Read Nhengatu Juão 7 Bible Online

Juão 7 - Nhengatu bible

Juão 7

¹Yawewaa rire Jesus uwata Galileya upe nyãse tiuputari uwata Judeya upe nyãse kuaita judewita aintauputari aintauyuká ae.

²Asui kuayentuana sangawa kuaita judewita festa sera tabernakulu.

³Asui kuaita imuita aintaunyee ixupe: —Purangate resu kua sui Judeya kiti rembuewaita irumu aintaumaa arama kuaita remunyawaita.

⁴Nyãse tiawa upuderi upuraki uyumimisawa upe uputari rame aintaukuawa sese uyukuawasawa. Reputari rame remunya kuaita remunyawaita rexari aintaukuawa nerese kuaita mundu puraita.

⁵Nyãse imuita tiaintauxari aintapia sese.

⁶Asui Jesus unyee ainta supe arama: —Umbaare serangawa usika, maa perangawa yawewarawate ae.

⁷Kuaita mundu puraita tiaintaupuderi aintaipiaiwa aintaumaa penye arama, maa ixe arama aintaipiaiwa aintaumaa hambeu resewara puxuwera aintaumunyawaita.

⁸Penyete pesu pemaa festa kiti, maa ixe tihasu nyãse tire usika serangawa puranga.

⁹Yawe Jesus unyee ainta supe arama: —Asui upita Galileya upe.

¹⁰Asui imuita aintausu rire festa kiti asui Jesus yuiri usu maa tiusu uyukuawawaa upe maa uyumimisawa upe.

¹¹Asui kuaita judewita aintausikari ae festa upe, aintaunyee: —Mametaa ae?

¹²Asui turusu aintaupurungita sese kuaita miraita siyawaita, amuita umbeu: —Purangawaa ae, amuita aintaumbeu: —Tipuranga ae nyãse uganani kuaita miraita.

¹³Maa tiawa upurungita sese uyukuawasawa upe nyãse aintausikie judewita sui.

¹⁴Asui festa piterupi Jesus usu templu kiti umbue ainta.

¹⁵Asui kuaita judewita aintaakayemu aintausendu asui aintaunyee: —Maitaa ukuawa arama uleri kua tiwa uyumbue?

¹⁶Asui Jesus usuaxara ainta unyee: —Timaa senyenga kua hambuewaa maa inyenga kua umunduwaa ixe.

¹⁷Awa uputari umunya kuaye Deus uputariwaa yawe ukuawa kuri maa suiwarataa kua senyenga u Deus suiwara u hapurungita ixepawantu.

¹⁸Awa uputari upurungita simutara uputari aintaumee ixupe arama purangawaa, maa kua uputariwaa aintaumee ixupe purangawaa kua umunduwaa ae aete kua supiwa tiwa uganani.

¹⁹Maitaa tiserá Muize uxari penye arama Deus nyenga kuximawara? Maa tiawa pesuiwara uputari uruyari ae. Marantaa peputari peyuká ixe.

²⁰Asui kuaita miraita siyawaita aintaunyee ixupe arama: —Inde reriku demuniu nepia upe. Awataa uputari uyuká inde?

²¹Asui Jesus usuaxara ainta, unyee ainta supe: —Yepenyu kua hamunyawaa asui panye penye peakayemu pemaa.

²²Muize uxari pesirkunsidari, maa tiuxariwaa penye arama ae maa peramunyaita uxariwaa penye arama ae, asui penye pesirkunsidari apigawaita sauru rame.

²³Asui pesirkunsidari rame yepe apigawa sauru rame peruyari arama Muize nyenga, marantaa pepiaiwa pemaa ixe arama hamukaturu resewara yepe apigawa ipira sauru rame?

²⁴Tepembeu amuita rese sesewara kua pemaawaa, maa pembeu aintarese nyenga supiwa irumu.

²⁵Asui yepeyepe Jeruzalẽ suiwaraita aintaunyee: —Maitaa tiserá aete kua aintauputariwaa aintauyuká?

²⁶Asui upurungita uyukuawasawa upe maa timaa nungara aintaumbeu ixupe: —Maitaa aintaukuawate Kristu ae supiwa kuaita serakuenawaita?

²⁷Maa yakuawate maa suiwarataa ae, uri rame kuri kua Kristu tikuri awa ukuawa maa suiwara ae.

²⁸Asui Jesus umbue irumu ainta templu upe unyee ainta supe: —Pekunyeserite ixe pekuawate yuiri maa suiwara ixe, timaa hayuiri serimutara, supiwate kua umunduwaa ixe maa tipekunyeseri ae.

²⁹Maa hakunyeserite ae nyãse hayuiri isui, asui aete umundu ixe.

³⁰Asui aintauputari aintaumprezu ae maa tiawa upisika ae nyãse tire usika sangawa.

³¹Maa siya miraita aintauxari aintapia sese, aintaunyee: —Uri rame kuri kua Kristu, maitaa kuri umunya turusu piri milagri isui kua apigawa?

³²Asui kuaita farizewita aintausendu irumu aintauyupurungita sese kuaita miraita siyawaita asui kuaita saserdutita ruixawaita farizewita yuiri aintaumundu guardaita aintaumprezu arama Jesus.

³³Asui Jesus unyee ainta supe: —Haikure peirumu kutarantuana asui hasu arama kuri ipiri kua umunduwaa ixe.

³⁴Pesikari kuri ixe maa tikuri pewasemu ixe, tipepuderi pesu sepiri haikuwaa kuri akiti.

³⁵Asui aintauyupurungita aintapawa kuaita judewita, aintaunyee: —Maa kititaa kuri usu tiarama yawasemu ae? Maitaa kuri usu será aintapiri kuaita yaneanamaita uyusaĩwaita greguita piterupi umbue arama ainta?

³⁶Mayesawataa umbeuwaa: —Pesikari kuri ixe maa tikuri pewasemu ixe? Mayesawataa umbeuwaa yuiri: —Tipepuderi pesu haikuwaa kuri akiti.

³⁷Asui anyu aramawaa purangawaa ara festa upe Jesus upuamu umbeu: —Awa iisi pexari uri sepiri uu arama.

³⁸Awa uxari ipia serese ii upakawaa usemu kuri ipia sui maye Deus nyenga umbeuwaa yawe.

³⁹Yawe unyee sese kua Espiritu umeewaa kuri ainta supe arama kuaita uxariwaita aintapia sese, tire uxari ainta supe arama ae nyãse tire Jesus uyuiri purangawaa kiti.

⁴⁰Asui yepeyepe usenduwaita umbeuwaa aintaunyee: —Supiwa aete kua utitikawaa.

⁴¹Amuita umbeu: —Kristu ae. Maa amuita aintaupurandu: —Maitaa Kristu uri Galileya sui?

⁴²Maitaa tiserá aintaumpinimawaa umbeu, Davi rimiariru kua Kristu, uri tetama sui serawaa Belẽ Davi uikuwaa ape.

⁴³Asui mukuĩ aintaumanduariwaa kuaita miraita Jesus resewara.

⁴⁴Asui yepeyepe aintasuiwara aintauputari aintaumprezu ae maa tiawa upisika ae.

⁴⁵Asui kuaita guardaita aintauyuiri aintapiri kuaita saserdutita ruixawaita farizewita yuiri, asui aintaunyee ainta supe: —Marantaa tiperuri ae?

⁴⁶Asui kuaita guardaita aintausuaxara ainta aintaunyee: —Tire yawasemu yepe apigawa upurungitawaa maye iyawe.

⁴⁷Asui kuaita farizewita aintaunyee ainta supe: —Maitaa uganani penye yuiri?

⁴⁸Maitaa yepe aintasuiwara kuaita serakuenawaita farizewita yuiri uxari ipia sese?

⁴⁹Maa puxuwerawaita kuaita miraita tiwaita uruyari Muize nyenga.

⁵⁰Asui Nikudemu yepe aintasuiwara usuwaa kuera umaa Jesus piri unyee ainta supe:

⁵¹—Maitaa Muize nyenga uxari yambeu amu rese senundere yakuawa kua umunyawaa.

⁵²Asui aintaunyee ixupe: —Maitaa indete yuiri Galileya suiwara? Remaa puranga rekuawa arama tiyamaa yepe utitikawaa uriwaa Galileya sui.

⁵³Asui aintauyuiri aintaruka kiti muiri ainta aintayaweyawe.