesus supe: —Seruixawa, aikue ramete maa inde yaneirumu timaa umanu sekiwira.

²²Maa hakuawate maantu repurandu Deus irumu Deus uxari inde arama ae.

²³Asui Jesus unyee ixupe: —Nekiwira upuamu kuri manusawa sui.

²⁴Asui Marta unyee ixupe: —Hakuawate upuamu kuri manusawa sui aintaupuamu irumu kuri panye anyu aramawaa ara upe.

²⁵Asui Jesus usuaxara ae: —Ixete kua hampuamusara ainta manusawa sui, ixete kua uxari aramawaa aintaupaka, awa uxari ipia serese upakate kuri ae yawewarawate umanu pukusawa ae.

²⁶Asui panye kuaita upakawaita uxariwaita ipia serese tikuri aintaumanu yawewarawate. Maitaa reruyari kua nyenga?

²⁷Asui unyee: —Ẽẽ seruixawa, haruyari Kristu inde Deus raira inde kua uriwaa kua mundu kiti.

²⁸Asui umbeu rire kua inyenga usu isui usenui iamu Maria unyee ixupe: —Kua umbuewaa yande usikana usenui inde.

²⁹Asui usendu irumu ae upuamu kutara asui usu ipiri.

³⁰Nyãse tire Jesus uwike aintarendawa upe maa anyunte uiku mame Marta usuantiwaa ae.

³¹Asui kuaita judewita uikuwaita uka upe Maria irumu aintawajudari arama ae aintaumaa irumu upuamu kutara usemu ukara kiti asui aintausu sakakuera nyãse aintaumanduari usu iwi kuara kiti uyaxiu arama.

³²Asui Maria usika Jesus uikuwaa ape asui umaa irumu ae upuri uwari iwi kiti ipi ruaki unyee ixupe: —Seruixawa, reiku rame maa yaneirumu timaa umanu sekiwira.

³³Asui Jesus umaa irumu uyaxiu aintauyaxiu yuiri kuaita sumuaraita asui sasiyara ipia turusu.

³⁴Asui upurandu ainta, unyee: —Mametaa peyutima ae? Aintaunyee ixupe: —Yaneruixawa, reyuiri remaa.

³⁵Asui Jesus uyaxiu.

³⁶Asui kuaita judewita aintaunyee: —Pemaa maye ugustari ae.

³⁷Maa amuita aintaunyee: —Maitaa tiserá upuderi umukaturu ae tiarama umanu kua upirariwaa sesaimawaa kuera resa?

³⁸Asui sasiyara Jesus ipia turusu mukuĩsawa asui usu iwi kuara kiti aintaupikuĩwaa kiti aintaumusikindawaa ita turusuwaa irumu kua iwi kuara rukena.

³⁹Asui Jesus unyee: —Pemburi isui ita. Asui Marta kua umanuwaa rendira unyee: —Seruixawa, inemana ae urikuana kuatru ara.

⁴⁰Asui Jesus unyee ixupe arama: —Maitaa tiserá hambeu inde arama reruyari rame remaa kuri Deus ukuawasawa purangawaa?

⁴¹Asui aintauyuka isui kua ita, asui Jesus umaa iwate kiti unyee: —Inde sepaya hamee inde arama purangawaa nyãse resenduana ixe arama.

⁴²Hakuawate resendu ixe arama yawewarawate, maa yawe hanyee aintaresewara kuaita miraita uikuwaita seruaki aintaukuawa arama remunduwaa ixe.

⁴³Asui umbeuwaa rire ae usasemu kirimbawa, unyee: —Inde Lazaru resemu asui.

⁴⁴Asui kua umanuwaa kuera usemu aintaupupekaware ipi ipu yuiri panu irumu suwa yuiri aintausikindawa lensu irumu. Asui Jesus unyee: —Peyurawa ae pexari usu.

⁴⁵Ape siya kuaita judewita uriwaita umaa Maria ipiri aintaumaa Jesus umunyawaa asui aintauxari aintapia sese.

⁴⁶Maa yepeyepe aintausu farizewita piri aintaumbeu arama ainta supe arama maitaa Jesus umunyawaa.

⁴⁷Asui kuaita saserdutita ruixawaita farizewita yuiri aintaumuatiri panye kuaita serakuenawaita aintaunyee: —Maataa kuri yamunya nyãse kua apigawa umunya siya milagri?

⁴⁸Yaxari rame maa ae aintauxari kuri aintapia sese panye, asui aintauri kuri kuaita rumanuita aintaumukanyemu kuri yaneretama panye yanemiraita yuiri.

⁴⁹Maa yepe aintasuiwara serawaa Kaifa saserdutita ruixawa ae nyã akayu upe, unyee ainta supe: —Timaa nungara pekuawa,

⁵⁰Tipekuawa urikute umanu yepe aintasuiwara kuaita miraita tiarama kuri aintaukanyemu panye kuaita miraita.

⁵¹Tisimutara unyee ainta supe arama ae, maa saserdutita ruixawa ae nyã akayu upe utitika umanu arama Jesus aintaresewara panye miraita.

⁵²Tiaintaresewara anyu kuaita miraita maa umuatiri arama kuri yepenyu arama kuri panye kuaita Deus tainaita uyusaĩwaita.

⁵³Asui nyã ara rire aintauputari aintauyuká ae.

⁵⁴Ape timaa Jesus uwata yuiri uyukuawasawa upe aintapitera rupi kuaita judewita, maa usu amu kiti kuayentu kampu sui yepe tetama serawaa Efraim, asui uiku aintairumu akiti kuaita umbuewaita.

⁵⁵Kuayentuana kuaita judewita festa serawaa paskua, ape siya miraita usu Jeruzalẽ kiti paskua rundere aintauyumukaturu arama.

⁵⁶Asui aintausikari Jesus asui aintauyupurungita templu upe, aintaunyee: —Maitaa pekuawa? Uri será kuri kua kiti umaa arama festa?

⁵⁷Ape kuaita saserdutita ruixawaita farizewita yuiri aintaunyee, ainta supe kuaita miraita; sã yepe ukuawa mametaa ae aintaumbeu arama ainta supe aintaumprezu arama ae.