Read Nhengatu Juão 17 Bible Online

Juão 17 - Nhengatu bible

Juão 17

¹Asui Jesus umbeu rire kua inyenga asui umaa iwate kiti unyee: —Inde sepaya, usikana serangawa, kuiri remee purangawaa neraira rese, umee arama purangawaa nerese kua neraira.

²Nyãse rexariana ixupe umundusara umundu arama panye mundu puraita uxari arama ainta supe mundu nunkawaa upawa panye kuaita remeewaita ixupe.

³Aintauriku arama mundu tiwa upawa kuaita ukunyeseriwaita inde Deus yepenyuwaa supiwa aintaukunyeseri arama yuiri kua Jesus Kristu kua remunduwaa.

⁴Hamee inde arama purangawaa hamunya resewara kua rexariwaa hamunya.

⁵Kuiri inde sepaya rembeu purangawaa serese neirumu maye remunyawaa yawe ixe arama haiku pukusawa neirumu kua mundu rundere.

⁶Haxari aintaukuawa nerera kuaita apigawaita rexariwaita ixe arama kua mundu upe. Neyaraita ainta asui rexari ixe arama ainta, aintauruyariana nenyenga.

⁷Kuiri aintaukuawana nesuiwaraita panye kuaita rexariwaita ixe arama.

⁸Nyãse hambeuwana ainta supe kua nenyenga rembeuwaa ixe arama asui aintaureseberi ae asui aintaukuawa supiwa hayuiri nesui, aintaukuawate remunduwaa ixe.

⁹Hapurandu aintarese, tihapurandu aintarese kuaita mundu puraita, maa aintarese kuaita rexariwaita ixe arama nyãse neyaraita ainta.

¹⁰Neyaraita panye kuaita seyaraita, asui seyaraita panye kuaita neyaraita, asui hambeu purangawaa aintarese.

¹¹Tiana mundu upewara ixe kuiri, maa aintauikure kua mundu upe, asui hasu kuri nepiri. Inde sepaya purangawaa, resaru ainta nerera rese kuaita rexariwaita ixe arama yepenyu aramate kuri ainta kuaye yepenyuwaa yawe yande.

¹²Hasaruana ainta nerera rese haiku pukusaware aintairumu, hamukaturuana ainta asui nẽ yepe uyusupari aintasuiwara anyunte kua puxuwerawa umunya arama kuaye Deus nyenga umbeuwaa yawe.

¹³Maa kuiri hasuana nepiri, asui hambeu panye kua nyenga kua mundu upe suuri arama kuri aintapia seresewara.

¹⁴Haxariana ainta supe arama nenyenga, asui kuaita mundu puraita puxi aintaumaa ainta nyãse tikua mundu iyaraita ainta maye tiwa yawe mundu iyara ixe.

¹⁵Tihapurandu inde reyuka arama ainta kua mundu sui maa hapurandu inde remukaturu arama ainta isui kua puxuwerawa.

¹⁶Timaa kua mundu iyaraita ainta kuaye tiwa yawe mundu iyara ixe.

¹⁷Rexari ikiaimawaita ainta ipupe kua supiwa, nyãse supiwa kua nenyenga.

¹⁸Maye remunduwaa yawe ixe kua mundu upe yawete yuiri hamundu ainta kua mundu kiti.

¹⁹Aintaresewara haxari ikiaimawaa ixepawate ikiaima arama kuri aintayuiri irumu kua supiwa.

²⁰Tihapurandu aintaresenyu maa hapurandu aintarese yuiri kuaita uxariwaita kuri aintapia serese aintanyenga resewara.

²¹Yepenyu aramate kuri ainta panye, kuaye reikuwaa yawe sepia upe inde sepaya haiku yuiri nepia upe yawete yuiri kuri aintauiku yanepia upe aintaukuawa arama remunduwaa ixe kuaita mundu puraita.

²²Haxariana ainta supe arama kua purangawaa rexariwaa ixe arama yepenyu aramate kuri ainta kuaye yepenyuwaa yawe yande.

²³Haiku arama aintapia upe reiku yuiri sepia upe yepenyu arama kuri ainta puranga, aintaukuawa arama remunduwaa ixe aintaukuawa arama yuiri regustari ainta kuaye regustariwaa yawe ixe.

²⁴Inde sepaya, haputari aintauiku seirumu haikuwaa akiti kuaita rexariwaita ixe arama, aintaumaa arama kuri kua purangawaa remeewaa ixe arama regustari resewara ixe kua mundu uyupiru rundere.

²⁵Inde sepaya purangawaa, tiaintaukunyeseri inde kuaita mundu puraita maa ixe hakunyeseri inde, kuaita yuiri remeewaita ixe arama aintaukuawate remunduwaa ixe.

²⁶Haxari aintaukunyeseri nerera, asui haxari yuiri aintaukunyeseri ae aintauyugustari arama kuaye regustariwaa yawe ixe.