Read Nhengatu Atu 2 Bible Online

Atu 2 - Nhengatu bible

Atu 2

¹Asui aintauyumuatiri yepewasu aintapawa yepe ara serawaa Pentekuste.

²Asui kutara tiapu aintausendu iwaka sui kuaye iwitu upeyuwaa yawe asui umuteresemu panye uka aintauwapikawaa upe.

³Asui aintaumaa tata uwiye uiku aintarese aintayaweyawe.

⁴Asui teresemu muiri ainta Espiritu Santu irumu asui aintauyupiru aintaupurungita amuita nyenga rupi kuaye Espiritu uxariwaa yawe.

⁵Aikuete siya judewita supiwa aintapia aintauiku Jeruzalẽ upe uriwaita panye kua mundu sui.

⁶Asui aintausendu irumu ainta kuaita miraita siyawaita asui aintauyumuatiri, asui aintaakayemu aintausendu nyãse aintausendu aintaupurungita aintanyenga rupi kuaita usenduwaita aintayaweyawe.

⁷Asui aintaakayemu asui aintaunyee: —Pemaa maitaa timaa será Galileya suiwaraita kuaita upurungitawaita?

⁸Maitaa maa yasendu aintaupurungita yanenyenga rupi yaneyaweyawe?

⁹Partuita, meduita, elamitaita, kuaita yuiri uyukiriariwaita Mezuputania upe, Judeya upe, Kapadusia upe, Puntu upe, Azia upe yuiri,

¹⁰Kuaita uriwaita Frijia sui, Panfilia sui yuiri, Egitu sui, Libia sui yuiri kuayentu Sireni sui, panye yuiri kuaita Rumawaraita uriwaita umaa yanepiri.

¹¹Panye judewita kuaita yuiri aintaumbuewaita Kretaita Arabiaita yuiri, mayetaa yasendu aintaupurungita yanenyenga rupi yaneyaweyawe sese kua purangawaa Deus umunyawaa?

¹²Asui aintaakayemu aintausendu, tiaintaukuawa ainta, asui aintauyupurungita aintapawa: —Mayesawataa ae?

¹³Amuita aintaukasuari ainta, aintaumbeu: —Aintaukau aintauiku.

¹⁴Maa Pedru upuamu aintairumu kuaita unziwaita, upurungita kirimbawa umbeu ainta supe: —Penye apigawaita Judeyawaraita penye yuiri peikuwaita Jeruzalẽ upe pexari hapurungita kuiri, pesendu senyenga puranga.

¹⁵Nyãse timaa aintaukau kuaita apigawaita kuaye pemanduariwaa yawe, nyãse kuematere.

¹⁶Maa kua usasawa kuiri aete nyã umbeuwaa kuera kua utitikawaa Juelu:

¹⁷Deus umbeu: —Anyu aramawaa ara upe kuri hayusena seEspiritu aintarese miraita panye, asuiwana kuri aintautitika kuaita perairaita perayeraita yuiri, asui kuaita kurumiwasuita aintaumaa kuri angaita, asuiwana kuri kuaita tuyuweita aintakerupi kuri ainta.

¹⁸Arame kuri hayusena seEspiritu aintarese kuaita upurakiwaita ixe arama apigawaita kunyaita yuiri, asui aintautitika kuri.

¹⁹Hamukame kuri aintaumaa tiware aintaumaa iwaka rese, asui hamukame kuri aintaumaa tiware aintaumaa kua mundu upe, aintaumaa kuri tuwi, tata yuiri, tatatinga yuiri,

²⁰Asui pitunawasu kuri kua kurasi, asui uyutrukari kuri tuwi yawe kua yasi senundere kua yaneruixawa ara purangawaa usika kuri.

²¹Asuiwana kuri umukaturu panye kuaita usenuiwaita yaneruixawa rera rese.

²²Penye apigawaita israelitaita, pesendu kua nyenga: —Jesus Nazare suiwara kua apigawa, Deus uxariwaa pekuawa sese, aintairumu kuaita milagrita tiwaitare pemaa Deus umunyawaita pepiterupi Jesus ukuawasawa irumu, kuaye pekuawawaa yawe.

²³Asui kua Jesus, aintauxari rire ae suanyanaita supe, kuaye Deus ukuawawaa yawe kuxima, kuaye uputariwaa yawe kuxima, asui peyuká ae kurusa rese aintaipu irumu kuaita apigawaita puxuwerawaita.

²⁴Maa Deus usupiri ae uyurawa rire ae manusawa ipu sui, nyãse timaa upuderi uxari manusawa umprezu ae.

²⁵Nyãse Davi umbeu sesewara: "Hamaa seruixawa serunde kiti yawewarawate, nyãse uiku seruaki sekatusawa sui tiarama hawari.

²⁶Ape suuri sepia, seapeku uyumusuuri, asui sepira yuiri upitu kuri usaru.

²⁷Nyãse timaa kuri rexari sepia manusawa upe, tiyuiri rexari iyuka ipira kua purangawaa.

²⁸Rexariana hakuawa kua pee upakawaa, remuteresemu sepia suuriwaa irumu seirumu resewarate inde."

²⁹Semuita, hapuderi hambeu satambika sese kua yaneramunya Davi, kuxima umanu ae asui aintaumburi ae iwi kuara kiti, uikure yaneirumu iwi kuara upe ate kuiri.

³⁰Utitikawaa ae ape ukuawa kua Deus umbeuwaa kirimbawa uxari amu ximiariru uwapika itrunu upe.

³¹Asui umaa ae senundere usasawa, asui umbeu sese kua Jesus usemuwaa manusawa sui, timaa uiku manusawa upe tiyuiri iyuka ipira.

³²Deus usupiri manusawa sui kua Jesus, asui panye yande yakuawate sesewara.

³³Asui Deus usupiri ae uiku arama ikatusawa upe, asui Deus uxari ixupe kua Espiritu Santu umbeuwaa, asui uyusena ae kuaye pemaawaa yawe pesenduwaa yawe yuiri.

³⁴Nyãse tire Davi usu iwaka kiti, maa umbeu: "SeDeus unyee seruixawa supe: 'Rewapika sekatusawa upe,

³⁵Ate haxari kuri neruanyanaita neipi wirupi.'"

³⁶Ape pexari aintaukuawa supiwa kuaita Israel rimiariruita, Deus uxari arama tuixawa Kristu kua Jesus pepregariwaa uyari kurusa rese.

³⁷Asui aintausendu irumu kua umbeuwaa sasiyara aintapia, asui aintaupurandu Pedru kuaita amuita apustuluita yuiri: —Semuita, maataa kuri yamunya?

³⁸Asui Pedru umbeu ainta supe: —Pemanduari sasiyara pepekadu asui peyubatizari muiri penye, Jesus Kristu rera rese uperduari arama pesui pepekadu, ape periku kuri kua Espiritu Santu kua umbeuwaa.

³⁹Nyãse umbeu penye arama ae, perairaita supe yuiri, ainta supe yuiri kuaita apekatuwaraita panye ainta supe yuiri, kuaita yaneruixawa Deus usenuiwaita.

⁴⁰Asui siya nyenga irumu umbeu ainta supe, asui kirimbawa usenui ainta, unyee: —Peyumukaturu aintasui kuaita miraita puxuwerawaita kuiriwaraita.

⁴¹Asui kuaita uruyariwaita kua nyenga aintauxari aintaubatizari ainta, asui nyã ara aintauwike aintairumu kuaji tres mili pesua.

⁴²Asui santa aintauiku sese kua nyenga apustuluita umbuewaita, asui aintauyumuatiri aintaumbau pão aintaupurandu Deus irumu yuiri.

⁴³Asui aintaakayemu muiri ainta aintapia upe, asui kuaita apustuluita aintaumunya siya milagri, siya tiwaitare yuiri yamaa.

⁴⁴Asui yepewasu panye kuaita uruyariwaita asui aintauxari yuiri yepewasu arama aintayara arama.

⁴⁵Asui aintauvenderi aintakupixawa panye maa aintaurikuwaita yuiri asui aintaumee ainta supe aintayaweyawe sikuyara kuaye watariwaa yawe amuita supe.

⁴⁶Asui yepewasu aintauyumuatiri templu upe muiri ara, asui aintaumbau pão aintaruka yaweyawe, asui aintaumbau suuriwaa irumu aintapia.

⁴⁷Asui aintaumee purangawaa Deus supe, asui purangawaa panye miraita umaa ainta. Asui yaneruixawa uxari aintauwike aintairumu muiri kuaita umukaturuwaita.