Read Nhengatu Juão 4 Bible Online

Juão 4 - Nhengatu bible

Juão 4

¹Asui yaneruixawa ukuawa irumu kuaita farizewita aintaukuawa uriku siya umbuewaita ubatizariwaita yuiri Juão sui,

²Umbaa Jesus ubatizari anyunte umbuewaita aintaubatizari,

³Asui usu Judeya sui usu arama mukuĩsawa Galileya kiti.

⁵Asui usika yepe tetama Samaria upewaa sera Sikar kuayentu isui kua kampu Jaku uxariwaa kuera taira Juze supe.

⁶Ape Jaku umunyawaa yepe pusu uyuka arama ii; asui Jesus usu uwapika pusu ruaki nyãse ikuereana uwata viaji rupi, kuaji yandara kurasi.

⁷Asui uri kua kunya Samaria suiwara uyuka arama ii. Asui Jesus upurandu ae: —Remee hau arama ii.

⁸Nyãse umbuewaita aintausure aintaupiripana aintaumbau arama tetama kiti.

⁹Asui kua kunya Samariawara unyee ixupe: —Maitaa inde judeu repurandu seirumu reu arama ii ixe Samariawara? Nyãse kuaita judewita nemaa nungara aintauriku Samariawaraita irumu.

¹⁰Asui Jesus usuaxara ae: —Rekuawa rame maa kua Deus uxariwaa kua upuranduwaa yuiri neirumu, remee hau ii, repurandu maa irumu reu arama ii upakawaa.

¹¹Asui kua kunya unyee ixupe: —Seruixawa siru tireriku reyuka arama ii, nyãse kua pusu tiipi ae, maa suiwarataa kua ii upakawaa rerikuwaa?

¹²Maitaa puranga piriwaa inde isui kua Jaku uxariwaa yande arama kua pusu uuwaa ape ii panye tairaita panye simbawaita yuiri?

¹³Asui Jesus unyee ixupe: —Awa uu kua ii iisi mukuĩsawa.

¹⁴Maa awa kuri uu kua ii hameewaa ixupe nẽ mairame kuri iisi ae, maa kua ii hameewaa ixupe arama uikuwaa kuri ipia upe kuaye ii rukena yawe umee aramawaa ixupe mundu nunkawaa upawa.

¹⁵Asui unyee ixupe arama kua kunya: —Seruixawa remee ixe arama nyã ii tiarama kuri seisi mukuĩsawa tiarama kuri hayuiri hayuka ii ike.

¹⁶Asui Jesus unyee ixupe: —Resu resenui nemena asui reyuiri kua kiti.

¹⁷Asui kua kunya unyee ixupe: —Tihariku semena. Asui Jesus unyee ixupe: —Supiwa rembeuwaa, tireriku nemena.

¹⁸Nyãse reriku kuera sinku nemena, asui kua uikuwaa neirumu kuiri umbaa nemena ae, supiwa rembeuwaa.

¹⁹Asui kua kunya unyee ixupe: —Seruixawa, hakuawa utitikawaa inde.

²⁰Yaneramunyaita aintaupurandu kuera Deus irumu sese kua iwitera, maa penye pembeu yarikute yapurandu Deus irumu Jeruzalẽ kiti.

²¹Asui Jesus unyee ixupe: —Kunya, repuderi reruyari senyenga, amu ara kuri tiainta upurandu yanepaya irumu sese kua iwitera tiyuiri Jeruzalẽ kiti.

²²Penye pepurandu irumu kua tiwa pekunyeseri, maa yande yapurandu irumu kua yakunyeseriwaa, nyãse kua salvasão uri judewita sui.

²³Amu ara kuri, maa usikana kuiri, aintaupurandu arama yanepaya irumu, aintaupurandu kuri irumu supiwa aintapia sui nyãse yanepaya usikari yawewaita aintaupurandu arama irumu.

²⁴Espiritu kua Deus, asui kuaita upuranduwaita irumu aintaurikute aintaupurandu aintapia sui supiwa.

²⁵Asui kua kunya unyee ixupe: —Hakuawate uri kuri kua Mesia aintauserukawaa Kristu, asui usika rame kuri umbeu kuri yande arama panye mayewaa rese.

²⁶Asui Jesus umbeu ixupe kua kunya: —Ixete kua rembeuwaa, ixete kua hapurungitawaa neirumu.

²⁷Asui aramete umbuewaita aintauyuiri usika, aintaakayemu aintaumaa Jesus upurungita irumu kua kunya, maa tiawa upurandu ae: —Maataa reputari u marantaa repurungita irumu kua kunya?

²⁸Asui kua kunya uxari kua ikamuti asui usu tetama kiti asui umbeu ainta supe kuaita miraita,

²⁹Peyuiriana seirumu pemaa arama yepe apigawa umbeuwaa ixe arama panye hamunyawaita. Maitaa tiserá aete kua Kristu?

³⁰Asui aintausu tetama sui aintaumaa arama ipiri.

³¹Asui kuaita umbuewaita aintaupurandu ae umbau arama aintaunyee: —Rembau inde rembuewaa yande.

³²Asui unyee ainta supe: —Harikute hambau aramawaa tiwa pekunyeseri.

³³Asui kuaita umbuewaita aintauyupurungita aintapawa, aintaunyee: —Maitaa yepe ururiana umbau aramawaa?

³⁴Asui Jesus unyee ainta supe: —Hambau aramawaa aete kua hamunya aramawaa kuaye uputariwaa yawe kua umunduwaa ixe hambauwaa arama kua imuraki.

³⁵Maitaa tipembeu, kuatru yasi rundere aintauyupiru aintaupuu. Maa hambeu penye arama: —Pemaa apekatu kiti pemaa arama aintamitima nyãse tiaruana ae aintaupuu arama ainta.

³⁶Kua upuusara uriku sikuyara, asui umuatiri iya mundu tiwa upawa kiti, asui kua uyutimawaa uyumusuuri kuri irumu kua upuusara.

³⁷Nyãse supiwa kua aintaumbeuwaa, yepe uyutimasara asui amu upuusara.

³⁸Hamundu penye pepuu arama kua tiwa peyutima, amuita aintaupuraki asui penye pewike aintamuraki upe.

³⁹Asui siya Samariawaraita nyã tetama suiwaraita aintauxari aintapia sese sesewara kua kunya umbeuwaa, unyee ainta supe: —Umbeu ixe arama panye hamunyawaita.

⁴⁰Asui aintauri kuaita Samaria suiwaraita Jesus ipiri aintaupurandu ae uiku arama aintairumu, asui uiku aintairumu mukuĩ ara.

⁴¹Asui siyapiri aintauxari aintapia sese inyenga resewara.

⁴²Asui aintaunyee ixupe kua kunya: —Kuiri tiyaruyari nenyenga resewara, maa kuiri yaruyari nyãse yasenduana yandepawate asui yakuawate supiwa aete kua umukaturuwaa kuaita mundu puraita.

⁴³Asui mukuĩ ara rire uyuiri aintasui usu Galileya kiti.

⁴⁴Asui Jesus umbeu: —Kuaita utitikawaita tipuranga aintaumaa ainta aintarendawa upe.

⁴⁵Asui usika irumuana Galileya kiti kuaita Galileya upewaraita aintausuanti ae nyãse aintaumaa panye umunyawaita Jeruzalẽ upe festa upe, nyãse aintausu yuiri aintaumaa akiti.

⁴⁶Asui usu yuiri mukuĩsawa Kanaã Galileya kiti umuyereuwaa ape vinyu ii irumu. Ape yepe tuixawa rumuara raira imãsiwaa Kafarnaum kiti.

⁴⁷Usendu rireana Jesus uri Galileya kiti Judeya sui usu upurandu ae umukaturu arama taira nyãse umanu putariana uiku.

⁴⁸Ape Jesus unyee ixupe: —Tirame pemaa milagri tiperuyari nẽ kuaira.

⁴⁹Asui kua tuixawa rumuara upurandu Jesus: —Seruixawa, reyuiriana tiramere umanu kua seraira.

⁵⁰Asui Jesus unyee ixupe: —Resuana, upakate neraira. Asui kua apigawa uruyari Jesus nyenga asui usuana.

⁵¹Asui usuwaa irumu kuaita impregaduita aintauwasemu ae aintaunyee ixupe: —Upakate neraira.

⁵²Asui upurandu ainta maa urataa purangana taira. Asui aintaumbeu ixupe: —Kuaji yandara rame kurasi irusangana ipira.

⁵³Asui kua taina ipaya ukuawa purangana taira Jesus umbeu irumute: —Upakate neraira. Asui uxari ipia Jesus rese panye suka puraita yuiri.

⁵⁴Yawe Jesus umunya kua milagri mukuĩsawa uyuiri rire Judeya sui Galileya kiti.