Read Nhengatu Juão 19 Bible Online

Juão 19 - Nhengatu bible

Juão 19

¹Asui Pilatu upisika Jesus uxari aintaunupa ae.

²Asui kuaita suraraita aintaumuruda yuu suiwara ikurua aramawaa asui aintaumundeu iakanga rese ae, asui aintaumundeu ixupe ipupekawa pirangawaa.

³Asui aintausu ipiri aintaunyee: —Purangawaa inde judewita ruixawa, asui aintaunupa ae aintaipu irumu.

⁴Asui Pilatu usemu yuiri uka sui unyee ainta supe: —Haxari penye arama ae pekuawa arama tihawasemu ipuxuwerasawa sese.

⁵Asui Jesus usemu uka sui iakanga resere ikurua yuu suiwara ipupekawa pirangawaa yuiri, asui Pilatu unyee ainta supe: —Ikete kua apigawa.

⁶Asui kuaita saserdutita ruixawaita kuaita yuiri guardaita aintaumaa irumu ae aintausasemu, aintaunyee: —Renupa uyari kurusa rese, renupa uyari kurusa rese. Asui Pilatu unyee ainta supe: —Penyete pepisika ae penupa uyari kurusa rese, nyãse tihawasemu ipuxuwerasawa sese.

⁷Asui kuaita judewita aintausuaxara ae, aintaunyee: —Yarikute inyenga kuximawara, asui kua inyenga uxari umanu arama ae, nyãse umbeute Deus raira ae.

⁸Asui Pilatu usendu irumu aintaunyee yawe, asui usikie turusu xinga.

⁹Asui Pilatu uwike yuiri preturiu kiti, unyee, Jesus supe: —Maa suiwarataa inde? Maa Jesus tiusuaxara ae.

¹⁰Asui Pilatu unyee ixupe: —Maitaa tiresuaxara ixe? Maitaa tiserá rekuawa hapuderi hayurawa inde, hapuderi yuiri haxari aintauyuká inde kurusa rese?

¹¹Asui Jesus usuaxara ae, unyee: —Tirame maa uxari inde arama iwate sui remundu aramawaa ixe timaa nungara repuderi remunya ixe arama, sesewara uriku turusu piri ipekadu kua uentregariwaa ixe inde arama.

¹²Asui arire Pilatu uputari uyurawa Jesus, maa kuaita judewita aintausasemu: —Reyurawa rame kua apigawa timaa Sezar ianama inde, nyãse panye kua umbeuwaa aintaruixawa ae umuruanyana Sezar.

¹³Asui Pilatu usendu irumu aintanyenga, urasu Jesus ukara kiti, asui uwapika serakuenawaa banku rese iwatewaa, kua uwapika rendawa sera Pavimentu, asui ebrewita nyenga rupi aintauseruka ae Gabata.

¹⁴Asui nyã ara aintauyumukaturu paskua runde, kuaji yandara kurasi. Asui unyee ainta supe kuaita judewita: —Ikete peruixawa.

¹⁵Asui aintausasemu: —Remburi ae, remburi ae, renupa uyari kurusa rese, renupa uyari kurusa rese. Asui Pilatu usuaxara ainta: —Maitaa hanupa uyari kurusa kua peruixawa kurusa rese? Asui kuaita saserdutita ruixawaita aintausuaxara aintaunyee: —Tiyariku amu yaneruixawa Sezar sui.

¹⁶Asui Pilatu uentregari ainta supe arama ae, aintaunupa uyari kurusa rese.

¹⁷Asui aintaurasu Jesus, aete urasu ikurusa, aintaurasu ae amu kiti serawaa Kalvariu, ebrewita nyenga rupi serawaa Gulguta.

¹⁸Ape aintaunupa uyari kurusa rese, asui aintaunupa mukuĩ apigawaita kurusa rese Jesus ruaki amu aintauxari suaxara sui amu aintauxari amu ibanda sui asui Jesus uyari aintapiterupi.

¹⁹Asui Pilatu umpinima yepe nyenga asui uxari ae kurusa rakapi rupi, yawe umpinima, Jesus Nazare suiwara judewita ruixawa ae.

²⁰Asui siya judewita aintauleri kua umpinimawaa nyãse kuayentu tetama sui aintaunupa Jesus kurusa rese, umpinima ebrewita nyenga rupi, latim rupi yuiri greguita nyenga rupi yuiri.

²¹Asui kuaita saserdutita ruixawaita aintaunyee Pilatu supe arama: —Terempinima judewita ruixawa ae, maa rempinima, umbeu ixete judewita ruixawa.

²²Asui Pilatu usuaxara ainta: —Hampinimana kua hampinimawaa.

²³Asui kuaita suraraita aintaunupa rire Jesus uyari kurusa rese aintauyupartiri irupa rese aintaupisika arama aintayaweyawe, asui kua ipupekawa yuiri kua tiwa uriku uyumuikasawa nyãse aintaumunyawaa ae yepenyute sakapira sui supita kiti.

²⁴Asui aintaukuntari aintapawa, aintaunyee: —Purangate tiyamusuruka ae, purangate yaxari sese surti yakuawa arama awataa upita irumu. Aintaumunya maye aintaumpinimawaa yawe kuxima, aintauyupartiri serupa rese asui aintauxari surti sepupekawa rese. Yawe aintaumunya kuaita suraraita.

²⁵Asui Jesus imaya upuamu kurusa ruaki, kua iamu yuiri kua Maria kua Klupa rimiriku asui amu yuiri kua Maria Madalena.

²⁶Asui Jesus umaa irumu imaya suaki kua umbuewaa ugustariwaa unyee ixupe: —Kunya, remaa nembira.

²⁷Asui unyee umbuewaa supe arama: —Remaa kua nemaya. Asui nyã ura rire kua umbuewaa urasu imaya suka kiti.

²⁸Asui arirewara Jesus ukuawa irumu umbawana panye imuraki, umbeu kuaye, aintaumpinimawaa yawe kuxima: —Tikangana sepia.

²⁹Aikue yepe siru teresemu vinagri. Asui aintaumuyapumi yepe espunja vinagri upe aintaupukuari ae mirá rakapi rupi aintausupiri arama Jesus yuru upe.

³⁰Asui Jesus uu rire kua vinagri umbeu: —Hambauwana semuraki. Asui uxari iakanga uwari, asui ianga usuana ipira sui.

³¹Nyã ara aintauyumukaturu arama paskua runde asui timaa aintauputari aintauxari aintapira uyari kurusa rese sauru rame, nyãse purangawaa kua ara serawaa sauru, asui kuaita judewita aintaupurandu Pilatu uxari arama aintaumpena aintaretima aintaumuye arama ainta kurusa sui.

³²Asui kuaita suraraita aintausu aintauyupiru aintaumpena setima kua amu asui amu yuiri kuaita aintaunupawaita aintauyari kurusa rese Jesus ruaki.

³³Asui aintausika rame aintaumaa Jesus umanu asui tiaintaumpena setima.

³⁴Asui yepe aintasuiwara kuaita suraraita ukutuka iarukanga rese lansa irumu asui usemu isui tuwi ii yuiri.

³⁵Asui kua umaawaa ae umbeu sesewara, nyãse supiwa umbeuwaa, ukuawate umbeu supiwa peruyari arama kuri yuiri ae.

³⁶Yawe umunya, umunya arama kuaye Deus nyenga umbeuwaa yawe, tikuri aintaumpena yepe ikãwera.

³⁷Deus nyenga umbeu yuiri, aintaumaa kuri kua aintaukutukawaa.

³⁸Asui arire Juze Arimateia suiwara yepe Jesus umbuewaa ae yumimisawa upe nyãse usikie aintasui kuaita judewita, usu Pilatu ipiri upurandu isui umuye arama kurusa sui Jesus ipira. Asui Pilatu uxari ixupe ae. Asui usu urasu Jesus ipira.

³⁹Asui Nikudemu yuiri kua usuwaa Jesus ipiri pituna rame, urasu kuaji sinkuenta kilu umunaniwaa mirra alue irumu.

⁴⁰Asui aintaurasu ipira kuera asui aintaupupeka ae fazenda turusuwaa irumu kua sakuenawaa irumu yuiri maye aintaumunyawaa yawe kuaita judewita aintaumukaturu irumu umanuwaita iwi kuara runde.

⁴¹Ape yepe iwite kuayentu isui kua aintaunupawaa akiti Jesus uyari kurusa rese, ape yuiri yepe iwi kuara pisasuwaa tiware aintauxari umanuwaa ipupe.

⁴²Akiti aintauxari Jesus ipira kuera nyãse kuayentu kua iwi kuara, asui nyã arate aintauyumukaturu paskua runde kuaita judewita.