Read Nhengatu Juão 3 Bible Online

Juão 3 - Nhengatu bible

Juão 3

¹Ape yepe apigawa aintasuiwara kuaita farizewita, judewita ruixawa ae, sera Nikudemu.

²Uri Jesus ipiri pituna rame unyee ixupe: —Inde rembuewaa yakuawate Deus suiwara inde, nyãse tiawa upuderi umunya milagri kuaye remunyawaa yawe tirame irumute Deus.

³Asui Jesus usuaxara ae: —Supiwa hambeu inde arama, tiawa upuderi umanduari suixawa arama kua Deus tirame unaseri pisasua.

⁴Asui Nikudemu unyee ixupe: —Maitaa tuyuwewaa upuderi unaseri? Maitaa upuderi uwike imaya imarika kiti unaseri arama mukuĩsawa?

⁵Asui Jesus unyee ixupe arama: —Supiwa hambeu inde arama, tirame awa unaseri ii irumu Espiritu irumu yuiri tiupuderi umanduari suixawa arama kua Deus.

⁶Awa unaseri umaa kua mundu; mundu iyarate ae, maa awa unaseri Espiritu irumu Espiritu supe aramate ae.

⁷Teneakayemu resendu kua hambeuwaa inde arama, perikute penaseri pisasua.

⁸Kua iwitu upeyu maa kitintu uputari, resendu ae maa tirekuawa maa suiwarataa ae timaa yuiri rekuawa maa kiti usu, yawete yuiri panye kuaita unaseriwaita Espiritu irumu.

⁹Asui Nikudemu upurandu ae: —Mayetaa kua rembeuwaa?

¹⁰Asui Jesus unyee ixupe: —Indete rembuewaa kuaita Israelitaita, ape marantaa tirekuawa mayesawataa kua hambeuwaa?

¹¹Supiwa hambeu inde arama, yambeu penye arama kua yakuawawaa yambeu sesewara kua yamaawaa maa tiperuyari yanenyenga.

¹²Hambeu rame maa penye arama sese kua mundu pura timaa peruyari senyenga, maitaa maa peruyari senyenga hambeu rame maa penye arama sese kua iwaka upewara?

¹³Tire awa uyupiri iwaka kiti isui kua unaseriwaa umaa kua ara uwiyewaa asui.

¹⁴Maye Muize usupiriwaa yawe buya kampu upe yawete yuiri aintaurikute aintausupiri kua unaseriwaa umaa kua ara.

¹⁵Aintauriku arama kuri mundu tiwa upawa panye kuaita uxariwaita aintapia sese.

¹⁶Maa Deus ugustari turusu kuaita mundu puraita, ape umundu ainta supe arama taira yepenyuwaa, tiarama kuri aintaukanyemu panye kuaita uxariwaita aintapia sese, maa aintauriku arama mundu nunkawaa upawa.

¹⁷Nyãse timaa Deus umundu taira kua mundu kiti umbeu arama puxi aintarese kuaita mundu puraita maa umundu ae aintauyumukaturu arama sesewara.

¹⁸Awa uxari ipia sese tikuri umbeu puxi sese, maa awa tiuxari ipia sese umbeuwana puxi sese nyãse tiuxari ipia sera rese kua Deus raira yepenyuwaa.

¹⁹Asui puxi umbeu aintarese nyãse kua turi uri kua mundu kiti asui kuaita apigawaita aintaugustari aintauwata pitunawasu upe isui kua turi nyãse puxuwera aintaumunyawaita.

²⁰Maa panye kuaita umunyawaita puxuwera aintaipiaiwa aintaumaa kua turi asui tiaintauputari aintauri turi ruaki yawaite umuyukuawa aintaumunyawaita puxuwerawaita.

²¹Maa kua umunyawaa supiwa uri umusuaki kua turi umuyukuawa arama umunyawaita purangawaita Deus rese.

²²Asui arire Jesus usu Judeya kiti umbuewaita irumu, asui uiku akiti asui ubatizari.

²³Asui Juão ubatizari Enum kiti kuayentu Salim sui, nyãse ape turusu parana, akiti yuiri aintauyumuatiri kuaita miraita asui ubatizari ainta.

²⁴Nyãse tire prezu kua Juão.

²⁵Asui aintauyupurungita kuaita Juão umbuewaita yepe judeu irumu sese kua kustumi aintaumuyasuka aramawaa ipupe.

²⁶Asui aintausu Juão ipiri aintaumbeu ixupe: —Inde rembuewaa kua uikuanawaa neirumu parana Jurdão ruaxara, kua rembeuwaa sesewara, ubatizari uiku, asui siya miraita uyatiri ipiri.

²⁷Asui Juão unyee ainta supe arama: —Nemaa aintaupuderi aintauriku kuaita miraita tirame Deus uxari ainta supe arama ae.

²⁸Penyete pekuawa kua hambeuwaa penye arama, umbaa Kristu ixe, maa Deus umunduwaa ixe senunde kiti.

²⁹Aete kua nuivu uriku kua nuiva, asui kua nuivu ianama suakiwara suuri usendu inyenga uyumusuuri kua nuivu nyenga resewara. Kuiri yawete ixe yuiri, suuri ixe.

³⁰Urikute uyukiriari maa ixe harikute hayumukuaira.

³¹Aintaara kiti piriwaa kua uriwaa iwate sui, asui kua uriwaa mundu sui mundu pura ae upurungita mundu rese, kua uriwaa iwaka sui aintaara kiti piriwaa ae panye sui.

³²Upurungita sese kua umaawaa usenduwaa yuiri, maa tiawa uruyari kua umbeuwaa.

³³Maa kua uruyariwaa umbeuwaa uxari yakuawa supiwa kua Deus.

³⁴Nyãse kua Deus umunduwaa umbeu Deus nyenga, nyãse tikuaira Deus uxari ixupe Espiritu.

³⁵Kua ipaya ugustari taira, asui uxariana panye maantu ipu upe.

³⁶Ape awa uxari ipia taira rese uriku mundu nunkawaa upawa, maa awa tiuruyari taira timaa kuri umaa mundu nunkawaa upawa, maa Deus ipiaiwa kuri umaa ixupe arama yawewarawate.