Read Nhengatu Atu 12 Bible Online

Atu 12 - Nhengatu bible

Atu 12

¹Nyã tempu Erudi umundu aintaumprezu aintauxari aintaupurara yepeyepe ingreja puraita.

²Asui uyuká espada irumu Tiagu kua Juão imu.

³Asui umaa irumu suuri kuaita judewita aintaumaa yawewaa umprezu yuiri kua Pedru. Nyã ara upe aintaumbau pão seẽwaa.

⁴Asui umprezu rire ae umburi ae kadeya kiti asui uxari dezeseis surara aintausaru ae, asui uputari urasu miraita umaa arama ae paskua rire.

⁵Asui aintausaru Pedru kadeya upe, maa kuaita ingreja puraita kirimbawa aintaupurandu sese Deus irumu.

⁶Asui nyã pituna senundere Erudi uputari uxari miraita umaa ae Pedru ukiri mukuĩ suraraita aintapiterupi aintaupukuari ae santa mukuĩ kurenti irumu, asui aintausaru ae ukara kiti kuaita guardaita.

⁷Asui uri yepe yaneruixawa anju asui yepe turi umuturi kadeya upe, asui upisika Pedru iapa rese umbaka ae umbeu ixupe: —Repuamu kutara, asui kuaita kurenti uwari ipu sui.

⁸Asui kua anju umbeu ixupe: —Remundeu nerupa rexari nesapatu neipi rese. Asui umunya yawe. Asui kua anju umbeu yuiri ixupe: —Rexari nerese nepupekawa asui reyuiri serakakuera.

⁹Asui usemu usu sakakuera, maa tiukuawa supiwa nyã umunyawaa ixupe kua anju, umanduari ikerupintu.

¹⁰Asui aintausasawa rire kua primeru guarda asui kua mukuĩsawa guarda yuiri aintausu kadeya rukena kiti feru suiwara usu aramawaa sidadi kiti, asui uyupirari simutara asui aintauwata pee rupi asui anyunte kua anju uyuiri isui.

¹¹Asui upaka rame puranga kua Pedru umbeu ipia upe: —Kuiri hakuawa supiwa seruixawa umundu ianju uyurawa arama ixe Erudi ipu sui uyurawa ixe isui kua aintauputariwaa aintaumunya ixe arama kuaita judewita.

¹²Asui umanduari irumure uiku sese usu Maria ruka kiti kua Juão Marku maya, apete siya miraita aintauyumuatiri aintaumbeu arama Deus.

¹³Asui usenui irumu ukena upe uri umaa awataa ae kua kriada serawaa Rudi.

¹⁴Ukunyeseri irumu Pedru nyenga suuri ipia, asui tiumanduari uxari uwike maa uyuiri uyana umbeu ainta supe: —Pedru uiku ukara kiti.

¹⁵Asui aintaunyee ixupe: —Neakangaiwa reiku inde. Maa kirimbawa umbeu yuiri: —Supiwa hambeu aete. Asui aintaumbeu: —Ianju ae.

¹⁶Maa Pedru usenui uiku, asui aintaupirari ixupe ukena aintaumaa ae asui aintaakayemu aintaumaa.

¹⁷Maa ipu irumu umukiriri ainta, asui umbeu ainta supe maye yaneruixawa uyuka ae kadeya sui, asui umbeu yuiri: —Pembeu Tiagu supe yanemuita supe yuiri. Asui usu amu kiti.

¹⁸Asui kuemana ainta aintauyumusikie kuaita suraraita nyãse tiaintaukuawa maye kua Pedru rese.

¹⁹Asui Erudi usikari ae, asui tiuwasemu ae asui upurandu kuaita suraraita, asui umundu aintaukastigari kuaita suraraita. Asui usu Judeya sui Sezareya kiti uikupuku uiku akiti.

²⁰Erudi ipiaiwa umaa kuaita miraita Tiru upe Sidum upe yuiri, maa aintauri ipiri yepewasu aintauwasemu rire purangawaa Blastu irumu kua aintaruixawa ajudarisara, asui aintaupurandu ae uxari arama timaarese aintauiku, nyãse aintamiraita aintaupiripana aintaumbau arama aintaruixawa retama sui.

²¹Asui nyã ara Erudi umbeuwaa umundeu tuixawa rupa asui uwapika tuixawa trunu upe, asui upurungita ainta supe.

²²Asui kuaita miraita aintausasemu aintaumbeu: —Yepe tupana nyenga ae timaa apigawa nyenga ae.

²³Asui aramete yepe yaneruixawa anju ukastigari ae, nyãse timaa umee purangawaa Deus supe, asui tapuru umbau ae, asui umanu.

²⁴Maa yaneruixawa nyenga uyukiriari puranga uyusãi aintapiri kuaita siyawaita.

²⁵Asui aintauyuiri Jeruzalẽ sui kuaita Barnabe Saulu yuiri aintaumbauwaa rire aintaumunya kua aintaupuranduwaa aintaumunya, asui aintaurasu aintairumu yuiri kua Juão aintauserukawaa Marku.