Read Nhengatu Juão 5 Bible Online

Juão 5 - Nhengatu bible

Juão 5

¹Asui yawe rire aintaumunya festa kuaita judewita, asui Jesus usu Jeruzalẽ kiti.

²Ape Jeruzalẽ upe yepe lagu miri kuayentu uvelyaita rukena sui sera Betesda ebreu nyenga rupi, uriku sinku kupiara.

³Ape aintauwapika siya imãsiwaita sesaimawaita, alejaduita yuiri, membekawaita yuiri ipira.

⁴Aintausaru uriri kua lagu miri. Nyãse yepe anju uwiye amu rame uxari arama uriri kua lagu miri, asui awa uwikewaa primeru nyã lagu upe uriri rire purangana ae imãsisawa sui.

⁵Ape yepe apigawa imãsiwaa urikuana trinta uitu akayu imãsi.

⁶Asui Jesus umaa ixupe ukuawa sese urikuana siya akayu imãsi, asui upurandu ae unyee ixupe: —Maitaa reputari puranga inde?

⁷Asui kua imãsiwaa unyee ixupe: —Tihariku serumuara uajudari arama ixe hawike lagu miri upe uriri rire ae, asui hasu irumu amu uwike serunde.

⁸Asui Jesus unyee ixupe: —Repuamu, repisika nekama resu arama.

⁹Asui aramete kua apigawa umaa purangana ae asui upisika ikama asui upuamu uwatana. Sauru nyã ara.

¹⁰Asui kuaita judewita aintaumbeu ixupe kua Jesus umukaturuwaa: —Kuiri sauru ara, tipuranga rerasu nekama.

¹¹Asui usuaxara ainta: —Kua umukaturuwaa ixe, unyee ixe arama: —Repisika nekama resu arama.

¹²Asui aintaupurandu ae: —Awataa kua apigawa umbeuwaa inde arama, repisika nekama resu arama?

¹³Maa kua umukaturuwaa tiukuawa awataa ae, nyãse Jesus uyuiriana aintasui, nyãse siya miraita akiti.

¹⁴Asui arirewara Jesus usu uwasemu ae templu upe asui unyee ixupe: —Remaa purangana inde, kuiri remaa nesui tiarama remunya nepuxuwerasawa tiarama puxuwera piri reiku.

¹⁵Asui kua apigawa usu isui asui umbeu kuaita judewita supe arama Jesus kua umukaturuwaa ae.

¹⁶Asui kuaita judewita aintaumuruanyana Jesus nyãse umukaturu ae sauru rame.

¹⁷Maa Jesus unyee ainta supe: —Sepaya upuraki ate kuiri, ixe yuiri hapuraki.

¹⁸Asui sesewara (arampiri) aintauputari piri aintauyuká ae kuaita judewita nyãse umuaiwa sauru, asui umbeu yuiri ipayate Deus, umbeu yepewasute Deus irumu ae.

¹⁹Asui Jesus unyee ainta supe: —Supiwa hambeu penye arama: —Kua taira tiupuderi umunya simutara, anyunte umunya kua umaawaa ipaya umunya, nyãse panye kua ipaya umunyawaa taira umunya yuiri.

²⁰Nyãse ipaya ugustari taira asui umukame umaa panye umunyawaa, asui umukame yuiri umaa umunyawaa puranga piriwaa isui peakayemu arama pemaa.

²¹Nyãse yawe ipaya usupiriwaa yawe umanuwaita umbaka ainta yawete yuiri taira umbaka kuaita uputariwaita.

²²Umbaa ipaya umbeu aintapekadu rese maa uxari taira umbeu arama aintapekadu,

²³Aintaurespetari arama kua taira panye ainta maye aintaurespetariwaa yawe ipaya. Awa tiurespetari kua taira tiyuiri urespetari ipaya kua umunduwaa ae.

²⁴Supiwa hambeu penye arama: —Awa usendu senyenga uxari yuiri ipia sese kua umunduwaa ixe uriku mundu nunkawaa upawa, tikuri Deus umbeu ipekadu rese, nyãse usasawana manusawa sui upakawaa kiti.

²⁵Supiwa hambeu penye arama: —Amu ara kuri, kuiri yuiri usikana sangawa, kuaita umanuwaita aintausendu kuri inyenga kua Deus raira, asui kuri aintaupaka kuaita usenduwaita ae.

²⁶Nyãse kuaye upakawaa yawe simutara kua ipaya, yawete yuiri uxariana upaka simutara kua taira.

²⁷Asui uxari ixupe arama ikirimbawasawa umbeu arama aintaresewara panye, nyãse aete kua unaseriwaa umaa kua ara.

²⁸Tepeakayemu pesendu, nyãse amu ara kuri panye kuaita iwi kuara upewaita aintausendu kuri inyenga asui kuri aintausemu isui.

²⁹Asui kuri kuaita umunyawaita puranga aintausemu kuri aintauwike arama mundu upakawaa kiti, asui kuaita umunyawaita puxuwera aintausemu kuri aintaumaa arama mundu puxuwerawa kiti.

³⁰Timaa nungara hamunya serimutara, anyunte hambeu aintarese kuaye hasenduwaa yawe. Supiwa hambeu aintarese nyãse timaa hamunya kuaye haputariwaa yawe anyunte haputari hamunya kuaye uputariwaa yawe kua umunduwaa ixe.

³¹Hambeu rame maa seresepawate timaa supiwa kua hambeuwaa.

³²Aikuete yepe umbeuwaa serese asui hakuawa supiwa umbeuwaa serese.

³³Penye pemundu aintaupurandu Juão irumu asui umbeu penye arama inyenga supiwa.

³⁴Timaa haruyari apigawa umbeuwaa serese, maa hambeu penye arama kua hambeuwaa peyumukaturu arama.

³⁵Aete yepe turi sendiwaa umuturi puranga, asui peputari peyumusuuri kuera kuaira umuturiwaa upe.

³⁶Maa aikue yepe puranga piriwaa Juão sui umbeuwaa serese, nyãse kua muraki sepaya uxariwaa hamunya arama aete kua umbeuwaa serese sepaya umunduwaa ixe.

³⁷Aete kua sepaya umunduwaa ixe aete kua umbeuwaa serese. Nẽ mairame pesendu upurungita tiyuiri pemaa ae.

³⁸Tiyuiri inyenga uiku pepia upe nyãse tipexari pepia sese kua umunduwaa.

³⁹Pemaate aintaumpinimawaa Deus nyenga upe nyãse pemanduari pewasemu arama mundu nunkawaa upawa ipupe, aete kua umbeuwaa serese.

⁴⁰Maa tipeputari peyuiri sepiri periku arama mundu nunkawaa upawa.

⁴¹Tihareseberi kua purangawaa apigawaita umeewaa ixe arama.

⁴²Hakuawate tiperiku pepia upe kua Deus ugustarisawa.

⁴³Hayuiri sepaya rera rese asui tipesuanti ixe, maa uri rame maa yepe sera resepawa anyunte maa pesuanti ae.

⁴⁴Maitaa maa pepuderi pexari pepia puranga penye pereseberiwaita amu umeewaa penye arama purangawaa, maa tipesikari kua purangawa uriwaa isui kua Deus yepenyuwaa?

⁴⁵Tepemanduari hambeu puxi peresewara sepaya supe, aete kua Muize pexariwaa pepia sese, aete umbeuwaa puxi perese.

⁴⁶Pexari rame maa pepia Muize rese pexari maa pepia serese yuiri nyãse kuxima umpinima serese.

⁴⁷Tirame maa peruyari umpinimawaa, maitaa maa peruyari kuri senyenga.