Read Nhengatu Atu 19 Bible Online

Atu 19 - Nhengatu bible

Atu 19

¹Asui Apulu uiku rame Kurintu upe Paulu usasawa usu umaa panye aintaretama apekatuwaita asui usika Efezu kiti, ape uwasemu yepeyepe uruyariwaita.

²Asui upurandu ainta: —Maitaa periku kua Espiritu Santu peruyari irumu? Asui aintaunyee ixupe: —Tiyakuawa sã aikue Espiritu Santu.

³Asui Paulu upurandu ainta: —Awa batizmu irumutaa aintaubatizari penye? Aintaumbeu ixupe: —Juão batizmu irumu.

⁴Asui Paulu umbeu ainta supe: —Juão ubatizari ainta sasiyara resewara aintaumanduari aintapekadu, asui umbeu ainta supe aintauxari arama aintapia sese kua uriwaa sakakuera, aete Jesus.

⁵Asui aintausendu irumu kua inyenga aintauxari ubatizari ainta sera rese kua Jesus.

⁶Asui kua Espiritu Santu uwiye aintarese Paulu uxari irumu ipu aintarese, asui aintaupurungita apekatuwaraita nyenga rupi aintaumbue yuiri.

⁷Duzi aintasiyasawa kuaita apigawaita panye.

⁸Asui kirimbawa umbue ainta sinaguga upe musapiri yasi, uyupurungita aintairumu usenuiwaa upe aintauxari arama aintaruixawa arama kua Deus.

⁹Asui yepeyepe santa aintaumanduariwaa tiaintauruyari inyenga aintaumbeu nyenga puxuwerawa sese kua pee aintausenduwaa upe panye kuaita uyumuatiriwaita, asui uyuiri aintasui asui urasu irumu kuaita umbuewaita asui umbue ainta muiri ara Tiranu eskula upe.

¹⁰Yawe umunya mukuĩ akayu, ape panye kuaita uikuwaita Azia upe aintausendu yaneruixawa nyenga panye kuaita judewita panye greguita yuiri.

¹¹Asui Deus umunya siya milagri purangawaita Paulu ipu irumu.

¹²Asui aintaurasu Paulu ipira sui ilensu irupa imuraki rupiara yuiri aintaupisika arama ae kuaita imãsiwaita, asui kua mãsi uxari ainta asui kuaita demuniwita aintausemu aintasui.

¹³Asui yepeyepe judewita uwatawaita umbeu aintaukuawa aintaumburi demuniwita aintauputari yuiri aintaumburi demuniu puxuwerawaita aintasui sera rupi kua Yaneruixawa Jesus, aintaunyee: —Hamundu resemu sera rupi kua Jesus Paulu umbuewaa sese.

¹⁴Seti pesua ainta umunyawaita yawe tairaita ainta kua saserdutita ruixawa serawaa Seva, judeu ae.

¹⁵Maa kua demuniu puxuwerawa usuaxara ainta, umbeu: —Hakunyeseri Jesus Paulu yuiri, maa penye awataa penye?

¹⁶Asui kua apigawa urikuwaa kua demuniu puxuwerawa upuri aintarese asui umuserana ainta asui kirimbawa unupa ainta, asui aintauyawawa uka sui rupaima aintaperewa irumu.

¹⁷Asui aintausendu aintaresewara panye kuaita Efezu upewaraita, panye judewita greguita yuiri, asui aintausikie panye ainta asui aintaumuturusu yaneruixawa Jesus rera.

¹⁸Asui siya uxariwaita aintapia sese aintauri aintaumbeu aintapuxuwerasawa aintaumunyawaita.

¹⁹Asui siya kuaita payeita aintaumuatiri aintalivru payesawa rupiara asui aintausapi ainta aintaumaawaa upe panye. Asui aintaumanduari sinkuenta mili prata aintarikuyara kuaita livruita panye.

²⁰Asui kua yaneruixawa nyenga uyukiriari kirimbawa aintarese.

²¹Asui yawewaa rire kua Espiritu uxari Paulu usikari usu umaa aintapiri Masedunia kiti Akaia kiti yuiri usuwaa upe Jeruzalẽ kiti, uyupurungita ixupe arama: —Hamaa rire kuri aintapiri harikute hasu hamaa aintapiri Ruma kiti yuiri.

²²Asui umundu aintausu Masedunia kiti mukuĩ kuaita uajudariwaita ae, Timuteu Erastu yuiri, maa ae uikure aintairumu Azia upe.

²³Asui aramete puxuwera aintauyumaa sesewara kua yaneruixawa rapee.

²⁴Nyãse ape yepe upurakiwaa uru serawaa Demetriu umunya idulu uwapikawaa rendawa prata suiwara ixupe kua aintatupana Diana, aintauganyari turusu sese kuaita upurakiwaita irumu.

²⁵Asui umuatiri ainta ipiri kuaita yuiri amuita upurakiwaita uru, asui umbeu ainta supe: —Serumuaraita pekuawate yaganyari turusu irumu kua yanemuraki.

²⁶Asui pesendu pemaa yuiri maye nyã Paulu umuserana siya uxari aintauwata amu pee rupi panye Efezu upe panye Azia upe yuiri, umbeu ainta supe umbaa deus kua yamunyawaita yaneipu irumu.

²⁷Kuiri yawaitewaa uri yanemuraki rese nyãse aintaumutenyuntu kua yanemuraki aintaumutenyuntu yuiri itempu kua yanetupana Diana purangawaa, asui aintauputari aintaumburi ipurangasawa kua aintaumanduariwaa panye kuaita Azia upewaraita panye kua mundu puraita yuiri.

²⁸Asui aintapiaiwa ainta aintausendu irumu kua inyenga, asui aintausasemu: —Purangawaa kua Diana Efezuwaraita tupana.

²⁹Asui aintauyumpiaiwa panye aintaretama asui aintauyana panye aintauyumuatiriwerawaa kiti, asui aintausiki aintairumu kua Gaiu Aristarku yuiri kuaita uriwaita Paulu irumu Masedunia sui.

³⁰Asui Paulu uputari uwike aintapiterupi kuaita siyawaita maa kuaita umbuewaita tiaintauxari uwike.

³¹Asui yepeyepe Aziawaraita Paulu anamaita aintaumundu ixupe kuekatu aintaupurandu ae tiarama uwike aintairumu aintauyumuatiriwerawaa upe.

³²Asui amuita usasemu amu nyenga, asui amuita usasemu amu nyenga, asui aintauyumpiaiwa panye ainta, asui siya aintasuiwara tiaintaukuawa maa resewarataa aintauyumuatiri.

³³Asui yepeyepe aintaufursari Alexandre upurungita arama nyãse kuaita judewita aintaururi ae aintarunde kiti. Asui Alexandre uputari umukiriri ainta ipu irumu nyãse uputari upurungita ainta supe kuaita miraita.

³⁴Maa aintaumaa irumu judeu ae aintausasemu muiri ainta mukuĩ ura; yawe aintausasemu: —Purangawaa kua Diana Efezuwaraita tupana.

³⁵Asui kua umpinimawaa aintaretama upe umukiriri kuaita siyawaita, asui umbeu ainta supe: —Penye apigawaita Efezuwaraita, maitaa tipekuawa yande Efezuwaraita yasaru itemplu kua Diana purangawaa, yasaru yuiri Jupiteru imaji (rangawa) uwariwaa iwaka sui?

³⁶Ape tirame maa awa upuderi umbeu gananiwaa ae perikute maa pekiririntu yawaite pemunya puxuwera pepiaiwasawa irumu.

³⁷Nyãse kuaita apigawaita peruriwaita kua kiti tiaintaumunya puxi ixupe kua yanetupana tiyuiri aintaumbeu puxi sese.

³⁸Ape uputari rame maa umbeu puxi amuita rese kua Demetriu kuaita yuiri irumuwaita pexari aintaumbeu ainta supe kuaita serakuenawaita yaneruixawa supe yuiri.

³⁹Maa peputari rame pesendu xinga perikute pesaru pesendu aintauyumuatiriwaa upe kuaita serakuenawaita.

⁴⁰Yawaite aintaumbeu puxi yanerese yamunya puxi yayumuatiri resewara ike, nyãse tiyapuderi yambeu ainta supe maa resewarataa yamunya kuaye.

⁴¹Asui umbeu rire kua nyenga umundu aintauyuiri kuaita uyatiriwaita.