Read Nhengatu Juão 14 Bible Online

Juão 14 - Nhengatu bible

Juão 14

¹Asui Jesus unyee, umbuewaita supe: —Tepexari sasiyara pepia, pexari pepia Deus rese pexari pepia serese yuiri.

²Siya uka sepaya retama upe. Tirame maa yawe hambeu maa penye arama, hasu hamukaturu peiku aramawaa.

³Asui hasu rame kuri hamukaturu peiku aramawaa hayuiri yuiri mukuĩsawa harasu arama kuri penye seirumu peiku arama kuri haikuwaa upe.

⁴Asui pekuawate kua pee hasuwaa akiti.

⁵Asui Tume unyee ixupe: —Seruixawa, tiyakuawa maa kititaa resu, maitaa maa yapuderi yakuawa kua pee?

⁶Asui Jesus unyee ixupe: —Ixete kua pee, ixete kua supiwa, ixete kua sikuesawa, tiawa umaa sepaya piri tirame maa harasu ae.

⁷Pekunyeseri rame ixe pekunyeseri yuiri sepaya. Kuiri kuri pekunyeseri ae nyãse pemaawana ae.

⁸Asui Filipe unyee: —Seruixawa, remukame yamaa nepaya asui usika yande arama.

⁹Asui Jesus unyee ixupe: —Filipe, maitaa tire rekunyeseri ixe haiku pukusawa peirumu uikupuku? Awa umaa ixe umaa yuiri sepaya, marantaa renyee: —Remukame yamaa nepaya?

¹⁰Maitaa tireruyari haiku sepaya ipia upe asui sepaya uiku sepia upe? Tiserimutara kua hambeuwaa, maa sepaya uiku sepia upe umunya panye kua umunyawaita.

¹¹Peruyari ixe haiku sepaya ipia upe asui sepaya uiku sepia upe u pexari pepia serese sesewara kuaita hamunyawaita.

¹²Supiwa hambeu penye arama: —Awa uxari ipia serese umunya kuri kua hamunyawaa, umunya kuri turusu piri isui nyãse hasu sepaya ipiri.

¹³Hamunya kuri penye arama panye kua pepuranduwaa serera rupi aintaumbeu arama purangawaa sepaya supe taira resewara.

¹⁴Pepurandu rame maantu serera rupi hamunya kuri penye arama ae.

¹⁵Pegustari rame ixe pemunya kuri kua hambeuwaa.

¹⁶Hapurandu kuri sepaya irumu asui uxari kuri penye arama yepe umusuuri aramawaa uiku arama kuri peirumu yawewarawate.

¹⁷Aete kua Espiritu supiwa kua tiwa aintaupuderi aintaureseberi kuaita mundu puraita nyãse tiaintaumaa ae tiyuiri aintaukunyeseri ae, pekunyeseri ae nyãse uiku peirumu asui uiku kuri pepia upe.

¹⁸Tikuri haxari ipayaima penye, asui hayuiri yuiri pepiri.

¹⁹Kutarantuana aintaumaa ixe kuaita mundu puraita, maa penye pemaa kuri ixe nyãse hapakate ixe penye pepakate yuiri kuri.

²⁰Nyã ara upe kuri pekuawa haiku sepaya ipia upe asui penye peiku sepia upe asui ixe haiku pepia upe.

²¹Awa uriku kua hambeuwaa uruyari kuri ae, aete ugustari ixe, asui sepaya ugustari kuri kua ugustariwaa ixe, asui ixe yuiri hagustari kuri ae asui haxari kuri ukunyeseri ixe.

²²Asui kua Juda tiwa Iskariute unyee ixupe: —Seruixawa, mayetaa rexari yakunyeseri inde maa tirexari aintaukunyeseri inde kuaita mundu puraita?

²³Asui Jesus usuaxara ae, unyee: —Awa ugustari ixe umunya yuiri kua hambeuwaa asui sepaya kuri ugustari ae, asui yayuiri kuri ipiri asui yamunya kuri yaiku aramawaa irumu.

²⁴Awa tiugustari ixe tikuri umunya kua hambeuwaa, asui kua nyenga hasenduwaa timaa senyenga ae maa sepaya nyenga ae kua umunduwaa ixe.

²⁵Hambeuwana penye arama ae haiku pukusaware peirumu.

²⁶Maa aete umusuuriwaa kua Espiritu Santu sepaya umunduwaa kuri serera rupi umbue kuri penye asui uxari kuri pemanduari panye kua hambeuwaa penye arama.

²⁷Haxari timaarese penye haxari penye arama timaaresesawa, tihaxari timaarese penye aintayawe kuaita mundu puraita. Tepexari sasiyara pepia tepesikie.

²⁸Pesenduana hambeu penye arama: —Hasu pesui asui hayuiri pepiri. Pegustari rame maa ixe suuri maa penye nyãse hasu sepaya ipiri, nyãse seara kiti piri kua sepaya.

²⁹Hambeu penye arama kuiri senundere usasawa kua pexari arama pepia serese usasawa irumu kuri.

³⁰Tiana kuri hapurungita peirumu turusu nyãse usikana kua mundu ruixawa. Timaa nungara uriku seirumu.

³¹Maa hamunya kuaye sepaya umunduwaa yawe ixe, aintaukuawa arama kuaita mundu puraita hagustari sepaya. Kuiri pepuamu yasuana kua sui.