Read Nhengatu Atu 1 Bible Online

Atu 1 - Nhengatu bible

Atu 1

¹Inde Teufilu, hampinima kuera nyã primeru livru upe panye kua Jesus umunyawaa umbuewaa yuiri.

²Hampinima panye maa sese ate nyã ara usuanawaa iwaka kiti uxari rire umbuewaita uparawakawaita supe umbeuwaa Espiritu Santu irumu.

³Umukame aintaumaa upakate ae upurara rire, kuarenta ara uxari aintaumaa ae umukame aintaumaa siya milagri supiwa, umbeu ainta supe sese kua yaneruixawa Deus umunduwaa upe.

⁴Asui uiku ramere aintairumu umundu ainta tiarama aintauyuiri Jeruzalẽ sui, maa umundu aintausaru kua ipaya umbeuwaa kua pesenduwaa seirumute paa.

⁵Nyãse supiwa Juão ubatizari ii irumu, maa timaa siya ara rire amu ubatizari kuri penye Espiritu Santu irumu.

⁶Asui kuaita uyumuatiriwaita irumu aintaupurandu ae: —Yaneruixawa, maitaa rexari kuiri israelitaita supe kua guvernu?

⁷Asui umbeu ainta supe: —Timaa puranga pekuawa yanepaya rangawa uxariwaa aepawate.

⁸Maa Espiritu Santu uwiye irumu kuri perese periku kuri kirimbawasawa asui pembeu kuri seresewara panye Jeruzalẽ kiti, panye Judeya kiti yuiri, panye Samaria kiti yuiri, panye kua mundu rimbiwa rupi yuiri.

⁹Asui umbeu rire kua nyenga aintaumaa irumu ae uyusupiri iwate kiti, asui yepe nuvẽ usikindawa aintaresa sui ae.

¹⁰Asui aintaumaa irumu Jesus uyusupiri iwate kiti mukuĩ apigawa uiku aintaruaki murutingawaa aintarupa.

¹¹Asui aintaumbeu ainta supe: —Penye apigawaita Galileyawaraita, marantaa pemaa iwate kiti? Kua Jesus usuwaa iwate kiti pepitera sui uyuiri kuri kuaye pemaawaa yawe uyusupiri.

¹²Asui aintauyuiri Jeruzalẽ kiti iwitera sui serawaa Ulivera iapekatusawa yepe kilumetru Jeruzalẽ sui.

¹³Asui aintausika irumu tetama upe aintauwike yepe ukapi iwatewaa kiti, apete aintauyumuatiri kuaita Pedru, Juão, Tiagu, Andre, Filipe, Tume, Bartulumeu, Mateu, Tiagu Alfeu raira, asui Simão Zelute asui Juda kua Tiagu raira.

¹⁴Asui yepewasu aintaumanduarisawa aintaupurandu aintairumute kunyaita kua Maria Jesus maya, asui imuita yuiri.

¹⁵Asui nyã ara Pedru upuamu aintapiterupi kuaita imuita, aintasiyasawa kuaji sentu vinti kuaita uyumuatiriwaita, asui umbeu:

¹⁶—Semuita, aintaurikute aintaumunya kua aintaumpinimawaa Deus nyenga upe Espiritu Santu umbeuwaa Davi yuru sui Judá rese kua urasuwaa kuaita umprezuwaita Jesus.

¹⁷Nyãse yanerumuara yawewaa ae, uajudari yande sese kua yapurakiwaa.

¹⁸Asui kua apigawa upiripana yepe kampu ipuxuwerasawa rikuyara upe, asui upuri simutara iwate sui asui usuruka imarika asui panye ibuxu usemu isui.

¹⁹Asui aintausendu sesewara panye kuaita Jeruzalẽwaraita, asui aintauseruka aintanyenga rupi Aseldama, yawesawa Tuwi Kampu ae.

²⁰Nyãse aintaumpinima Salmu upe: "Iyaraimawaa kuri setama, tepexari yepe uiku arupi, asui amu kuri upuraki imuraki."

²¹Ape yepe apigawa aintasuiwara kuaita uwatawaita yaneirumu yawewarawate Jesus uiku rame yanepiterupi,

²²Uyupiruwaa Juão batizmu rese ate Jesus usu iwaka kiti, urikute uiku yanepiterupi umbeu arama sesewara Jesus usemu manusawa sui.

²³Asui aintauyuka mukuĩ apigawaita kua Juze aintauserukawaa Barsaba sera rakapira Justu, asui Matia yuiri.

²⁴Asui aintaupurandu Deus irumu, aintaumbeu: —Inde Yaneruixawa, inde rekuawawaa aintapia upe panye kuaita apigawaita, remukame yamaa kuiri awataa aintasuiwara reparawaka,

²⁵uwajudari arama yande sese kua yanemuraki remundu aramawaa kuri ae nyãse Juda uxariana ae usu arama uikuwerawaa kiti kuiri.

²⁶Asui aintaumburi surti asui uwari sese kua Matia asui uiku aintapiterupi kuaita unziwaita Jesus umunduwaita.