Read Nhengatu Atu 21 Bible Online

Atu 21 - Nhengatu bible

Atu 21

¹Asui yasu rire aintasui yasu naviu rupi sutinga irumu satambika Kuzi kiti, asui yepe ara rire yasu Rudi kiti, asui yasu Patara kiti.

²Asui yawasemu amu naviu usuwaa Fenisia kiti, asui yawiye aintairumu, asui yasu aintairumu

³Asui yamaa irumu Xipri yayasawa sendawa kiti, yasu arama Siria kiti, asui yayari Tiru kiti, nyãse aintauputari aintauxari ibagaji akiti.

⁴Asui yawasemu kuaita uruyariwaita, ape yaiku aintairumu seti ara; asui Espiritu Santu irumu aintaumbeu Paulu supe tiarama usu Jeruzalẽ kiti.

⁵Asui sangawa yasu arama aintasui, asui aintauri yaneirumu panye aintarimirikuita aintarairaita yuiri aintarendawa sui, asui yamunya benditu praya rese yapurandu arama Deus irumu.

⁶Asui yambeu yaneresewara ainta supe, asui yawiye naviu kiti, maa amuita aintauyuiri aintaruka kiti.

⁷Asui yasu rire Tiru sui yayari Pitulumaida kiti, asui yamukuema kuaita uruyariwaita asui yaiku aintairumu yepe ara.

⁸Asui wirande kiti yayuiri aintasui yasu arama Sezareya kiti; asui yawike Filipe ruka upe kua umbuewaa nyenga purangawaa, aete aintasuiwara kuaita setiwaita, asui yaiku irumu.

⁹Uriku kuatru tayeraita kunyamukuita utitikawaita ainta.

¹⁰Asui yaiku irumu yepeyepe ara, asui uri yepe utitikawaa Judeya suiwara serawaa Agabu.

¹¹Asui uri umaa yanepiri, asui umaa Paulu sinturão, asui upukuari ipi ipu yuiri, asui unyee: —Yawe unyee kua Espiritu Santu yawe kuri judewita upukuari Jeruzalẽ kiti kua sinturão iyara asui aintauxari kuri ae aintaipu kiti kuaita tiwaita judeu.

¹²Asui yasendu irumu kua inyenga yapurandu ae aintaupurandu yuiri ae kuaita amuita tiarama usu Jeruzalẽ kiti.

¹³Asui Paulu usuaxara ainta: —Marantaa peyaxiu, marantaa pemusasiyara sepia? Nyãse suuri ixe prezu arama ixe, suuri yuiri ixe hamanu rame Jeruzalẽ kiti sera resewara kua yaneruixawa Jesus.

¹⁴Asui tiumunya kuaye yambeuwaa yawe, asui tiyapurandu ae, asui yambeu ixupe: —Remunya kuaye yaneruixawa uputari yawe.

¹⁵Asui yawe rire yayumukaturu yasu arama Jeruzalẽ kiti.

¹⁶Asui yepeyepe uruyariwaita Sezareya suiwaraita aintausu yaneirumu, asui aintaurasu aintairumu yepe uruyariwaa tuyuwe serawaa Minasum yakiri arama suka upe pituna rame.

¹⁷Asui kuaita uruyariwaita suuri aintausuanti yande yasika irumu Jeruzalẽ kiti.

¹⁸Asui wirande kiti Paulu usu yaneirumu Tiagu ipiri, ape aintaumuatiri panye kuaita ingreja serakuenawaita.

¹⁹Asui umukuema rire ainta, umbeu ainta supe arama panye Deus umunyawaita irupi upuraki resewara ixupe.

²⁰Asui aintaumee purangawaa Deus supe aintausendu irumu kua inyenga, asui aintaunyee ixupe: —Inde yaneanama, rekuawate siya mili kuaita uruyariwaita aintapiterupi kuaita judewita, asui kirimbawa aintauruyarire kua Deus nyenga kuximawara.

²¹Asui aintausenduana neresewara rembue panye kua judewita tiwaita judeu piterupi aintauxari arama Muize nyenga, aintausendu neresewara rembeu ainta supe arama tiarama aintausirkunsidari aintaraira, tiarama aintaumunya aintakustumi Deus nyenga kuximawara rese.

²²Maataa kuri yamunya? Nyãse aintaukuawa kuri resikana.

²³Ape kuri remunya kuaye yambeu yawe inde arama: —Aikue yanepiterupi kuatru apigawa aintarimutara aintaumukame yamaa aintaumunya kuaye aintaumbeuwaa yawe Deus supe.

²⁴Resu aintairumu kuaita apigawaita asui reyumukaturu aintairumu, asui repagari aintauyapina arama aintaawa, ape aintaukuawa kuri timaa supiwa kua aintaumbeuwaa nerese; maa aintaukuawa arama kuri remunyate maye Deus nyenga kuximawara.

²⁵Maa kuaita tiwaita judeu uruyariwaita yambeuwana ainta supe papera upe yamanduari tipuranga aintaumbau sukuera aintauxariwaa idulu supe, timaa yuiri aintauu tuwi, timaa yuiri aintaumbau sukuera tiwa aintauyuka isui tuwi, timaa yuiri aintaumunya tenyuntu aintapira irumu.

²⁶Asui Paulu usu aintairumu kuaita apigawaita asui uyumukaturu aintairumu, asui uwike templu kiti umbeu arama aintaukuawa arama maa ara upe uyupiru umunya kua umukaturu arama uxari arama yuiri aintaresewara muiri ainta.

²⁷Asui kuaji aintaumbauwaa seti ara umukaturu arama ainta, aintauri kuaita judewita uriwaita Azia sui aintaumaa Paulu templu upe, asui aintaupurungita puxuwera Paulu rese, asui aintaupisika ae aintaipu irumu.

²⁸Asui aintausasemu: —Penye israelitaita peajudari yande nyãse kua apigawa uwata umbue kua miraita aintaumuruanyana yande, aintaumuruanyana Deus nyenga kuximawara, kua yanerendawa yuiri, asui urasu greguita templu kiti umuaiwa kua yanerendawa purangawaa.

²⁹Asui aintaumaawana Trufimu kua Efezu suiwara uwata Paulu irumu aintarendawa upe, asui aintaumanduari urasu ae irumu templu kiti.

³⁰Asui aintauyumpiaiwa panye kuaita miraita aintarendawa upe, aintapiaiwa aintauyumuatiri, ape aintaupisika Paulu aintausiki ae templu sui, asui arire aintaumusikindawaa ukena.

³¹Asui aintauputari aintauyuká ae usendu aintaresewara kua kumandanti aintapiaiwa panye kuaita Jeruzalẽ upewaraita.

³²Asui kua kumandanti urasu suraraita aintakapitão yuiri asui uyana aintapiterupi, asui aintaupitu aintaunupa Paulu aintaumaa irumu kua kumandanti suraraita yuiri.

³³Asui kua kumandanti umusuaki Paulu, asui upisika ae, asui umundu isuraraita aintaupukuari ae mukuĩ kurenti irumu, asui upurandu miraita: —Maataa sera kua apiga? Asui maataa umunya penye arama?

³⁴Maa kuaita miraita aintausasemu kirimbawa, amuita usasemu amu nyenga rupi, asui amuita usasemu amu nyenga rupi yuiri, asui tiumanduari supiwa maa resewarataa aintauyumpiaiwa, ape umundu aintaurasu ae suraraita ruka kiti.

³⁵Asui Paulu usika irumu eskada upe aintausuanti aintausupiri ae aintaurasu ae kuaita suraraita, nyãse aintauyumpiaiwa kuaita miraita siyawaita.

³⁶Maa kuaita miraita siyawaita aintausu sakakuera aintausasemu aintaunyee: —Peyuká ae.

³⁷Asui aintaumuwike irumu Paulu suraraita ruka kiti, unyee ixupe arama kua kumandanti: —Maitaa rexari hapurungita neirumu? Asui usuaxara ae: —Maitaa rekuawa gregu nyenga?

³⁸Maitaa tiserá inde kua Egitu suiwara urasuwaa kuatru mili apigawaita kampu kiti, kuaita uyumimiwaita aintakise aintamaa wirupi aintauyuká arama amuita uyumimisawa upe?

³⁹Asui Paulu usuaxara ae, unyee: —Ixe judeu uriwaa Tarsu sui, yepe tetama purangawaa Silisia kiti. Kuiri hapurandu inde, rexari hapurungita ainta supe arama kuaita miraita.

⁴⁰Asui uxari upurungita, asui upuamu eskada rese, umukiriri ainta ipu irumu kuaita miraita asui aintaukiriri, asui upurungita aintairumu ebreu nyenga rupi.