Read Nhengatu Atu 13 Bible Online

Atu 13 - Nhengatu bible

Atu 13

¹Aikuete utitikawaita umbuewaita yuiri ingreja upe Antiukia kiti, aintarera Barnabe, Simeão serawaa rakapira Nijeru, Lusiu Sireni suiwara, Manaem kua serakuenawaa aintaruixawa Erudi ixupe aramawaa, asui Saulu yuiri.

²Asui aintaupurandu irumu yaneruixawa irumu aintauyukuaku aintauiku, Espiritu Santu umbeu ainta supe: —Pemutirika ixe arama kuiri nyã Barnabe Saulu yuiri aintaumunya arama kua muraki hasenuiwaa ainta sesewara.

³Asui aintauyukuaku aintauiku rire aintaupurandu Deus irumu aintauxari aintaipu aintarese asui aintaumundu aintausu arama.

⁴Asui Espiritu Santu umundu resewara ainta aintausu Seleusia kiti asui aintausu Xipri kiti.

⁵Asui aintausu rame aintauiku Salamina kiti aintaumbue Deus nyenga aintasinaguga upe kuaita judewita, asui Juão uajudari ainta.

⁶Asui aintausasawa panye kaapuamu rupi ate Pafu kiti, asui aintauwasemu yepe paye judeu utitikawaa ugananiwaa ae, serawaa Barjesus.

⁷Asui uiku irumu kua aintaruixawa ukuawawaa serawaa Serjiu Paulu. Asui kua tuixawa usenui ipiri kua Barnabe Saulu yuiri uputari usendu kua Deus nyenga.

⁸Maa kua paye serawaa yuiri Elima, umuruanyana ainta, uputari uganani kua tuixawa tiarama uruyari puranga.

⁹Maa kua Saulu serawaa yuiri Paulu teresemu ae Espiritu Santu irumu kirimbawa umaa ixupe kua paye, umbeu ixupe:

¹⁰—Inde Yurupari raira, teresemu inde panye gananisawa irumu panye puxuwerasawa irumu, indete suanyana panye kua purangawaa. Maitaa tinekuere inde remuapara yaneruixawa rapee satambikawaa?

¹¹Asui kuiri yaneruixawa uxari ipu nerese sesaima arama inde yepe tempu. Asui aramete uwari sese nuvi yawewaa pitunawasuwaa yuiri, asui uwata usu usikari amu uruwata arama ae ipu irumu.

¹²Asui kua tuixawa uruyari umaa irumu kua usasawawaa, asui iakayemu usendu kua nyenga yaneruixawa rese.

¹³Asui Paulu usu Pafu kiti sumuaraita irumu, asui aintausu Perje kiti Panfilia upe, asui Juão uxari aintauyuiri Jeruzalẽ kiti

¹⁴Maa aintausasawa Perje aintausu Antiukia kiti Pizidia upe, asui sauru rame aintausu aintauwapika sinaguga upe.

¹⁵Aintauleri rire Muize nyenga aintanyenga yuiri kuaita utitikawaita kuaita usaruwaita sinaguga aintaumundu kuekatu ainta supe arama aintaumbeu: —Yanemuita, periku rame yepe nyenga pembue arama kuaita miraita, pembeu ae.

¹⁶Asui Paulu upuamu umukiriri ainta ipu irumu unyee: —Penye apigawaita israelitaita, penye yuiri amuita usikiewaita Deus sui, pesendu senyenga.

¹⁷AintaDeus kuaita israelitaita uparawaka kuaita yaneramunyaita asui uxari siya arama ainta aintauiku ramere Egitu kiti, asui urasu ainta Egitu sui iyuwa kirimbawawaa irumu.

¹⁸Asui Deus uaguentari aintairumu kuaji kuarenta akayu kampu upe.

¹⁹Asui umukanyemu rire seti miraita aintaiwi sui Kanaã upe uxari ainta supe aintayara arama iwi aintayaweyawe.

²⁰Yawe aintauiku kuaji kuatrusentu sinkuenta akayu. Asui uxari ainta supe serakuenawaita ate usika Samuel tempu kua utitikawaa.

²¹Asui aintaupurandu Deus irumu yepe aintaruixawa arama, asui Deus uxari aintaruixawa Saul, Kizi raira ae, Benjamĩ rimiariru ae, aintaruixawa ae kuarenta akayu.

²²Asui Deus umburi ae asui uxari ainta supe aintaruixawa arama Davi, kua umbeuwaa sese: —Hawasemu Davi taira kua Jese yepe apigawa kuaye sepia uputariwaa yawe, umunya kuri kuaye haputariwaa yawe.

²³Asui Davi rimiariruita pitera sui Deus uxari israelitaita supe kua umukaturu aramawaa Jesus kuaye umbeuwaa yawe.

²⁴Asui senundere uri kua Juão umbue kuaita israelitaita sese kua batizmu sasiyara resewara aintaumanduari aintapekadu.

²⁵Asui Juão umbawa irumu imuraki umbeu: —Maitaa pemanduari ixe? Timaa ixe ae. Maa serakakuera uri yepe puranga piriwaa sesui timaa puranga ixe hayawika arama hayurawa isapatu ipi sui.

²⁶Semuita, penye Abraão rimiariruita, penye yuiri penye amuita pesikiewaita Deus sui, umundu yande arama kua inyenga sese kua umukaturu aramawaa yande.

²⁷Nyãse kuaita miraita Jeruzalẽ kiti kuaita yuiri aintaruixawaita tiresewara aintaukunyeseri Jesus tiyuiri aintaukuawa mayesawa aintanyenga kuaita utitikawaita kua aintauleriwaa muiri sauru, aintauxari aintauyuká ae kuaye aintaumbeuwaa yawe kuaita utitikawaita.

²⁸Tiaintauwasemu sese ipuxuwerasawa aintauyuká arama ae, maa aintaupurandu Pilatu irumu uxari arama aintauyuká ae.

²⁹Asui aintaumunya rire ixupe panye kuaye aintaumpinimawaa yawe sese aintaumuye kurusa sui ae asui aintauxari ae iwi kuara kiti.

³⁰Maa Deus usupiri ae manusawa sui.

³¹Asui siya ara uxari aintaumaa ae kuaita uriwaita Galileya sui irumu Jeruzalẽ kiti, aintate kuiri kuaita umbeuwaita sese ainta supe kuaita miraita.

³²Asui kuiri yarasu penye arama kua nyenga purangawaa Deus umbeuwaa yaneramunyaita supe.

³³Deus umunya yande arama, yande tairaita, kuaye umbeuwaa yawe usupiri resewara Jesus, yawete yuiri umpinima Salmu kapitulu mukuĩ upe: "Indete seraira, uyi ara haxari renaseri."

³⁴Asui Deus umbeu sese yakuawa arama supiwa usupiri ae manusawa sui tiarama kuri iyuka. Unyee: —Haxari kuri inde arama kua puranga piriwaa supiwa hambeuwaa Davi supe.

³⁵Ape umbeu yuiri amu Salmu upe: "Tikuri rexari nepurangawaa iyuka."

³⁶Nyãse umanu Davi umunya rire kua Deus umbeuwaa ainta supe kuaita imiraita asui aintaumburi ae samunya ambiraita ruaki, asui iyuka ae.

³⁷Maa tiyuka kua Deus usupiriwaa.

³⁸Ape semuita, haputari pekuawa kuiri yambeu penye arama sese kua upuderiwaa umburi pesui pepekadu.

³⁹Asui mayewaa uxari ipia sese uyurawa kuri ae isui kua tiwa Muize nyenga upuderi uyurawa ae.

⁴⁰Ape pemaa pesui yawaite upisika penye nyã aintaumbeuwaa kuaita utitikawaita:

⁴¹Pemaa penye, penye pekasuariwaita perikute pesikie pemaa, perikute pekanyemu, nyãse hamunya pepiterupi kua hamunyawaa tiwa kuri peruyari aintaumbeu rame penye arama yawewaa.

⁴²Asui aintausemu irumu aintaupurandu ainta aintaumbue arama kuri aete yuiri amu sauru rame.

⁴³Asui aintauyuiri irumu sinaguga sui siya judewita siya yuiri judewita umbuewaita aintausu Paulu Barnabe rakakuera, asui aintaumbue ainta aintauiku arama santa Deus grasa rese.

⁴⁴Asui amu sauru rame kuajintu panye kuaita sidadi upewaita aintauyumuatiri aintausendu arama Deus nyenga.

⁴⁵Asui kuaita judewita aintaumaa kuaita miraita siyawaita asui aintaumuasi, asui aintaumbeu puxuwera sese kua Paulu umbeuwaa, asui aintaukasuari ae.

⁴⁶Asui tiaintautiĩ Paulu Barnabe yuiri aintaumbeu ainta supe: —Yarikute yayupiru yambeu penye arama kua Deus nyenga maa pemburi pesui ae penyepawate, tipeputari kua mundu tiwa upawa, ape kuiri yasu aintapiri kuaita tiwaita judeu.

⁴⁷Nyãse yawe Yaneruixawa umundu yande, umbeu: —Haxari inde aintaturi arama inde kuaita tiwaita judeu, rerasu arama ainta supe nyã umukaturu aramawaa ainta panye kua mundu upe.

⁴⁸Asui suuri kuaita tiwaita judeu aintausendu irumu kua nyenga, asui aintaumbeu purangawaa yaneruixawa nyenga rese, asui aintauruyari panye kuaita urikuwaita kuri mundu nunkawaa upawa.

⁴⁹Asui yaneruixawa nyenga usika aintapiri panye aintaretama upe.

⁵⁰Asui kuaita judewita aintaumpiaiwa kuaita kunyaita aintaurespetariwaita ukuawawaita Muize nyenga aintayuiri kuaita serakuenawaita tetama upe asui aintauyupiru aintaumuruanyana Paulu Barnabe yuiri, asui aintaumburi ainta aintaretama sui.

⁵¹Maa aintaupiri iwi aintaipi sui aintaruaxara asui aintausu Ikuniu kiti.

⁵²Asui kuaita uruyariwaita suuri ainta turusu teresemu ainta Espiritu Santu irumu.