Read Nhengatu Atu 17 Bible Online

Atu 17 - Nhengatu bible

Atu 17

¹Asui aintausasawa Anfipuli upe Apulunia upe yuiri, asui aintausika Tesalunika kiti, ape kuaita judewita aintauriku yepe sinaguga.

²Asui Paulu uwike kuaye uwikewaa yawe muiri tetama upe asui uyusuaxara aintairumu Deus nyenga rese.

³Umbeu ainta supe: —Asui uxari aintaukuawa urikute upurara urikute usemu yuiri manusawa sui kua Kristu, yawe umbeu ainta supe: —Kua Jesus hambeuwaa penye arama sese, Kristute ae.

⁴Asui umuserana yepeyepe aintasuiwara asui aintauyumuatiri Paulu irumu Sila irumu yuiri, yawete yuiri siya greguita umanduariwaita Deus aintauyumuatiri aintairumu asui siya kunyaita purangawaita yuiri.

⁵Asui kuaita judewita aintaumusuaki ainta, asui aintaurasu aintairumu yepeyepe apigawaita puxuwerawaita asui aintaumuatiri kuaita miraita asui aintaumpiaiwa ainta panye tetama upe, asui aintausu Jazum ruka kiti aintauputari aintaurasu ainta ukara kiti miraita runde.

⁶Asui tiaintauwasemu ainta asui aintausiki Jazum yepeyepe uruyariwaita yuiri aintaurasu ainta serakuenawaita ipiri, aintaumbeu: —Kuaita apigawaita umuyereuwaita kua mundu aintausikana yanepiri, asui kua Jazum usuanti ainta.

⁷Asui panye kuaita apigawaita aintaumunya puxuwera Sezar supe nyãse aintaumbeu tuixawa kua Jesus.

⁸Asui aintapiaiwa kuaita miraita serakuenawaita yuiri aintausendu irumu kua nyenga.

⁹Maa aintauyurawa Jazum kuaita yuiri amuita aintaupagari rireana nyã dinyeru aintaupuranduwaa aintairumu.

¹⁰Asui kutara nyã pituna kuaita uruyariwaita aintaumundu Paulu Sila yuiri Bereya kiti. Asui aintausika rire akiti aintauwike judewita sinaguga upe.

¹¹Asui puranga aintaumanduariwaa kuaita Bereyawaraita aintasui kuaita Tesalunikawaraita nyãse suuri aintausuanti kua nyenga, asui muiri ara aintauleri Deus nyenga aintaukuawa arama supiwa kua aintausenduwaa.

¹²Ape siya aintapiterupi aintauxari aintapia sese, siya kunyaita gregu purangawaita siya apigawaita yuiri.

¹³Maa kuaita judewita Tesalunika upe aintausendu irumu Paulu umbue Deus nyenga ainta supe kuaita Bereya upewaraita aintausu aintapiri aintaumpiaiwa ainta aintaumuapatuka kuaita miraita.

¹⁴Asui kuaita uruyariwaita aintaumundu Paulu usu kutara parana turusuwaa rimbiwa kiti, maa Sila Timuteu yuiri aintauikure aintairumu.

¹⁵Asui kuaita urasuwaita Paulu aintaurasu ae Atena kiti, asui umundu ainta aintaumbeu arama Sila Timuteu supe yuiri aintauri arama ipiri kutara maye aintaupuderi, asui aintauyuiri.

¹⁶Asui sasiyara Paulu ipia usaruwaa upe aintauri ipiri Atena kiti nyãse umaa teresemu idulu irumu kua tetama.

¹⁷Asui uyupurungita judewita irumu aintasinaguga upe kuaita yuiri tiwaita judeu umanduariwaita Deus aintairumute yuiri kuaita uikuwaita ukara kiti muiri ara.

¹⁸Asui yepeyepe ukuawawaita epikurewita estuikuita yuiri aintauyusuaxara irumu, asui yepeyepe unyee: —Maataa usikari umbue kua upurungitawaa maya? Amuita aintaumbeu: —Yakuawa sã umbue apekatuwaraita tupana rese. Yawe ainta unyee nyãse umbue Jesus rese upaka manusawa sui.

¹⁹Ape aintaupisika ae asui aintaurasu ae aintauyumuatiriwerawaa upe serawaa Areupagu, asui aintaunyee ixupe: —Maitaa rexari yakuawa maataa kua nyenga pisasuwaa kua rembuewaa?

²⁰Nyãse reruri yande arama nyenga tiwa yakuawa yaputariwaa maa yakuawa mayesawa kua rembeuwaa.

²¹Nyãse kuaita Atena upewaraita aintayuiri kuaita uriwaita apekatu sui uikuwaita akiti anyunte aintaugustari aintaumbeu nyenga pisasuwaa rese, aintaugustari yuiri aintausendu nyenga pisasuwaa.

²²Asui Paulu upuamu aintauyumuatiriwerawaa piterupi umbeu ainta supe: —Penye apigawaita Atenawaraita, hakuawa kirimbawa pemanduari kuaita petupanaita.

²³Asui hawatawaa upe hamaa peretama upe hamaa kuaita pemanduari aramawaita petupanaita, asui hamaa yuiri yepe idulu rendawa pempinimawaa sese: "Ixupe kua tupana tiwa yakunyeseri." Asui kuiri hambeu penye arama sese nyã pemanduariwaa tiwa pekunyeseri.

²⁴Kua Deus umunyawaa kua mundu panye kuaita mundu puraita yuiri iwaka ruixawa ae kua mundu ruixawa yuiri ae, timaa uiku uka (templu) upe aintaumunyawaa aintaipu irumu kuaita apigawaita.

²⁵Timaa nungara watari ixupe yapuderi arama maa yawajudari ae yaneipu irumu, nyãse aete uxari yapaka muiri yande uxari yande arama yasiki arama yaneanga uxari yande arama panye maa.

²⁶Asui yepe sui umunya panye kuaita miraita aintauiku arama panye mundu upe asui uxari ainta supe aintarangawa aintaretama arama yuiri.

²⁷Aintausikari arama Deus aintausaru arama aintauwasemu ae aintaumanduarisawa irumu. Maa timaa apekatu uiku yanesui.

²⁸Nyãse ae uxari yapaka yande uxari yanepira kirimbawasawa, uxari yaiku kua mundu upe kuaye aintaumbeuwaa yawe yuiri kuaita pesuiwaraita umpinimawaita aintaunyee: —Nyãse yande yuiri isuiwaraitate yande panye.

²⁹Ape Deus suiwaraitate yande timaa yapuderi yamanduari yepewasute ae uru irumu u prata irumu u ita irumu kuaita aintaumunyawaita aintaipu irumu kuaita apigawaita kuaye aintaumanduarisawa uputariwaa yawe.

³⁰Timaa Deus umanduari aintaumunyawaita puxuwerawa tiramere aintaukuawa, maa kuiri umundu panye kuaita apigawaita kua mundu upe sasiyara arama aintaumanduari aintapekadu.

³¹Nyãse uxari sangawa yepe ara umbeu arama aintaresewara panye kuaita mundu puraita, uxari kuri yepe apigawa purangawaa umbeu aintarese, asui uxari panye apigawaita ukuawa supiwa ae usupiri resewara ae manusawa sui.

³²Asui aintausendu irumu umbeu yayuiri yapaka manusawa sui yepeyepe ukasuari ae, maa kuaita amuita aintaumbeu: —Amu viaji yaputari yasendu inde arama yawewaa rese.

³³Asui Paulu uyuiri aintapitera sui.

³⁴Maa yepeyepe apigawaita aintauyumuatiri ipiri asui aintauruyari inyenga, yepe aintasuiwara serawaa Diuniziu aete yepe Areupagu ruixawa, asui yepe kunya yuiri serawaa Damari asui amuita yuiri.