Read Nhengatu Juão 16 Bible Online

Juão 16 - Nhengatu bible

Juão 16

¹Asui Jesus umbeu yuiri ainta, unyee: —Hambeu penye arama panye kua hambeuwaa tiarama pewari sesui.

²Aintaumburi kuri penye sinaguga sui. Asui amu ara kuri kuaita uyukáwaita penye aintaumanduari kuri aintaumunya puranga Deus supe.

³Yawe kuri aintaumunya nyãse tiaintaukunyeseri sepaya nẽ ixe yuiri.

⁴Hambeuwana penye arama kua nyenga pemanduari arama kuri sangawa upe kua hambeuwaita penye arama. Tire hambeu penye arama hayupiru rame haiku peirumu nyãse peirumute ixe.

⁵Maa kuiri hasu ipiri kua umunduwaa ixe, asui tiawa pesuiwara upurandu ixe. Maa kititaa resu?

⁶Maa sasiyara pepia turusu nyãse hambeu resewara penye arama kua hambeuwaa.

⁷Hambeu penye arama supiwa, harikute hasu pesui, tirame hasu pesui tikuri uri pepiri kua umusuuriwaa, maa hasu rame hamundu kuri penye arama ae.

⁸Uri rame kuri uxari kuri aintaukuawa aintauriku aintapekadu kuaita mundu puraita, uxari yuiri aintaukuawa sese kua purangawaa, uxari yuiri aintaukuawa aintaupurara kuri aintapekadu resewara.

⁹Uxari aintaukuawa aintapekadu resewara nyãse tiaintauxari aintapia serese.

¹⁰Uxari aintaukuawa kua purangawaa resewara nyãse hasu sepaya ipiri asuiwana kuri tikuri pemaa ixe.

¹¹Uxari aintaukuawa aintaupurara arama kuri nyãse hamburiana kua mundu ruixawa.

¹²Harikure turusu hambeu arama penye arama maa tipepuderi pesendu ae kuiri.

¹³Maa uri rame kuri kua Espiritu supiwa uxari kuri pekuawa panye nyenga supiwa, tikuri upurungita simutara, maa umbeu kuri kua usenduwaa, asui uxari kuri pekuawa sese kua uriwaa kuri.

¹⁴Umbeu kuri purangawaa serese nyãse uriku kuri kua sesuiwara asui umbeu kuri penye arama ae.

¹⁵Panye sepaya urikuwaa aete harikuwaa yuiri, sesewara hambeu penye arama: —Uriku arama kuri sesuiwara, asui umbeu kuri penye arama ae.

¹⁶Watari xinga tiana kuri pemaa ixe, asui xinga pemaawana yuiri kuri ixe.

¹⁷Asui yepeyepe umbuewaita aintauyupurungita, aintaunyee: —Mayesawataa kua umbeuwaa yande arama? Watari xinga tiana kuri pemaa ixe maa asui xinga pemaawana yuiri kuri ixe. Umbeute yuiri, hasu sepaya piri.

¹⁸Asui aintaunyee: —Mayesawataa kua inyenga watari xinga? Tiyakuawa mayesawataa ae.

¹⁹Asui Jesus ukuawa aintauputari aintaupurandu ae asui unyee ainta supe: —Maitaa peputari pekuawa mayesawataa kua hambeuwaa, watari xinga tiana kuri pemaa ixe maa asui xinga pemaawana yuiri kuri ixe?

²⁰Supiwa hambeu penye arama: —Peyaxiu kuri sasiyara kuri penye, maa suuri kuri kuaita mundu puraita. Sasiyara kuri penye asui kua sasiyarasawa uyutrukari suuri arama kuri penye.

²¹Sasiyara kua kunya unaseri irumu imembira nyãse usikana sangawa, maa unaseri rire imembira tiana umanduari sese kua upurarawaa anyunte suuri umaa kua imembira unaseriwaa umaa kua mundu upe.

²²Yawete yuiri penye kuiri sasiyara penye, maa hamaa yuiri kuri penye mukuĩsawa asuiwana kuri suuri pepia, asui tikuri awa upuderi uyuka pesui kua suurisawa.

²³Nyã ara upe kuri nemaa pepurandu seirumu. Supiwa hambeu penye arama: —Sepaya uxari kuri penye arama maantu pepurandu irumu serera rupi.

²⁴Tire maa nungara pepurandu serera rupi, pepurandu asui periku kuri ae suuri arama kuri penye turusu piri.

²⁵Hambeuwana penye arama kua hambeuwaa hambue aramawaa ipupe, amu ara kuri tikuri hambeu penye arama hambue aramawaa ipupe, maa hambeu kuri penye arama uyukuawa sese kua sepaya.

²⁶Nyã ara upe kuri pepurandu kuri serera rupi, maa tihambeu penye arama hapurandu kuri sepaya irumu perese.

²⁷Nyãse sepaya ugustari penye nyãse pegustari yuiri ixe pexari yuiri pepia serese hayuiri Deus sui.

²⁸Hayuiri sepaya sui hawike arama kua mundu kiti, kuiri hasu kua mundu sui hasu arama sepaya ipiri.

²⁹Asui umbuewaita unyee ixupe: —Kuiri repurungita uyukuawa tirembeu yande arama kua nyenga rembue aramawaa ipupe.

³⁰Kuiri yakuawa rekuawate panye maa rese, tipresizu amu upurandu inde. Sesewara yakuawa supiwa reyuiri Deus sui.

³¹Asui Jesus unyee ainta supe: —Maitaa pexari pepia serese kuiri?

³²Amu ara kuri kuiri yuiri peyusãi kuri panye penye perendawa kiti asui kuri pexari ixe, maa timaa yepenyuwaa ixe maa seirumute sepaya.

³³Hambeuwana penye arama kua nyenga tiarama maa rese peiku sepia upe. Pepurara kuri kua mundu upe, maa pexari suuri pepia nyãse hamuserana kua mundu.