Read Nhengatu Juão 8 Bible Online

Juão 8 - Nhengatu bible

Juão 8

¹Maa Jesus usu iwitera kiti sera Ulivera.

²Asui kuemaite usu yuiri templu kiti, asui panye kuaita miraita aintausu ipiri, asui uwapika umbue ainta.

³Asui kuaita saserdutita farizewita yuiri aintaururi ipiri yepe kunya aintauwasemuwaa umunya puxuwera ipira irumu imena sui, asui aintauxari upuamu aintapiterupi.

⁴Asui aintaunyee ixupe: —Inde rembuewaa, aintauwasemu kua kunya umunya puxuwera ipira irumu imena sui.

⁵Muize nyenga umundu yayuká arama ita irumu kunyaita umunyawaita iyawe, maitaa rembeu sese inde?

⁶Yawe aintaunyee ixupe aintausaã arama ae nyãse aintauputari aintaumbeu puxi sese. Maa Jesus uyawika umpinima idedu irumu iwi rese.

⁷Aintaupurandu resewara ae yawewarawate asui upuamu unyee ainta supe: —Mayewaa pesuiwara tiwa uriku ipuxuwerasawa uyupiru umburi ita sese.

⁸Asui uyawika yuiri umpinima iwi rese.

⁹Asui aintausendu irumu umbeuwaa aintauyumutiĩ turusu aintapia upe asui aintausu isui yepeyepesawa rupi, tuyuweita aintauyupiru aintausu isui, asui Jesus upita yepenyu kua kunya irumu.

¹⁰Asui Jesus upuamu umaa tiana yamaa ainta anyunte kua kunya asui upurandu ae: —Maa kitiana kuaita umbeuwaita puxi nerese, maitaa tiserá yepe ukundenari inde?

¹¹Asui kua kunya unyee ixupe: —Nẽ yepe seruixawa. Asui Jesus unyee ixupe: —Ixe yuiri tihakundenari inde, resuana kuiri teremunya puxuwera mukuĩsawa.

¹²Asui Jesus umbeu ainta supe mukuĩsawa unyee ainta supe: —Ixete kua mundu turi awa uri serakakuera tikuri uwata pitunawasuwaa upe maa uriku kuri kua turi upakawaa.

¹³Asui kuaita farizewita aintaunyee ixupe: —Rembeute neresepawate ape timaa supiwa kua rembeuwaa.

¹⁴Asui Jesus usuaxara ainta unyee: —Hambeu rame maa seresepawa supiwa maa hambeuwaa nyãse hakuawate maa suiwarataa ixe hakuawate yuiri maa kititaa hasu, maa penye tipekuawa maa suiwarataa ixe tiyuiri pekuawa maa kititaa hasu.

¹⁵Penye pembeu amuita rese pemanduarisawantu, maa ixe timaarese hambeu.

¹⁶Maa hambeu rame maa amuita rese supiwa maa kua hambeuwaa nyãse tiyepenyuwaa ixe maa uajudarite ixe kua umunduwaa ixe.

¹⁷Penyenga rupi aintaumpinima kuera, supiwa aintaumbeuwaa kuaita mukuĩ apigawaita upurungitawaita yepewasu.

¹⁸Hambeu seresewara pawate, asui sepaya kua umunduwaa ixe umbeu yuiri serese.

¹⁹Asui aintaupurandu ae: —Mametaa nepaya? Asui Jesus usuaxara ainta, unyee ainta supe: —Tipekunyeseri ixe tiyuiri pekunyeseri sepaya, pekunyeseri rame maa ixe pekunyeseri maa yuiri sepaya.

²⁰Umbeu ainta supe: —Kua umbeuwaa umbue irumu ainta templu upe mame aintaumuatiriwaa upe dinyeru, maa tire awa umprezu ae nyãse tire usika sangawa.

²¹Asui Jesus umbeu ainta supe mukuĩsawa: —Hasu kuri pesui asui pesikari kuri ixe, asui pemanu kuri pepekadu irumu, tikuri pepuderi pesu maa kiti hasuwaa.

²²Asui kuaita judewita aintaunyee: —Maitaa uputari uyuyuká aepawate? Nyãse umbeu: —Tipepuderi pesu hasuwaa akiti.

²³Asui unyee ainta supe: —Penyete tiipi suiwaraita ixete iwate suiwara, penyete kua mundu puraita ixe timaa kua mundu pura ixe.

²⁴Hambeu penye arama pemanu kuri pepekadu irumu, tirame peruyari ixete Kristu pemanu kuri pepekadu irumu.

²⁵Asui aintaunyee ixupe: —Awataa inde? Asui Jesus unyee ainta supe: —Ixete kua hayupiruwaa hambeu penye arama.

²⁶Hariku siya hambeu arama penye arama siya yuiri hambeu arama perese, maa supiwa kua umunduwaa ixe asui hambeu kua mundu upe kua hasenduwaa irumu.

²⁷Maa tiaintaukuawa sã umbeu ainta supe arama yanepaya Deus rese.

²⁸Ape Jesus unyee ainta supe: —Pesupiri rame kuri kua usemuwaa umaa kua mundu ape kuri pekuawa ixete ae, timaa nungara hamunya serimutara maa hapurungita kuaye sepaya umbuewaa yawe ixe.

²⁹Asui seirumute kua umunduwaa ixe, tiuxari ixenyu nyãse yawewarawate hamunya kua umusuuriwaa ae.

³⁰Upurungita rire kua inyenga siya miraita aintauxari aintapia sese.

³¹Asui Jesus unyee ainta supe kuaita judewita uxariwaita aintapia sese: —Peiku rame kuri senyenga rese supiwa hambuewaita kuri penye.

³²Asui pekuawa kuri kua supiwa, asui kua supiwa uyurawa kuri penye.

³³Asui aintaunyee ixupe: —Abraão rimiariruita yande nẽ mairame amu ixupe aramawaita yande. Maitaa rembeu, uyurawa kuri penye?

³⁴Asui Jesus usuaxara ainta unyee: —Supiwa hambeu penye arama: Panye kuaita umunyawaita pekadu, pekadu ixupe aramawaita ainta.

³⁵Kua yepe apigawa ixupe aramawaa timaa uiku suka upe yawewarawate, maa taira uiku yawewarawate.

³⁶Asui taira uyurawa rame penye supiwa uyurawawaita penye.

³⁷Hakuawate Abraão rimiariruita penye, maa peputari peyuká ixe nyãse timaa senyenga uiku pepia upe.

³⁸Hapurungita sese kua hamaawaa sepaya irumu, maa penye pemunya kua pemaawaa pepaya irumu.

³⁹Asui aintausuaxara Jesus, aintaunyee: —Abraão kua yanepaya. Asui Jesus unyee ainta supe: —Abraão rimiariruita rame maa penye pemunya maa maye Abraão umunyawaa yawe.

⁴⁰Maa kuiri peputari peyuká ixe, ixe hambeuwaa penye arama kua inyenga supiwa hasenduwaa Deus irumu, Abraão tiumunya yawe.

⁴¹Pemunya kuaye pepaya uputariwaa yawe. Asui aintaunyee ixupe: —Umbaa ipayaimawaita yande, yarikute yepe yanepaya aete kua Deus.

⁴²Asui Jesus unyee ainta supe: —Pepaya rame maa Deus supiwa maa pegustari ixe, nyãse hayuiri Deus sui asui kuiri haiku ike, timaa hayuiri serimutara maa aete umundu ixe.

⁴³Marantaa tipekuawa kua hambeuwaa? Nyãse tipepuderi pesendu senyenga.

⁴⁴Yurupari iyaraita penye aete pepaya, asui peputari pemunya kuaye uputariwaa yawe, uyukáwaa ae kua mundu uyupirungawa rame, tiuputari kua supiwa nyãse tiyamaa supiwa ipia upe. Uganani rame anyunte upurungita inyenga ugananisawa irumu nyãse ugananiwerawaa ae, nyãse aete gananisawa ipaya ae.

⁴⁵Hambeuwana penye arama inyenga supiwa ape tipexari pepia serese.

⁴⁶Awataa pesuiwara uwasemu serese sepekadu? Hambeu rame maa penye arama nyenga supiwa marantaa maa tipexari pepia serese?

⁴⁷Awa Deus supe aramawaa ae usendu Deus nyenga, timaa Deus supe aramawaita penye sesewara timaa pesendu ixe arama.

⁴⁸Asui kuaita judewita aintausuaxara ae, aintaunyee: —Maitaa tiserá supiwa yambeu Samaria suiwara inde, reriku demuniu nepia upe?

⁴⁹Asui Jesus unyee: —Tihariku demuniu maa harespetari sepaya, asui penye tiperespetari ixe.

⁵⁰Tihaputari aintaumee ixe arama purangawaa, maa aikue yepe uputari umee ixe arama purangawaa aete yuiri umbeu aintarese.

⁵¹Supiwa hambeu penye arama: —Awa uruyari senyenga tikuri umaa manusawa yawewarawate.

⁵²Asui kuaita judewita aintaunyee ixupe: —Kuiri yakuawate reriku demuniu. Kuxima umanu kua Abraão, aintaumanu yuiri kuaita utitikawaita, asui inde rembeu, awa uruyari senyenga tikuri umaa manusawa yawewarawate.

⁵³Maitaa puranga piriwaa inde yaneramunya Abraão ambira sui, kuaita yuiri utitikawaita kuxima aintaumanu? Awataa remanduari inde?

⁵⁴Asui Jesus umbeu: —Hamee rame maa purangawaa ixe aramapawate timaa arama ae. Sepaya umee ixe arama purangawaa, aete kua pembeuwaa peDeuste ae.

⁵⁵Maa penye tipekunyeseri ae, ixe hakunyeseri ae. Hambeu rame maa tihakunyeseri ae ugananiwerawaa maa ixe maye peyawe, maa hakunyeseri ae asui haruyari inyenga.

⁵⁶Peramunya Abraão suuri usaru serangawa, asui umaa ae asui suuri ae.

⁵⁷Asui kuaita judewita aintaunyee ixupe: —Tire reriku sinkuenta akayu, maitaa remaawana Abraão?

⁵⁸Asui Jesus unyee ainta supe: —Supiwa hambeu penye arama: —Ixe haiku Abraão rundere.

⁵⁹Asui aintaupisika ita aintaumburi arama sese maa Jesus uyumimi aintasui, asui usu templu sui.