Read Nhengatu Atu 11 Bible Online

Atu 11 - Nhengatu bible

Atu 11

¹Asui kuaita apustuluita kuaita aintaimuita Kristu rese yuiri Jeruzalẽ kiti aintausendu aintausuanti Deus nyenga kuaita tiwaita judeu.

²Asui Pedru usuwaa upe Jeruzalẽ kiti kuaita sirkunsizão puraita aintaumbeu ixupe:

³—Marantaa resu aintapiri kuaita tiwaita sirkunsizão pura asui rembau aintairumu?

⁴Asui pedru unyee ainta supe, puranga maye usasawa uyupirunga sui, unyee:

⁵—Haiku rame kuera Jupi upe hapurandu Deus irumu, asui sekerupi ixe asui hamaa uwiye iwaka sui yepe fazenda uyupirari kuatru upenasawa irumu asui uri kuayentu seruaki.

⁶Asui hamaa puranga ixupe hamaa suu, nyãruwaita yuiri, maiwa yuiri, wirá yuiri.

⁷Asui hasendu yepe nyenga umbeu ixe arama: —Pedru, repuamu, reyuká, rembau.

⁸Asui hasuaxara: —Umbaa, seruixawa, nyãse tire hambau kua tenyuntuwara tiyuiri ikiawaita.

⁹Asui hasendu mukuĩsawa kua nyenga, umbeu: —Teremanduari tenyuntuwaraita kua Deus uxariwaa ikiaimawaita.

¹⁰Yawe umunya musapiri viaji asui uyuiri iwaka kiti.

¹¹Asui aramete musapiri apigawaita aintausika ukara kiti yaikuwaa upe umunduwaita Sezareya sui aintaumaa arama ixe.

¹²Asui kua espiritu umbeu ixe arama hasu arama aintairumu tiarama mukuĩ hamanduari, asui aintausu seirumu kuaita yuiri semuita Kristu rese asui yawike suka kiti nyã apigawa.

¹³Asui umbeu yande arama maye umaa yepe anju suka upe umbeu ixupe: —Remundu Jupi kiti aintaururi arama nepiri Simão sera rakapirawaa Pedru.

¹⁴Ae kuri umbeu inde arama nyenga reyumukaturu aramawaa ipupe panye inde neruka puraita yuiri.

¹⁵Asui hayupiru irumu hapurungita ainta supe uwari aintarese kua Espiritu Santu kuaye uwariwaa yawe yanerese uyupirungawa upe.

¹⁶Asui hamanduari nyã nyenga Yaneruixawa umbeuwaa: "Supiwa Juão ubatizari ii irumu maa habatizari kuri penye Espiritu Santu irumu."

¹⁷Ape Deus uxari rame ainta supe kua uxariwaa yande arama yaxari irumu yanepia yaneruixawa Jesus rese, maataa maa ixe tiarama hamunya kua Deus uputariwaa?

¹⁸Asui aintaukiririntu aintausendu irumu kua inyenga asui aintaumee purangawaa Deus supe, aintaumbeu: —Ape Deus uxari sasiyara aintaumanduari aintapekadu kuaita tiwaita judeu aintauriku arama mundu nunkawaa upawa.

¹⁹Asui kuaita uyusaĩwaita aintauyuká resewara Estevão aintausu Fenisia kiti Xipri kiti Antiukia kiti yuiri, aintaumbeu kua nyenga ainta supenyu kuaita judewita.

²⁰Maa yepeyepe aintasuiwara uriwaita Xipri sui Sireni sui yuiri aintausu Antiukia Kiti aintaumbeu yuiri greguita supe kua nyenga purangawaa yaneruixawa Jesus rese.

²¹Asui yaneruixawa uajudari ainta puranga asui siya miraita aintauruyari asui aintauyereu yaneruixawa banda kiti.

²²Asui aintaresewara usika aintapiri kuaita ingreja puraita Jeruzalẽ kiti asui aintaumundu Barnabe Antiukia kiti.

²³Asui usika aintapiri suuri ipia umaa irumu Deus grasa asui umbue ainta aintauiku arama santa yaneruixawa rese yawewarawate.

²⁴Nyãse apigawa purangawaa ae, teresemu ipia Espiritu Santu irumu uruyari kirimbawa asui siya miraita aintauxari aintapia yaneruixawa rese.

²⁵Asui Barnabe usu Tarsu kiti usikari arama Saulu.

²⁶Asui uwasemu rire ae urasu ae Antiukia kiti. Asui aintaumbue siya miraita ingreja upe yepe akayu. Asui Antiukia upe aintauyupiru aintauseruka kristão muiri kuaita uruyariwaita.

²⁷Asui nyã tempu yepeyepe utitikawaita uri Antiukia kiti Jeruzalẽ sui.

²⁸Asui yepe aintasuiwara serawaa Agabu upuamu utitika Espiritu irumu umbeu: —Turusu kuri yumãsi upisika panye kua mundu upe. Asui aintaupurara yumãsi aintaruixawa pukusawa Klaudiu.

²⁹Asui kuaita uruyariwaita aintaumuatiri aintamaa kuaye aintaupuderiwaa yawe aintaumundu arama ae ainta supe kuaita aintaimuita Kristu rese uikuwaita Judeya upe.

³⁰Asui yawe aintaumunya, aintaumundu ae aintapiri kuaita ansiãoita Barnabe irumu Saulu irumu yuiri.