Read Nhengatu Juão 6 Bible Online

Juão 6 - Nhengatu bible

Juão 6

¹Asui arire Jesus uyasawa lagu ruaxara serawaa Galileya aintauserukawaa yuiri Tiberiade.

²Asui siya miraita aintausu sakakuera aintaumaa resewara umukaturu kuaita mãsiweraita.

³Asui Jesus uyupiri iwitera rese ape uwapika umbuewaita irumu.

⁴Nyãse kuayentuana judewita festa serawaa paskua.

⁵Asui Jesus usupiri sesa umaa kuaita siyawaita aintauri ipiri asui unyee Filipe supe: —Mametaa yawasemu pão aintaumbau aramawaa?

⁶Yawe unyee nyãse uputari usaã umanduarisawa, nyãse ukuawate mayetaa umunya arama.

⁷Asui Filipe unyee ixupe: —Duzentu dinyeru tiusika yapiripana arama pão aintaumbau arama yepe pedasu aintayaweyawe.

⁸Asui yepe umbuewaa Simão Pedru imu sera Andre umbeu Jesus supe:

⁹—Aikue yepe kurumi uriku sinku pão mukuĩ pirá miri, maitaa maa ainta, siyawaita miraita supe?

¹⁰Asui Jesus unyee: —Pexari aintauwapika kuaita miraita, nyãse purangawaa kapĩ ape. Asui aintauwapika kuaji sinku mili pesua aintasiyasawa kuaita apigawaita.

¹¹Asui Jesus upisika nyã pão asui umee rire grasa sese upartiri ainta supe kuaita uwapikawaita asui pirá yuiri maye aintauputari.

¹²Asui aintaapuana Jesus umbeu umbuewaita supe: —Pemuatiri panye simirera tiarama yaiwa ainta.

¹³Asui aintaumunya maye umbeuwaa yawe asui aintaumuteresemu duzi sextu simirera aintaumbauwaa rire sinku pão.

¹⁴Asui kuaita miraita aintaumaa irumu kua milagri aintaumbeu: —Supiwa aete kua utitikawaa uriwaa kua mundu kiti.

¹⁵Asui Jesus ukuawa irumu aintauputari aintauwafursari aintaruixawa arama ae asui usu aintasui iwitera kiti anyuira.

¹⁶Asui karuka rame umbeuwaita aintauwiye lagu rimbiwa kiti.

¹⁷Asui aintauwiye igara upe aintauyasawaa arama lagu ruaxara kiti Kafarnaum kiti. Asui pitunana umbaare Jesus usika aintapiri.

¹⁸Asui uri aintaruaxara iwitu furtiwaa asui gapenu ae.

¹⁹Asui aintauyapukui rire sinku u seis kilumetru aintaumaa Jesus uwata parana arupi uri aintapiri igara kiti, asui aintausikie turusu.

²⁰Maa Jesus unyee ainta supe: —Ixete kua, tepesikie.

²¹Asui suuri aintausuanti ae, asui aramete aintausikana maa kiti aintausuwaa igara upe.

²²Asui wirande kiti kuaita miraita upitawaita lagu ruaxara aintaumaa yepenyu igara uiku garapa kiti aintaukuawate tiJesus usu umbuewaita irumu nyãse umbuewaita aintausu aintapawate.

²³Asui amu igara usika Tiberiade sui kuayentu isui aintaumbauwaa ape pão yaneruixawa umeewaa rire grasa.

²⁴Asui kuaita miraita siyawaita aintaumaa irumu tiyamaa Jesus nẽ umbuewaita yuiri, aintauwiye igara upe aintausu arama Kafarnaum kiti.

²⁵Asui aintauwasemu irumu ae lagu ruaxara kiti aintaunyee ixupe: —Inde rembuewaa mairametaa resika kua kiti?

²⁶Asui Jesus unyee ainta supe: —Supiwa hambeu penye arama timaa pesikari ixe hamunya resewara milagri, anyunte pesikari ixe pembau resewara peapu kua pão.

²⁷Tepepuraki sesewara kua pão ukanyemuwaa maa pepuraki sesewara kua tiwa kuri ukanyemu umeewaa penye arama kua usemuwaa umaa kua mundu maa yawe yanepaya Deus uxariwaa yawe.

²⁸Asui aintaunyee ixupe arama: —Maataa kuri yamunya, yamunya arama kua Deus muraki?

²⁹Asui Jesus usuaxara ainta: —Aete kua Deus muraki pexari arama pepia sese kua umunduwaa.

³⁰Asui aintaunyee ixupe: —Maataa milagri remunya yamaa yaxari arama yanepia nerese? Maataa kua remunyawaa?

³¹Yaneramunyaita aintauu pão serawaa mana kampu upe maye aintaumpinimawaa yawe kuxima, uxariana ainta supe arama pão iwaka suiwara.

³²Asui Jesus unyee ainta supe: —Supiwa hambeu penye arama umbaa Muize uxariwaa penye arama kua pão iwaka suiwara, maa sepaya uxariwaa penye arama kua pão supiwa iwaka suiwara.

³³Nyãse Deus pão kua uwiyewaa iwaka sui uxariwaa sikuesawa mundu puraita supe arama.

³⁴Asui aintaunyee ixupe: —Yaneruixawa, rexari yande arama kua pão yawewarawate.

³⁵Asui Jesus unyee ainta supe: —Ixete kua pão upakawaa, awa uri sepiri nunka kuri upurara yumãsi, asui awa uxari ipia serese nunka kuri iisi.

³⁶Maa hambeu penye arama: —Pemaa pukusawa ixe tipexari pepia serese.

³⁷Aintaruwi kuri sepiri panye kuaita sepaya umeewaita ixe arama, asui nẽ mairame kuri hamburi sesui ainta kuaita uriwaita sepiri.

³⁸Nyãse tihawiye iwaka sui hamunya arama kuaye haputariwaa yawe, maa hamunya arama kuaye uputariwaa yawe kua umunduwaa ixe.

³⁹Asui kua umunduwaa ixe tiuputari nẽ yepe haxari uyusupari aintasuiwara kuaita uxariwaita ixe arama maa uputari hasupiri ainta anyu aramawaa ara upe.

⁴⁰Maa sepaya uputari muiri kuaita umaawaita taira uxariwaita yuiri aintapia sese aintauriku arama mundu nunkawaa upawa asui hasupiri kuri ainta anyu aramawaa ara upe.

⁴¹Asui kuaita judewita aintaupurungita Jesus rese nyãse umbeu: —Ixete kua pão uwiyewaa iwaka sui.

⁴²Asui aintaunyee: —Maitaa tiserá Jesus kua Juze raira? Maitaa tiserá yakunyeseri ipaya imaya yuiri? Maitaa maa umbeu kuiri, hawiye iwaka sui?

⁴³Asui Jesus unyee ainta supe: —Tepepurungita penyepawate.

⁴⁴Tiawa uri sepiri tirame urasu ixe arama ae kua sepaya umunduwaa ixe kua kiti, asuiwana kuri hasupiri ae anyu aramawaa ara upe.

⁴⁵Kuaita utitikawaita aintaumpinima, Deus umbue kuri panye kuaita miraita, ape panye kuaita usenduwaita uyumbuewaita sepaya irumu aintauri kuri sepiri.

⁴⁶Maa tiawa umaa sepaya Deus anyunte kua uriwaa Deus sui umaa ae.

⁴⁷Supiwa hambeu penye arama: —Awa kuri uxari ipia sese uriku kuri mundu nunkawaa upawa.

⁴⁸Ixete kua pão upakawaa.

⁴⁹Peramunyaita aintauu pão serawaa mana kampu upe, asui aintaumanu.

⁵⁰Aete kua pão uriwaa iwaka sui aintauu arama kuri ae kuaita miraita tiarama kuri aintaumanu.

⁵¹Ixete kua pão upakawaa uwiyewaa iwaka sui, awa kuri uu kua pão upakate kuri ae yawewarawate, asui serukuera kua pão hameewaa ainta supe arama kuaita mundu puraita.

⁵²Asui kuaita judewita aintauyupurungita aintapawa, aintaunyee: —Maitaa upuderi uxari yau arama sukuera?

⁵³Asui Jesus usuaxara ainta, unyee: —Supiwa hambeu penye arama tirame peu sukuera kua usemuwaa umaa kua ara tirame peu suwi yuiri tikuri periku sikuesawa pepia upe.

⁵⁴Awa uu serukuera uu yuiri seruwi uriku kuri mundu nunkawaa upawa asuiwana kuri hasupiri ae anyu aramawaa ara upe.

⁵⁵Nyãse timbiu supiwa kua serukuera peu aramawaa supiwa yuiri kua seruwi.

⁵⁶Awa uu serukuera uu seruwi yuiri uiku sepia upe asui haiku ipia upe yuiri.

⁵⁷Kuaye sepaya upakawaa umunduwaa yawe ixe yawete yuiri hapakate ixe sesewara, yawete yuiri kua uuwaa seirumu upakate kuri ae.

⁵⁸Aete kua pão uriwaa iwaka sui umbaa yepewasu ae irumu kua aintauuwaa kuaita peramunyaita asui aintaumanu, awa kuri uu kua pão upakate kuri ae yawewarawate.

⁵⁹Aete kua Jesus umbeuwaa ainta supe umbue irumu ainta sinaguga upe Kafarnaum upe.

⁶⁰Asui siya kuaita umbuewaita aintausendu irumu kua umbeuwaa aintaunyee: —Iwasu inyenga, awataa upuderi usendu ae?

⁶¹Maa Jesus ukuawa ipia upe aintaupurungita inyenga resewara kuaita umbuewaita, unyee ainta supe arama: —Maitaa peyumutawa sese kua hambeuwaa?

⁶²Asui maitaa kuri penye pemaa rame kua usemuwaa umaa kua ara uyupiri rameana maa kiti uikuwaa primeru.

⁶³Espiritu kua umbakawaa yande, timaa arama yanerukuera, kua senyenga hambeuwaa penye arama aete espiritu aete sikuesawa yuiri.

⁶⁴Maa aikuete tiwaita uruyari pepiterupi. Maa Jesus ukuawate uyupiru rame kuaita uruyariwaita ukuawate yuiri awataa kua uentregari aramawaa ae.

⁶⁵Asui unyee ainta supe: —Sesewara hambeu penye arama tiawa uri sepiri tirame sepaya uxari uri.

⁶⁶Asui sesewara siya kuaita umbuewaita aintauxari ae, tiana aintausu putari sakakuera.

⁶⁷Asui Jesus upurandu kuaita duziwaita, unyee ainta supe arama: —Maitaa kuri penye pexari yuiri ixe?

⁶⁸Asui Simão Pedru unyee ixupe: —Seruixawa, awa ipiritaa maa yasu, inde rerikuwaa kua inyenga sese kua mundu nunkawaa upawa.

⁶⁹Yaruyariana yakunyeseriana indete kua purangawaa Deus suiwara.

⁷⁰Ape Jesus unyee ainta supe arama: —Maitaa tiserá haparawaka penye duziwaita? Maa yepe pesuiwara Yurupari ae.

⁷¹Upurungita sese kua yepe aintasuiwara kuaita duziwaita uentregari aramawaa kuri ae sera Juda kua Simão Iskariute raira.