Read Nhengatu Atu 20 Bible Online

Atu 20 - Nhengatu bible

Atu 20

¹Asui aintaupituana aintaipiaiwa, asui Paulu umundu yepe usenui ipiri kuaita umbuewaita asui umusuuri rire ainta, umbeu sesewara asui usu Masedunia kiti.

²Asui usu panye aintaretama kiti umusuuri ainta turusu, asui usika Gresia kiti.

³Asui uiku aintairumu musapiri yasi. Asui uputari irumu usu Siria kiti usendu aintaresewara kuaita judewita aintauputari aintauyuká ae uyumimisawa upe, asui umanduari purangate uyuiri Masedunia kiti.

⁴Asui usu irumu kua Supatru Bereya suiwara Piru raira ae, asui Aristarku yuiri Sekundu yuiri Tesalunika suiwaraita ainta, asui Gaiu kua Derbe suiwara asui Timuteu yuiri, asui kuaita Azia suiwaraita yuiri Tikiku Trufimu yuiri.

⁵Aintate usuwaa yanerunde, asui aintausaru yande Truadi upe.

⁶Asui nyã ara rire yambauwaa seẽwaa yasu Filipu sui, asui sinku ara rire yayariana aintarendawa kiti, asui yaiku aintairumu yepe semana.

⁷Asui mitu rame yayumuatiri irumu yapixama arama pão, Paulu umbeu ainta supe nyãse uputari usu aintasui wirande kiti, asui uikupuku upurungita aintairumu ate pituna piterupi.

⁸Ape aikue siya turi uka kiti yayumuatiri akiti iwatewaa sualyu kiti.

⁹Asui yepe kurumiwasu serawaa Eutiku uwapika janela upe tipusi upisika ae ukiri uiku nyãse uikupuku upurungita kua Paulu, asui uwari iwate sui iwi kiti, asui aintausu usupiri ae umanuana.

¹⁰Asui Paulu uwie ipiri, asui uyawika uyumana ae, asui unyee ainta supe: —Tepexari sasiyara pepia, nyãse upakare uiku.

¹¹Asui uyuiri uyupiri, asui upixama pão uu ae, asui upurungita turusu ate kuema ae. Asui usu aintasui.

¹²Asui aintaurasu kua kurumiwasu upakate ae, asui turusu suuri ainta. Paulu usika Miletu kiti

¹³Maa yande yasure yawiye naviu upe yasu arama Asu kiti, yawasemu arama akiti Paulu, nyãse yawe umbeu yande arama, asui uwata pee rupi.

¹⁴Asui yasuanti ae Asu kiti uwiye yaneirumu naviu kiti, asui yasu Mitilene kiti.

¹⁵Asui yasu Mitilene sui, asui wirande kiti yasasawa Kiu ruaxara, asui wirande kiti yayari Samu kiti, asui amu ara rire yasika Miletu kiti.

¹⁶Nyãse Paulu umanduari usasawa Efezu nyãse tiuputari uiku Azia upe, nyãse usu putari kutara Jeruzalẽ kiti umaa arama aintairumu Pentekuste ara sã upuderi rame.

¹⁷Asui Miletu upe usenui ipiri kuaita ingreja serakuenawaita Efezu upewaita.

¹⁸Asui aintauyumuatiri ipiri unyee ainta supe: —Penye pekuawate mayetaa hawata pepiterupi hayupiru hayuiri Azia kiti ate kuiri.

¹⁹Pirasuawaa yawe hapuraki yaneruixawa supe, siya viaji hayaxiu perese turusu, hapurara aintaresewara kuaita judewita uputari upisika ixe.

²⁰Pekuawate tihasaisu pesui kua nyenga purangawaa maa hambue penye arama aintausenduwaa upe panye, panye uka upe yuiri.

²¹Hambeu sesewara kua Deus uputari sasiyara yamanduari yanepekadu sesewara kua uruyarisawa yaneruixawa Jesus rese, hambeu ainta supe panye judewita greguita yuiri.

²²Asui seespiritu upuraki sepia upe hasu arama Jeruzalẽ kiti, maa tihakuawa mayetaa hasasawa akiti.

²³Maa hakuawate kua Espiritu Santu umbeu ixe arama aintarendawa yaweyawe aintaumprezu kuri ixe akiti, hapurara kuri.

²⁴Maa timaa arama ixe arama hamanu rame, maa haputari hambauwaa kua umunduwaa hamunya semuraki yuiri uxariwaa hamunya kua yaneruixawa Jesus, hambeu arama sese kua inyenga purangawaa Deus purangasawa rese.

²⁵Kuiri hakuawa tikuri pemaa seruwa, panye penye hambuewaita sese kua yaneruixawa Deus miraita.

²⁶Asui uyi ara hambeu penye arama tihariku kulpa ukanyemu rame kuri yepe pesuiwara Deus sui.

²⁷Nyãse timaa hasaisu kua hambuewaa penye arama sese kua Deus nyenga.

²⁸Kuiri pemaa pesui puranga, pesaru puranga kuaita Espiritu Santu uxariwaita penye arama pesaru arama, Deus ingrejaita kuaita upiripanawaita suwi irumu.

²⁹Hakuawate hasu rire pesui aintauwike kuri pepiterupi kuaita yawarate nyãruwaita timaa kuri aintauxari ueskapari ingreja puraita.

³⁰Asui pepiterupi sui yuiri kuri aintausemu kuaita apigawaita aintaumbeu kuri nyenga tenyuntuwaa aintausenui arama aintausu arama aintarakakuera kuaita uruyariwaita.

³¹Ape pemaa pesui puranga, pemanduari yawewarawate serese mayetaa hambue kuera penye muiri penye ate hayaxiu, musapiri akayu hambue penye muiri ara muiri pituna yuiri.

³²Asui kuiri haputari yaneruixawa usaru penye puranga; haputari yuiri peiku puranga sesewara kua inyenga purangawaa rese, kua uxariwaa peyukiriari puranga Deus rese, uxari yuiri ixupe arama penye aintairumu panye kuaita umukaturuwaita.

³³Tiawa irumu hamuasi prata, uru yuiri, nẽ rupa yuiri.

³⁴Penyete pekuawa mayetaa hapuraki seipu irumu hariku arama kua watariwaa ixe arama ainta supe yuiri kuaita serumuaraita.

³⁵Ape hamukameana pemaa yarikute yapuraki yapuderi arama yawajudari kuaita pirasuawaita, ape pemanduari Yaneruixawa Jesus umbeuwaa: —Suuri piri kua umeewaa amuita supe arama isui kua usaruwaa aintaumee ixupe.

³⁶Asui umbeu rire panye kua inyenga umunya benditu, upurandu Deus irumu aintairumu panye kuaita amuita.

³⁷Asui aintauyaxiu turusu, asui aintauyumana ae nyãse aintaugustari resewara ae, asui aintaubejari Paulu.

³⁸Asui sasiyara ainta turusu nyãse ainta, umbeu ainta supe: —Tikuri pemaa seruwa mukuĩsawa asui aintausu irumu naviu kiti.