Read Nhengatu Juão 9 Bible Online

Juão 9 - Nhengatu bible

Juão 9

¹Asui usuwaa rupi umaa yepe sesaimawaa, unaseriwaa sesaimawaate ae.

²Asui umbuewaita upurandu ae, aintaunyee: —Inde rembuewaa, awataa umunya puxi u kua sesaimawaa u ipaya imaya yuiri unaseri arama sesaima?

³Asui Jesus usuaxara ainta, unyee: —Timaa umunya puxi tiyuiri ipaya nẽ imaya yuiri, maa unaseri sesaimawaa aintaumaa arama mayetaa Deus ukuawasawa umunya ixupe.

⁴Yarikute yamunya imuraki kua umunduwaa ixe ara pukusaware ae, nyãse pitunana kuri ae asui tiawa upuderi upuraki.

⁵Ixete kua mundu turi haiku pukusaware kua mundu upe.

⁶Umbeu irumuwaa ae utumuna iwi upe asui umunani iwi asui uxari ae sesa upe kua sesaimawaa.

⁷Asui unyee ixupe arama: —Resu remuyasuka lagu miri upe serawaa Silue, yawesawa sera umunduwaa ae. Asui usu umuyasuka asui uyuiri urikuana sesa.

⁸Asui kuaita sumuaraita kuaita yuiri kuaita ukuawawaita upuranduwaa ae aintaunyee: —Maitaa tiserá aete kua apigawa uwapikawaa upurandu esmula?

⁹Yepeyepe umbeu: —Aete. Amuita umbeu: —Timaa ae maa yawewate ae. Maa aepawate umbeu: —Ixete ae.

¹⁰Asui aintaunyee ixupe: —Maitaa rerikuana neresa inde?

¹¹Asui unyee: —Yepe apigawa serawaa Jesus umunani iwi asui uxari seresa upe asui unyee ixe arama: —Resu remuyasuka lagu miri upe serawaa Silue. Asui hasu hamuyasuka asui kuiri purangana seresa.

¹²Asui aintaunyee ixupe: —Maa kitiana kuiri ae? Asui unyee ainta supe arama: —Tihakuawa maa kititaa ae.

¹³Asui aintaurasu kua sesaimawaa aintapiri kuaita farizewita.

¹⁴Sauru rame Jesus umunani iwi upirari arama sesa.

¹⁵Asui kuaita farizewita aintaupurandu ae maitaa umaa arama, asui unyee ainta supe: —Uxari iwi seresa upe asui kuiri hamaawana.

¹⁶Asui yepeyepe farizewita aintaunyee: —Timaa Deus suiwara kua apigawa nyãse tiumukaturu sauru. Asui amuita unyee: —Maitaa apigawa puxuwerawa upuderi umunya milagri iyawewaa. Asui mukuĩ aintaumanduariwaa kuaita farizewita.

¹⁷Asui aintaupurandu mukuĩsawa kua sesaimawaa kuera: —Maitaa rembeu sese nyãse upirari neresa ae? Asui unyee: —Utitikawaa ae.

¹⁸Asui kuaita judewita tiaintaukuawa sã sesaimawaa kuera kua urikuanawaa sesa kuiri tipukusaware aintaupurandu ipaya imaya yuiri.

¹⁹Asui aintaupurandu ipaya imaya yuiri: —Maitaa peraira kua pembeuwaa sesaimawaa usemu umaa kua mundu? Maitaa umaa arama kuiri?

²⁰Asui ipaya imaya yuiri aintaumbeu ainta supe: —Yakuawate yaneraira ae, yakuawate yuiri unaseri umaa kua mundu sesaimawaa.

²¹Maa tiyakuawa maitaa uriku arama sesa kuiri, tiyuiri yakuawa awataa uxari uyupirari sesa, pepurandu ae nyãse tuyuweana ae, aete kuri umbeu penye arama.

²²Yawe aintaunyee ipaya imaya yuiri nyãse aintausikie judewita sui, nyãse kuaita judewita aintaumbeu awa umbeu Kristu kua Jesus aintaumburi ae sinaguga sui.

²³Ape ipaya unyee imaya yuiri: —Tuyuweana ae pepurandu isui.

²⁴Asui aintausenui mukuĩsawa kua sesaimawaa kuera aintaunyee ixupe: —Kuiri remee purangawaa Deus supe nyãse yakuawate pekaduru kua apigawa.

²⁵Asui unyee ainta supe: —Tihakuawa sã pekaduru ae, anyunte hakuawa sesaimawaa kuera ixe asui kuiri hamaa puranga.

²⁶Asui aintaunyee ixupe: —Maataa umunya inde arama, mayetaa upirari neresa?

²⁷Asui usuaxara ainta unyee: —Hambeuwana penye maa tipeputari pesendu, marantaa peputari pesendu mukuĩsawa? Maitaa peputari será umbuewaita penye yuiri?

²⁸Asui aintauyakawa ae, aintaunyee: —Indete umbuewaa maa yande Muize umbuewaita yande.

²⁹Yakuawate kuxima Deus upurungita Muize supe, maa aete kua tiyakuawa maa suiwarataa ae.

³⁰Asui kua apigawa usuaxara ainta, unyee: —Sesewara seakayemu hasendu nyãse tipekuawa maa suiwarataa ae maa uxari hamaa.

³¹Yakuawate timaa Deus usendu ainta supe kuaita pekaduruita, maa Deus usendu ainta supe kuaita upuranduwaita irumu umunyawaita kuaye uputariwaa yawe.

³²Kua mundu uyupiru rire tire yasendu yepe pesua uxariwaa uyupirari sesa yepe unaseriwaa umaa kua mundu sesaimawaa.

³³Tirame Deus suiwara kua apigawa timaa upuderi umunya nemaa.

³⁴Asui aintausuaxara ae, aintaunyee: —Maitaa reputari rembue yande inde renaseriwaa remaa kua mundu nepekadu irumu? Asui aintaumburi ae.

³⁵Asui Jesus usendu sesewara aintaumburi ae sinaguga sui, asui uwasemu ae, unyee ixupe: —Maitaa rexari nepia sese kua unaseriwaa umaa kua mundu?

³⁶Asui usuaxara ae, unyee: —Awataa ae seruixawa, haxari arama sepia sese?

³⁷Asui Jesus unyee ixupe: —Remaawana ae, aete kua upurungitawaa neirumu kuiri.

³⁸Asui unyee: —Haxari sepia, inde seruixawa, asui umee ixupe purangawaa.

³⁹Asui Jesus unyee: —Hayuiri kua mundu kiti hambeu arama aintaresewara, aintaumaa arama yuiri kuaita sesaimawaita tiarama kuri aintaumaa kuaita umaawaita.

⁴⁰Asui yepeyepe farizewita suakiwaraita usenduwaita ae aintaunyee ixupe: —Maitaa sesaimawaita yande yuiri?

⁴¹Asui Jesus unyee ainta supe: —Sesaimawaita rame maa penye timaa periku pepekadu, maa kuiri pembeu, yamaate, ape perikute pepekadu.