Read Nhengatu Juão 15 Bible Online

Juão 15 - Nhengatu bible

Juão 15

¹Asui Jesus unyee: —Ixete kua mirá supiwa, sepaya kua usarusara ae.

²Panye kuaita sakangaita tiwaita uriku iya umunuka ainta, asui panye kua sakanga urikuwaita iya umunuka aintasui puxuwerawaita iya arama ainta siyapiri.

³Ikiaimawaita penye irumu kua nyenga hambeuwaa penye arama.

⁴Peiku sepia upe asui haiku kuri pepia upe. Tirame sakanga uiku mirá rese tiupuderi uriku iya, yawete yuiri penye tirame peiku sepia upe.

⁵Ixete kua mirá penyete sakangaita. Awa uiku sepia upe haiku yuiri ipia upe uriku iya puranga, nyãse timaa nungara pepuderi pemunya sesui.

⁶Awa tiuiku sepia upe aintaumburi kuri ae maye sakanga tikangawaa yawe aintaumuatiriwaa aintaumburi arama tata kiti usapi aramawaa.

⁷Peiku rame sepia upe senyenga uiku rame pepia upe pepurandu kuri maantu peputariwaa asui hamunya kuri penye arama ae.

⁸Aintaukuawa kuri hambuewaita penye asui periku kuri peiya puranga ape kuri aintaumbeu purangawaa sepaya resewara.

⁹Kuaye sepaya ugustariwaa yawe ixe yawete yuiri hagustariwaita penye, peiku kuri hagustarisawa rese.

¹⁰Pemunya rame kua hambeuwaa peiku kuri hagustarisawa rese kuaye hamunyawaa yawe sepaya umbeuwaa asui haiku ugustarisawa rese.

¹¹Hambeu penye kua hambeuwaa suuri arama kuri ixe peresewara suuri arama yuiri penye turusu.

¹²Aete kua hamunduwaa peyugustari arama penyepawa kuaye hagustariwaa yawe penye.

¹³Tiawa ugustari amuita isui kua umanuwaa ianamaita resewara.

¹⁴Seanamaita penye pemunya rame kuaye hambeuwaa yawe.

¹⁵Kuiri tihaseruka penye kuaye upurakiwaita yawe ixe arama nyãse kua upurakiwaa tiukuawa maataa suixawa umunya, kuiri haseruka penye seanamaita yawe nyãse haxari pekuawa panye kua hasenduwaa sepaya irumu.

¹⁶Timaa peparawaka ixe maa ixe haparawaka penye asui hamundu penye periku arama peiya asui uiku arama yawewarawate, asui sepaya uxari kuri penye arama maantu pepurandu irumu serera rupi.

¹⁷Yawe hamundu penye peyugustari arama penyepawa.

¹⁸Puxi rame aintaumaa penye arama kuaita mundu puraita pekuawa kuri puxi aintaumaa ixe senundere puxi aintaumaa penye.

¹⁹Mundu iyaraita rame maa penye aintaugustari maa aintayaraita kuaita mundu puraita, maa timaa mundu iyaraita penye nyãse haparawakawaita penye kua mundu sui, ape puxi aintaumaa penye arama kuaita mundu puraita.

²⁰Pemanduari kua nyenga hambeuwaa penye arama, timaa suixawa ara kiti piri kua upurakiwaa ixupe arama. Aintaumuruanyana rame ixe aintaumuruanyana yuiri penye, aintaumunya rame hambeuwaa yawe aintaumunya kuri yuiri pembeuwaa yawe.

²¹Aintaumunya kuri penye arama panye kuayewaa serera resewara nyãse tiaintaukunyeseri kua umunduwaa ixe.

²²Tirame maa hayuiri hambeu arama ainta supe tiaintauriku aintapekadu, maa kuiri tiaintaupuderi aintaumbeu tiaintauriku kulpa.

²³Awa puxi umaa ixe puxi yuiri umaa sepaya.

²⁴Tirame maa hamunya aintapiterupi kua tiwa yepe upuderi umunya timaa aintauriku aintapekadu, maa kuiri aintaumaa ixe sepaya yuiri asui puxi aintaumaa ixe sepaya yuiri.

²⁵Yawe ainta aintaumunya arama kuaye aintaumpinimawaa yawe kuxima aintanyenga rupi, timaa resewara puxi aintaumaa ixe.

²⁶Uri rame kuri kua umusuuriwaa hamunduwaa kuri sepaya sui umbeu kuri seresewara kua Espiritu supiwa uriwaa sepaya sui.

²⁷Penye yuiri kuri pembeu seresewara nyãse peiku seirumu uyupirungawa sui.