Read Nhengatu Juão 2 Bible Online

Juão 2 - Nhengatu bible

Juão 2

¹Asui musapiri ara rire aintaumunya kazamentu Kanaã Galileya upe, apete yuiri Jesus imaya.

²Aintaukunvidari yuiri Jesus umaa arama kazamentu umbuewaita yuiri.

³Asui vinyu upawa rire aintasui Jesus imaya unyee ixupe: —Tiana aintauriku vinyu.

⁴Asui Jesus unyee ixupe: —Inde kunya mayetaa inde seirumu, tire usika serangawa.

⁵Asui imaya unyee empregaduita supe: —Pemunya panye kua umbeuwaa penye arama.

⁶Aikue seis kamuti ita suiwara aintaumukaturuwaa ipupe ii kuaita judewita upisikawaita kuatru lata u seis lata ii.

⁷Asui Jesus unyee ainta supe: —Pemuteresemu ii irumu kamutiita. Asui aintaumuteresemu panye ainta.

⁸Asui unyee ainta supe: —Peyuka isui ae perasu ixupe arama kua uka iyara. Asui aintaumunya kuaye umbeuwaa yawe.

⁹Asui kua uka iyara usaã rire kua ii uyerewana vinyu arama tiukuawa maa suiwarataa ae, maa empregaduita uyukawaita kua ii aintaukuawa ae, asui usenui kua nuivu.

¹⁰Asui unyee ixupe: —Panye miraita aintauyupiru aintauxari kua vinyu purangawaa asui aintauu rire aintaapu asui aintauxari kua vinyu puxuwerawa, maa inde remukaturu kua vinyu purangawaa ate kuiri.

¹¹Yawe Jesus uyupiru umunya milagri Kanaã Galileya upe, umukame aintaumaa igluria, asui umbuewaita uxari ipia sese.

¹²Asui arire usu Kafarnaum kiti imaya irumu imuita yuiri umbuewaita yuiri, ape aintauiku yepeyepe ara.

¹³Asui kuayentuana judewita uyumuatiriwaa sera paskua Jesus usu Jeruzalẽ kiti.

¹⁴Asui uwasemu templu upe kuaita uvenderiwaita bui uvelya yuiri pumba yuiri asui kuaita yuiri utrukariwaita dinyeru aintauwapika meza ruaki.

¹⁵Asui umunya yepe xikuti tupasama suiwara asui umusemu panye ainta templu sui panye uvelya panye bui yuiri asui umburi aintadinyeru iwi kiti kuaita utrukariwaita asui umuyereu aintameza yuiri.

¹⁶Asui umbeu ainta supe kuaita uvenderiwaita pumba: —Perasu ainta tepemunya negusiu sepaya ruka upe.

¹⁷Asui umbuewaita aintaumanduari kua aintaumpinimawaa kuxima, harikute hasaru kirimbawa neruka.

¹⁸Asui kuaita judewita aintaupurandu ae: —Mayewataa milagri remukame arama yamaa maa resewarataa remunya kuaye?

¹⁹Asui Jesus usuaxara ainta: —Pemburi kuri uwari kua templu asui musapiri ara rire kuri hampuamu kuri ae.

²⁰Asui aintausuaxara kuaita judewita: —Kuxima aintaumunya kua templu kuarenta seis akayu upe, maa inde reputari resupiri ae musapiri ara upe.

²¹Maa ipira kua templu umbeuwaa sese.

²²Asui Jesus upuamu rire manusawa sui kuaita umbuewaita aintaumanduari kua umbeuwaa, asui aintauxari aintapia Deus nyenga rese Jesus nyenga rese yuiri.

²³Uiku pukusaware Jeruzalẽ upe aintafesta paskua upe siya miraita aintauxari aintapia sera rese aintaumaa resewara milagri umunyawaita.

²⁴Maa timaa Jesus uxari ipia aintarese nyãse ukuawate aintaumanduariwaa panye.

²⁵Asui timaa presizu amu umbeu ixupe aintaresewara kuaita miraita nyãse ukuawate aintapia upe panye miraita.