Read Nhengatu Atu 16 Bible Online

Atu 16 - Nhengatu bible

Atu 16

¹Asui usu yuiri Derbe kiti Listra kiti yuiri. Apete uwasemu yepe aintaumbuewaa serawaa Timuteu, imembira kua yepe kunya uruyariwaa judeu ae maa ipaya gregu.

²Aintaumbeu sese purangawaa kuaita uruyariwaita Listra kiti Ikuniu kiti yuiri.

³Asui Paulu uputari urasu irumu kua Timuteu, asui usirkunsidari ae aintaresewara kuaita judewita uikuwaita ape, nyãse panye aintaukuawa gregu ipaya.

⁴Asui aintausuwaa upe aintaumaa muiri tetama aintaumbeu ainta supe kua nyenga aintaumbeuwaa kuaita apustuluita kuaita serakuenawaita yuiri Jeruzalẽ kiti.

⁵Asui aintauxari kirimbawa aintauruyari panye kuaita ingreja puraita, asui muiri ara amuita yuiri aintauxari aintapia Kristu rese.

⁶Asui aintausu panye Frijia kiti panye Galasia kiti yuiri nyãse kua Espiritu Santu usaisure aintaumbue kua nyenga Azia kiti.

⁷Asui Mizia ruaxara kiti aintauiku aintauputari aintausu Bitinia kiti maa Jesus Espiritu usaisure aintausu akiti.

⁸Asui aintausasawa Mizia sui aintauwiye Truadi kiti.

⁹Asui nyã pituna Paulu umaa yepe apigawa Masedunia suiwara ikerupiwaa upe, upuamu suaki upurandu ae umbeu ixupe: —Reyuiriana Masedunia kiti reajudari arama yande.

¹⁰Asui umaa rire kua apigawa ikerupiwaa upe aramete kutara yaputari yasu yamaa Masedunia kiti nyãse yamanduari Deus usenuiwana yande yambue arama ainta sese kua nyenga purangawaa.

¹¹Asui yasu Truadi sui naviu upe, yasu satambika Samutrasia kiti, asui wirande kiti yasika Neapuli kiti.

¹²Asui yasu Filipu kiti yepe Rumawaraita retama ae turusu ae panye tetama sui Masedunia upe. Asui yaiku aintairumu yepeyepe ara aintaretama upe.

¹³Asui sauru upe yasu igarapa kiti yambeu arama Deus akiti, asui yasika yapurungita aintairumu kuaita kunyaita uyumuatiriwaita yanerunde ape.

¹⁴Apete yepe kunya serawaa Lidia Tiatira suiwara ae, uvenderiwaa fazenda pirangawaa umanduariana Deus, asui Deus uxari suuri ipia usendu arama kua Paulu umbeuwaa ainta supe.

¹⁵Asui yabatizari rire ae panye suka puraita yuiri upurandu yande umbeu: —Pemanduari rame haruyari puranga Yaneruixawa nyenga ape haputari pewike seruka kiti peiku arama akiti, asui kirimbawa uputari yande yaiku arama suka upe.

¹⁶Asui yasuwaa upe yambeu Deus yayumuatiriwerawaa upe yawasemu yepe kunyamuku urikuwaa yepe demuniu ipia upe uganyariwaa turusu suixawaita supe dinyeru utitika resewara demuniu ukuawasawa irumu.

¹⁷Asui uri Paulu rakakuera yanerakakuera yuiri usasemu: —Kuaita apigawaita aintaupuraki ixupe kua Deus kirimbawa piriwaa panye sui aintaumbeu penye arama sese kua pee peyumukaturu aramawaa.

¹⁸Asui yawe umunya uiku siya ara asui Paulu ikuere usendu ixupe asui uyereu ibanda kiti umbeu ixupe kua demuniu: —Kuiri hamundu inde sera rese kua Jesus Kristu, resemu isui. Asui nyã urate usemu isui.

¹⁹Asui suixawaita aintaumaa upituana uganyari ainta supe, asui aintaupisika Paulu Sila yuiri aintausiki ainta ukara kiti aintaumaa ainta kuaita serakuenawaita.

²⁰Asui aintaurasu ainta aintapiri kuaita serakuenawaita aintaumbeu ainta supe: —Kuaita apigawaita judewita ainta, aintaumuapatuka panye yaneretama.

²¹Aintaumbue yepe nyenga tiwa yapuderi yasuanti tiyuiri yapuderi yaruyari ae nyãse Rumawaraita yande.

²²Asui kuaita miraita siyawaita aintauri aintawajudari ainta aintauputari aintaunupa ainta, asui kuaita serakuenawaita aintaumusuruka aintarupa, asui aintauxari aintaunupa ainta mirai irumu.

²³Asui aintaunupa rire ainta turusu aintaumburi ainta kadeya kiti, asui aintaumundu usaru ainta puranga kua usaruwaa prezu.

²⁴Asui urasu ainta kadeya piterupi asui upukuari aintaipi mirá rese nyãse kirimbawa aintaumundu usaru kuaita prezuwaita.

²⁵Asui pituna piterupi aintaumbeu Deus aintaunyengari yuiri ixupe kua Paulu Sila yuiri, asui kuaita amuita prezuwaita aintausendu ainta supe arama.

²⁶Asui kutara uriri iwi, asui uriri panye kua kadeya asui aintauyupirari panye ukena, asui aintauyuyurawa panye kuaita aintaupukuariwaita.

²⁷Asui umbaka kua usaruwaa prezu, asui umaa uyupirariana panye kadeya rukena, asui upisika iespada uputari uyuyuká simutara nyãse umanduari aintauyawawa panye kuaita prezuwaita.

²⁸Maa Paulu usasemu tiapu unyee: —Teremunya puxuwera inde arama nyãse ike pawate panye yande.

²⁹Asui usenui aintaururi ixupe yepe turi, asui uyana kadeya kiti uriri usikie asui uyawika Paulu runde sui Sila yuiri.

³⁰Asui urasu rire ainta kadeya sui umbeu ainta supe: —Apigawaita, maataa kuri hamunya hayumukaturu arama ixe?

³¹Asui aintausuaxara ae: —Rexari nepia Yaneruixawa Jesus rese asui umukaturu inde panye neruka puraita yuiri.

³²Asui aintaumbue ae Deus nyenga rese panye kuaita suka puraita yuiri.

³³Asui nyã ura ramete pituna rame uajudari ainta, umpusanga ainta supe aintaperewa. Asui uxari aintaubatizari ae, panye suka puraita yuiri.

³⁴Asui urasu ainta suka kiti asui umee aintaumbau arama, asui uyumusuuri aintairumu panye suka puraita nyãse aintauxariana aintapia Deus rese.

³⁵Asui kuemana ainta kuaita serakuenawaita aintaumundu kuaita suraraita aintaumbeu arama: —Reyuraware kuaita apigawaita.

³⁶Asui kua usaruwaa prezu umbeu Paulu supe kua aintaumbeuwaa: —Kuaita serakuenawaita aintaumundu kuekatu ixe arama haxari arama pesu, ape peyuiriana pesuana puranga.

³⁷Maa Paulu umbeu ainta supe: —Aintaunupa yande aintaumaawaa upe panye tire aintausendu yande arama asui aintaumprezu yande Rumawaraita, ape kuiri maitaa aintauputari uyurawa yande uyumimisawa upe? Tipuranga yawe, maa pexari aintauri aintauyurawa yande aintapawate.

³⁸Asui kuaita suraraita aintaumbeu ae ainta supe kuaita serakuenawaita, asui aintausikie aintausendu irumu Rumawaraita ainta.

³⁹Asui aintauri aintapiri asui aintaupurandu aintauperduari arama aintairumu ainta, asui aintauyurawa ainta, asui aintaupurandu aintauyuiri arama tetama sui.

⁴⁰Asui aintausu kadeya sui, aintausu aintaumaa ipiri kua Lidia, asui aintaumaa rire siya kuaita uruyariwaita aintaumusuuri ainta. Asui aintausu aintasui.