Read Nhengatu Juão 18 Bible Online

Juão 18 - Nhengatu bible

Juão 18

¹Asui Jesus umbeu rire kua inyenga usu umbuewaita irumu igarape ruaxara kiti serawaa Sedrum, asui usu kaa kiti umbuewaita irumu.

²Asui kua Juda kua umuentregariwaa suanyanaita supe ae ukuawate maa kiti usu nyãse siya viaji usu akiti umbuewaita irumu.

³Asui Juda urasu kuaita suraraita aintaumunduwaita kuaita saserdutita ruixawaita farizewita yuiri urasu yuiri yepeyepe guardaita, asui usu Jesus uikuwaa akiti, aintaurasu siya turi aintaurasu yuiri aintauyuká aramawaa ipupe.

⁴Asui Jesus ukuawana panye kua uriwaa sese usu aintaruaxara unyee ainta supe: —Awataa pesikari?

⁵Asui aintaunyee ixupe: —Yasikari Jesus kua Nazare suiwara. Asui Jesus unyee ainta supe: —Ixete kua. Asui kua Juda umuentregariwaa ae aikue aintairumu yuiri ae.

⁶Asui Jesus umbeu irumu ainta supe ixete, aintauyuiri aintarakakuera kiti aintauwari iwi kiti.

⁷Asui Jesus upurandu yuiri ainta, unyee: —Awataa pesikari? Asui aintausuaxara ae aintaunyee: —Yasikari Jesus kua Nazare suiwara.

⁸Asui Jesus unyee ainta supe: —Hambeuwana penye arama ixete, pesikari rame ixe pexari aintausu kuaita apigawaita.

⁹Yawe umbeu usasawa arama kua nyenga umbeuwaa, nẽ yepe uyusupari sesui aintasuiwara kuaita rexariwaita ixe arama.

¹⁰Asui Simão Pedru usiki iespada siru sui kua urasuwaa unupa kua saserdutita ruixawa ixupe aramawaa asui umunuka inambi katusawa banda sui, sera Malku kua saserdutita ruixawa ixupe aramawaa.

¹¹Maa Jesus unyee Pedru supe: —Remuyuiri neespada siru kiti, maitaa tiserá hau kua kupu sepaya uxariwaa ixe arama.

¹²Asui kuaita suraraita aintakapitãoita yuiri kuaita guardaita yuiri aintaupisika Jesus aintaupukuari ae.

¹³Asui aintauyupiru aintaurasu ae Anaa ipiri nyãse Kaifa ratiwa ae kua saserdutita ruixawa nyã akayu upe.

¹⁴Kaifa unyee ainta supe kuaita judewita: —Purangate yepe apigawa umanu aintaresewara kuaita miraita panye.

¹⁵Asui Simão Pedru asui amu yuiri Jesus umbuewaa aintausu Jesus rakakuera. Kua saserdutita ruixawa ukunyeseri kua yepe Jesus umbuewaa uwikewaa sala piterupi Jesus irumu.

¹⁶Maa Pedru upuamu ukara kiti ukena ruaki. Asui kua yepe Jesus umbuewaa kua saserdutita ruixawa ukunyeseriwaa usu ukara kiti upurungita irumu kua kunya usaruwaa ukena asui ururi Pedru uka kiti.

¹⁷Asui kua kunya usaruwaa ukena upurandu Pedru unyee: —Maitaa tiserá inde aintarumuara kuaita umbuewaita kua apigawa? Asui unyee: —Umbaa ixe.

¹⁸Asui kuaita upurakiwaita guardaita yuiri aintaumunya tata nyãse irusanga ae, asui aintauyumuaku tata. Asui Pedru uwapika aintapiterupi uyumuaku tata yuiri.

¹⁹Asui kua saserdutita ruixawa upurandu Jesus aintarese kuaita umbuewaita sese yuiri kua umbuewaa.

²⁰Asui Jesus unyee ixupe: —Hambue uyukuawasawa upe kuaita mundu puraita, yawewarawate hambue ainta sinaguga upe templu upe yuiri aintauyumuatiriwaa upe kuaita judewita, timaa nungara hambeu yumimisawa upe.

²¹Marantaa repurandu ixe? Repurandu resendu kuaita usenduwaita ixe sese kua hambeuwaa, aintaukuawate sese kua hambeuwaa.

²²Umbeu irumu kua inyenga yepe guarda apewara unupa Jesus ipu irumu, unyee: —Maitaa yawe renyee ixupe arama kua saserdutita ruixawa?

²³Asui Jesus usuaxara ae, unyee: —Hambeu rame puxi rembeu ixe arama, hambeu rame supiwa marantaa renupa ixe?

²⁴Asui Anaa umundu ae aintaupukuari pukusaware ae Kaifa ipiri amu saserdutita ruixawa.

²⁵Apete Simão Pedru uiku uyumuaku tata. Asui aintaunyee ixupe: —Maitaa indete aintasuiwara kuaita umbuewaita? Asui uyumimi sesewara unyee: —Umbaa ixe.

²⁶Asui yepe saserdutita ruixawa ixupe aramawaa ianama kua Pedru umunukawaa inambi upurandu ae, unyee: —Umbaa será indete hamaawaa irumu kaa kiti?

²⁷Asui Pedru uyumimi yuiri sesewara, asui aramete galu unyengari.

²⁸Asui arire aintaurasu Jesus Kaifa ruka sui Pilatu ruka kiti sera preturiu. Kuemana ainta. Maa tiaintauwike preturiu kiti yawaite aintaumuaiwa aintamanduarisawa, nyãse aintauyumukaturu aintaumbau arama paskua.

²⁹Asui Pilatu usemu aintaruaxara uka sui upurungita arama aintairumu unyee: —Maataa pepurungita puxi sese kua apigawa?

³⁰Asui aintaunyee ixupe arama: —Tirame maa puxuwerawa ae timaa yaruri inde arama ae.

³¹Asui Pilatu unyee ainta supe: —Pepisika ae penyepawate pembeu ipuxuwerasawa maye Muize nyenga umbeuwaa yawe. Asui kuaita judewita aintaunyee ixupe: —Tiyapuderi yayuká yepe pesua.

³²Yawe aintaunyee, aintaumunya arama kuaye Jesus umbeuwaa yawe umbeu irumu ainta supe mayetaa kuri umanu arama ae.

³³Asui Pilatu uwike yuiri preturiu kiti asui usenui Jesus ipiri unyee ixupe arama: —Maitaa judewita ruixawa inde?

³⁴Asui Jesus usuaxara ae, unyee: —Maitaa nerimutara repurandu u amuita umbeu inde arama seresewara?

³⁵Asui Pilatu unyee: —Umbaa judeu ixe. Kuaita nemiraita kuaita saserdutita ruixawaita yuiri aintauentregari inde ixe arama. Maataa remunyawaa?

³⁶Asui Jesus usuaxara ae unyee: —Timaa aintaruixawa ixe kua mundu upe, aintaruixawa rame maa ixe ike kua mundu upe semiraita aintaumaramunya tiarama aintauentregari ixe judewita supe arama. Timaa aintaruixawa mundu pura ixe.

³⁷Asui Pilatu upurandu ixupe: —Supiwa aintaruixawa inde? Asui Jesus usuaxara ae unyee: —Indete rembeu aintaruixawa ixe, sesewara hanaseri, sesewara yuiri hayuiri kua mundu kiti hambeu arama sesewara kua supiwa. Panye kuaita supiwaita aintausendu senyenga.

³⁸Asui Pilatu upurandu ae: —Maataa kua supiwa? Unyee rire yawe usemu ukara kiti aintapiri kuaita judewita, asui unyee ainta supe: —Tihawasemu puxuwerasawa sese.

³⁹Aikue pekustumi hayurawa arama penye arama yepe apigawa paskua rame; maitaa peputari hayurawa penye arama kua judewita ruixawa?

⁴⁰Asui aintausasemu yuiri ixupe, aintaunyee: —Tiyaputari ae maa yaputari Baraba. Mundawasu kua Baraba.