Read Nhengatu Atu 10 Bible Online

Atu 10 - Nhengatu bible

Atu 10

¹Ape Sezareya upe yepe apigawa serawaa Kurneliu, aintakapitão ae kuaita suraraita Italia suiwaraita.

²Umanduari Deus usikie isui yuiri panye aintairumu kuaita suka puraita, asui turusu uajudari yuiri pirasuawaita, yawewarawate upurandu Deus.

³Asui yepe ara karuka rame umaa yepe Deus anju uri ipiri umbeu ixupe:

⁴—Kurneliu! Asui umaa ixupe usikie, upurandu ae: —Maataa reputari seirumu seruixawa? Asui anju umbeu ixupe: —Deus umanduari kua repuranduwaa irumu panye yuiri kua rewajudariwaa pirasuawaita.

⁵Kuiri remundu apigawaita Jupi kiti remundu aintausenui inde arama kua Simão sera rakapira Pedru,

⁶Uiku Simão ruka upe kua upurakiwaa suu pirera, suka uiku parana turusuwaa rimbiwa kiti.

⁷Asui uyuiri rire isui kua anju upurungitawaa ixupe usenui ipiri mukuĩ upurakiwaita ixupe suka upe yepe surara yuiri umanduariwaa Deus uwajudariwaa ae.

⁸Asui umbeu rire ainta supe panye, umundu ainta Jupi kiti.

⁹Asui wirande kiti aintausuwaa upe pee rupi kuayentu tetama sui Pedru usu uka ipewawaa iarupi upurandu arama Deus, yandara rame kurasi.

¹⁰Asui sasi ixupe yumãsi umbau putari asui aintaumunya pukusawa umbau arama ikerupi ae.

¹¹Asui umaa uyupirari iwaka, asui uwiye yepe turusuwaa fazenda yawewaa aintaupisika kuatru upenasawa rese aintaumuye arama iwi kiti ae.

¹²Kua fazenda ipura panye suu, maiwa wirá yuiri.

¹³Asui usendu yepe nyenga umbeu ixupe: —Pedru, repuamu reyuka rembau.

¹⁴Maa Pedru usuaxara: —Umbaa seruixawa, nyãse umbaa kuerare hambau tenyuntuwara tiyuiri ikiawaita.

¹⁵Asui mukuĩsawa kua nyenga umbeu ixupe: —Terembeu tenyuntuwara kua Deus uxariwaa ikiaimawaa.

¹⁶Yawe umunya musapiri viaji asui uyuiri iwaka kiti.

¹⁷Asui tipukusawa Pedru ukuawa mayesawataa kua ikerupi umaawaa, kuaita apigawaita Kurneliu umunduwaita aintaupuamu ukara sui aintaupurandu rire mametaa Simão ruka.

¹⁸Asui aintausenui aintaupurandu sã aikue uka upe kua Simão sera rakapirawaa Pedru.

¹⁹Asui Pedru umanduari irumu sese kua ikerupiwaa, asui kua Espiritu umbeu ixupe: —Aikue mukuĩ apigawaita aintausikari inde.

²⁰Repuamu rewiye resu aintairumu, terexari mukuĩ remanduariwaa nyãse hamundu ainta.

²¹Asui Pedru uwiye usu aintapiri kuaita apigawaita, umbeu ainta supe: —Ixete kua pesikariwaa, maa resewarataa peyuiri?

²²Asui aintaumbeu ixupe: —Kua kapitão serawaa Kurneliu apigawa purangawaa ae, umanduari Deus, puranga aintaumbeu sesewara panye kuaita judewita, yepe anju purangawaa umundu ae usenui arama inde suka kiti usendu arama nenyenga.

²³Asui Pedru usenui ainta uka kiti uxari aintauiku irumu, asui wirande kiti usemu usu aintairumu, asui yepeyepe aintaimuita Kristu rese aintausu yuiri aintairumu.

²⁴Asui wirande kiti aintausika Sezareya kiti. Ape Kurneliu usaru ainta uyumuatiri imuita ianamaita yuiri.

²⁵Asui Pedru uwike irumu uka kiti Kurneliu usu suaxara uyurinipia ixupe ipi ruaki umee arama ixupe arama purangawaa.

²⁶Maa Pedru usupiri ae umbeu ixupe: —Repuamu nyãse apigawate ixe yuiri.

²⁷Asui upurungita ramere uiku irumu ae uwike uka kiti, uwasemu aintauyumuatiri siya miraita uka upe.

²⁸Asui umbeu ainta supe: —Penyete pekuawa timaa judeu upuderi uyumuatiri aintairumu kuaita amu miraita tiyuiri upuderi umusuaki ainta, maa Deus umukame hamaa tiarama hamanduari tenyuntu amuita tiyuiri ikiawaita ainta.

²⁹Asui aintausenui irumu ixe hayuiri, timukuĩ hamanduariwaa. Asui kuiri hapurandu penye marantaa pesenui ixe?

³⁰Asui Kurneliu umbeu ixupe: —Urikuana kuatru ara karuka rame kurasi kuiriwaa yawe, hapurandu Deus irumu seruka upe, asui hamaa yepe apigawa upuamu hamaa irupa umuturi puranga.

³¹Asui umbeu: —Kurneliu Deus usendu kua repuranduwaa irumu, asui Deus umanduari nyã reajudariwaa pirasuawaita.

³²Ape remundu yepe apigawa Jupi kiti usenui arama Simão sera rakapirawaa Pedru uikuwaa suka upe nyã upurakiwaa suu pirera serawaa Simão, uikuwaa parana turusuwaa rimbiwa kiti.

³³Ape kutara hamundu aintausenui inde, asui remunya purangawaa ixe arama reyuiri resewara. Ape kuiri yayumuatiri Deus umaa ike yaputari yasendu neirumu panye umunduwaa rembeu kua yaneruixawa.

³⁴Asui Pedru uyupiru umbeu: —Kuiri hakuawa supiwate timaa Deus uparawaka umaa kuaita miraita.

³⁵Maa mayewaa aintasuiwara kuaita miraita panye aintaumanduari Deus aintaumunya yuiri purangawaa Deus usuanti kuri ainta.

³⁶Deus umundu inyenga aintapiri kuaita Israel rimiariruita uxari irumu aintaukuawa kua nyenga purangawaa uxariwaa timaarese ainta Jesus Kristu irumu. Aete aintaruixawa panye.

³⁷Pekuawate kua nyenga aintaumbeuwaa panye Judeya kiti, aintauyupiru Galileya kiti sakakuera kua batizmu Juão umbuewaa rese.

³⁸Pekuawate maye Deus uxari Espiritu Santu sese kua Jesus Nazare suiwara uxari ixupe ukuawasawa yuiri, asui uwata umunya puranga umukaturu panye kuaita Yurupari upukuariwaita, nyãse Deus irumu.

³⁹Asui yandete yamaa panye umunyawaa aintaretama upe kuaita judewita Jeruzalẽ kiti yuiri. Asui aintauyuka ae aintauxari uyari kurusa rese.

⁴⁰Maa Deus usupiri ae musapiri ara rire, asui uxari yamaa ae.

⁴¹Maa tiuxari muiri mira umaa ae, maa uxari yamaa ae yande uparawakawaita yambeu arama sesewara, yande yambauwaita irumu yauwaita yuiri irumu uyuiri rire upaka manusawa sui.

⁴²Asui umundu yambue kuaita miraita yambeu arama ainta supe aete kua Deus uxariwaa umbeu arama aintapekadu kuaita upakawaita kuaita umanuwaita yuiri.

⁴³Panye kuaita utitikawaita aintaumbeu sesewara awa uxari ipia sera rese uperduari kuri isui ipekadu.

⁴⁴Pedru upurungita ramere uiku kua nyenga Espiritu Santu uwari aintarese muiri kuaita usenduwaita kua nyenga.

⁴⁵Asui kuaita uruyariwaita sirkunsizão uriwaita Pedru irumu aintaakayemu aintaumaa nyãse kua Espiritu Santu uwari aintarese kuaita tiwaita judeu yuiri.

⁴⁶Nyãse aintausendu aintaupurungita apekatuwaraita nyenga rupi, aintaumee purangawaa Deus supe. Asui Pedru umbeu:

⁴⁷—Maitaa yapuderi yasaisu aintasui ii yabatizari arama kuaita urikuwaita Espiritu Santu kuaye yaneyawe?

⁴⁸Asui umundu aintaubatizari arama ainta Jesus Kristu rera rese. Asui aintaupurandu ae uiku aramare aintairumu yepeyepe ara.