Read Nhengatu Juão 13 Bible Online

Juão 13 - Nhengatu bible

Juão 13

¹Asui festa paskua runde Jesus ukuawa usikana sangawa uyuiri arama kua mundu sui ipaya piri, kuaye ugustariwaa yawe kuaita iyaraita yawete yuiri ugustari ainta ate anyu aramawaa ara upe.

²Asui aintaumbau irumu Yurupari uwikeana ipia upe kua Juda Iskariute kua Simão raira usikari arama uentregari Jesus,

³Jesus ukuawana ipaya uxariana panye maa ipu upe ukuawate uri Deus sui asui uyuiri arama Deus ipiri.

⁴Asui Jesus upuamu meza sui asui umusaka isui ipupekawa asui upukuari yepe tualya ikuwa upe.

⁵Asui uyusena basia upe asui uyupiru umuyasuka aintaipi kuaita umbuewaita asui umutikanga ainta tualya irumu kua upukuariwaa ikuwa upe.

⁶Asui uri Simão Pedru ipiri, asui Pedru unyee ixupe: —Seruixawa, maitaa remuyasuka seipi.

⁷Asui Jesus unyee ixupe: —Tirekuawa mayesawataa kuiri kua hamunyawaa maa arire kuri rekuawa.

⁸Asui Pedru unyee ixupe: —Nunka kuri remuyasuka seipi. Asui Jesus unyee ixupe: —Tirame hamuyasuka neipi tikuri maa reriku seirumu.

⁹Asui Simão Pedru unyee ixupe: —Seruixawa, tiseipinyu remuyasuka maa remuyasuka seipu seakanga yuiri.

¹⁰Asui Jesus unyee ixupe: —Awa uyasukana tiana uputari umuyasuka anyunte umuyasuka ipi nyãse ikiaimawaa panye ipira. Ikiaimawaita penye maa timuiri penye.

¹¹Nyãse ukuawate awataa kua umuentregari aramawaa ae, sesewara umbeu timaa ikiaimawaita muiri penye.

¹²Asui umuyasuka rire aintaipi umundeu yuiri ipupekawa, uwapika yuiri aintairumu meza ruaki unyee ainta supe: —Maitaa pekuawate mayesawataa kua hamunyawaa penye arama?

¹³Peseruka ixe, inde rembuewaa yande, inde yaneruixawa, supiwa peseruka ixe nyãse ixete ae.

¹⁴Ape hamuyasuka rame peipi ixe peruixawa ixe umbuesara penye yawete yuiri perikute pemuyasuka perumuaraita ipi.

¹⁵Nyãse hamukameana pemaa puranga pemunya arama kuri kuaye hamunyawaa yawe.

¹⁶Supiwa hambeu penye arama: —Umbaa suixawa iara kiti piriwaa kua upurakiwaa ixupe, tiyuiri iara kiti piriwaa kua umunduwaa isui kua umunduwaa ae.

¹⁷Pekuawa rame mayesawataa kua hambeuwaa suuri kuri penye pemunya rame ae.

¹⁸Tihambeu peresewara panye, maa hakunyeseri kuaita haparawakawaita, maa hambeu ae aintaumunya arama kuaye Deus nyenga umbeuwaa yawe, kua umbauwaa seirumu pão upuamu seruaxara upiru arama ixe.

¹⁹Kuiri hambeu penye arama yawewaa senundere usasawa peruyari arama kuri ixete ae mairame kuri pemaa usasawa.

²⁰Supiwa hambeu penye arama: —Awa ureseberi kua hamunduwaa ureseberi kuri ixe, asui awa ureseberi ixe ureseberi yuiri kua umunduwaa ixe.

²¹Asui Jesus umbeu rire kua inyenga sasiyara ipia asui unyee: —Supiwa hambeu penye arama yepe pesuiwara uentregari kuri ixe seruanyanaita supe.

²²Asui kuaita umbuewaita aintauyumaa nyãse tiaintaukuawa awa resetaa umbeuwaa.

²³Asui kuayentu uwapika Jesus ruaki yepe umbuewaa kua ugustariwaa.

²⁴Asui Simão Pedru umukataka iakanga unyee ixupe: —Repurandu yasendu awa resetaa umbeu.

²⁵Asui kua umbuewaa uwapika kuayentu Jesus ruaki upurandu ae: —Seruixawa, awataa ae?

²⁶Asui Jesus usuaxara ae, unyee: —Aete kua hameewaa ixupe pão hamururuwaa. Asui umururu rire kua pão umee ixupe ae kua Juda taira kua Simão Iskariute.

²⁷Asui arire kua pão Yurupari uwike ipia upe. Asui Jesus unyee ixupe: —Kutara remunya kua reputariwaa remunya.

²⁸Maa tiawa aintasuiwara kuaita uwapikawaita meza ruaki ukuawa mayesawataa kua umbeuwaa.

²⁹Amuita umanduari Jesus uputari umbeu Juda supe, resu repiripana kua watariwaa festa rupiara u umundu umee arama pirasuawaita supe arama, nyãse aete usarusara aintadinyeru.

³⁰Asui upisika rire kua pão usu uka sui.

³¹Asui Juda usemu rire uka sui Jesus unyee ainta supe: —Kuiriana aintaumee purangawaa sesewara kua unaseriwaa umaa kua mundu asui sesewara yuiri aintaumee purangawaa Deus supe.

³²Aintaumee rame purangawaa Deus supe sesewara ape kuri Deus uxari aintaumee purangawaa sesewarapawate, kuiri kuri umunya ae.

³³Setainaita, kutarantuana haiku peirumu. Maye hambeuwaa ainta supe arama kuaita judewita yawete yuiri hambeu penye arama kuiri, pesikari kuri ixe maa tikuri pepuderi pesu hasuwaa akiti.

³⁴Haxari penye arama yepe nyenga pisasuwaa, peyugustari arama kuri. Kuaye hagustariwaa yawe penye yawete yuiri peyugustari kuri.

³⁵Peyugustari rame puranga aintaukuawa kuri panye kuaita miraita hambuewaita penye.

³⁶Asui Simão Pedru unyee ixupe: —Seruixawa, maa kititaa resu? Asui Jesus usuaxara ae: —Tirepuderi resu serakakuera hasuwaa akiti kuiri, maa arire kuri resu kuri serakakuera.

³⁷Asui Pedru unyee ixupe: —Seruixawa, marantaa tihapuderi hasu nerakakuera kuiri? Maa hamanu kuri neresewara.

³⁸Asui Jesus usuaxara ae unyee: —Maitaa kuri remanu seresewara? Supiwa hambeu inde arama, musapiri viaji kuri reyumimi seresewara senundere galu unyengari.